Jateri 36 - ALA KA KUMA

Muso ka niyɔrɔ ko

¹ Yusufu kɔmɔgɔ dɔw, minw ye Manase dencɛ Makiri dencɛ Galaadi ka fadenyabolow gwatigiw ye, olu nana kuma Musa ni Isirayɛliden tɔw ka gwatigiw fɛ.

² U ko: «Masaba y'a fɔ i matigi ye ko i ka kala la ka jamana nin tilan Isirayɛlidenw cɛ k'u niyɔrɔ d'u ma ka kɛɲɛ n'u ye. A y'a fɔ i ye fana ko i k'an balimacɛ Selofeyadi niyɔrɔ d'a denmusow ma.

³ Ayiwa, n'u furula Isirayɛliden dɔw ma minw ma bɔ Yusufu la, o tuma na, u niyɔrɔ bena bɔ an faaw ta la. U furula mɔgɔ min ma, a bena fara o tigi faaw ta kan. A kɛra ten, niyɔrɔ min dira an ma, dɔ bena bɔ o la.

⁴ Ni Isirayɛlidenw ka saan bi duurunan sera tuma min na, u furula mɔgɔ minw fɛ, u niyɔrɔ bena fara o tigiw niyɔrɔ kan. O la, u niyɔrɔ bena bɔ an bɛmaw kɔmɔgɔw niyɔrɔ la.»

⁵ Masaba ye min fɔ Musa ye, a y'o fɔ Isirayɛlidenw ye, ko: «Tiɲɛ be Yusufu kɔmɔgɔw fɛ.

⁶ Masaba be min fɔ Selofeyadi denmusow ka koo la, o filɛ nin ye. U be se ka furu u diyanamɔgɔ ma, a daan ye a ka kɛ u ka fadenyabolo mɔgɔ ye.

⁷ O la, Isirayɛli ka deenw kɔmɔgɔw niyɔrɔ si tena to ka yɛlɛmayɛlɛma ɲɔgɔn fɛ, Isirayɛlidenw bɛɛ bena to n'u bɛmaw niyɔrɔ dugukolo ye.

⁸ Niyɔrɔ be denmuso o denmuso fɛ Isirayɛli deen tan ni fila kɔmɔgɔw cɛma, ale ka kan ka furu a ka fadenyabolo mɔgɔ dɔ ma janko Isirayɛlidenw kelen kelen bɛɛ ka to n'u bɛmaw niyɔrɔ ye.

⁹ O la, kɔmɔgɔ si niyɔrɔ tena yɛlɛma dɔ wɛrɛ fɛ, u bɛɛ bena to n'u yɛrɛ niyɔrɔ ye.»

¹⁰ Masaba ye min fɔ Musa ye, Selofeyadi denmusow y'o kɛ.

¹¹ A denmuso Maala ni Tirisa ni Ogila ni Milika ani Nowa furula u facɛ balimacɛw deenw ma.

¹² U furula Yusufu dencɛ Manase kɔmɔgɔw ka fadenyabolo mɔgɔ dɔw ma, u niyɔrɔ tora u facɛ ka fadenyabolow la.

¹³ Masaba ye min fɔ ani ka sariya minw sigi Isirayɛlidenw ye Musa barika la k'u to Mowabu kɛnɛba la Zurudɛn baji daa la Zeriko faan fɛ, o le ye nin ye.