Jateri 34 - ALA KA KUMA

Kanaan jamana daan

¹ Masaba y'a fɔ Musa ye ko:

² «A fɔ Isirayɛlidenw ye ko n'u donna Kanaan jamana kɔnɔ tuma min na, jamana min bena kɛ u niyɔrɔ ye, o daan filɛ nin ye:

³ A worodugu ɲafan daan bena daminɛ Zin kongokolon ma, ka taga tɛmɛ Edɔmu mara daan na. Kɔrɔn fɛ, a daan bena daminɛ *Kɔgɔji Fariman worodugu ɲafan fɛ.

⁴ A bena gɔngɔrɔn ka tɛmɛ Bunteni tintin worodugu faan na ka taga tɛmɛ Zin, ka taga se Kadɛsi Barineya worodugu ɲafan fɛ, ka tɛmɛ ka taga Asaradari, ka taga se Asimɔn.

⁵ A bena bɔ Asimɔn ka munumunu ka taga Ezipiti kɔɔ ma, ka taga gun Kɔgɔjiba la.

⁶ «Tileben ɲafan fɛ, a daan bena kɛ Kɔgɔjiba ye, o bena kɛ u ka tileben ɲafan daan ye.

⁷ «Kɔgɔdugu ɲafan fɛ, u daan filɛ nin ye: a bena bɔ Kɔgɔjiba ma ka taga se Ɔri kulu ma,

⁸ ka bɔ Ɔri kulu ma ka taga tɛmɛ Lebowamati, ka taga se Sedadi,

⁹ ka tɛmɛ ka taga Zifɔrɔn ka taga bila Asariyena. O bena kɛ aw ka jamana daan ye kɔgɔdugu ɲafan fɛ.

¹⁰ «Kɔrɔn ɲafan fɛ, u daan filɛ nin ye: a bena bɔ Asariyena ka taga Sefamu.

¹¹ A bena bɔ Sefamu ka jigi ka taga Iribila, Ayin kɔrɔn ɲafan fɛ, ka taga kuludenninw yɔrɔ la Kinerɛti baa kɔrɔn ɲafan fɛ,

¹² ka jigi ka taga Zurudɛn baji daa la ka ta'a bila Kɔgɔji Fariman na. «O le bena kɛ u ka jamana, n'a daan ye a faan bɛɛ la.»

¹³ Musa y'a fɔ Isirayɛlidenw ye ko: «Aw ka kala la ka jamana nin tilan ka kɛɲɛ n'o ye. Masaba y'a fɔ k'o ka kan ka di Isirayɛli deen kɔnɔntɔn kɔmɔgɔw ma, ani Yusufu deenw la kelen kɔmɔgɔw tilancɛ ma.

¹⁴ Bari Urubɛn kɔmɔgɔw ni Gadi kɔmɔgɔw, ani Yusufu deen Manase kɔmɔgɔw tilancɛ kelen ka gwasow ye niyɔrɔ sɔrɔ ka ban.

¹⁵ O deen fila nunu kɔmɔgɔw, ni Yusufu deen Manase kɔmɔgɔw tilan kelen ye niyɔrɔ sɔrɔ Zurudɛn baji kɔfɛ Zeriko faan fɛ, kɔrɔn ɲafan fɛ.»

Tilanko ɲanabɔbagaw

¹⁶ Masaba y'a fɔ Musa ye ko:

¹⁷ «Mɔgɔ minw bena jamana nin tilan aw cɛ, o ye sarakalasebaga Eleyazari, ani Nun dencɛ Zozuwe ye.

¹⁸ Aw ka ɲamɔgɔ kelen bɔ Isirayɛli deen tan ni fila kɔmɔgɔw kelen kelen bɛɛ la fana, janko k'u dɛmɛ jamana tilanko la.

¹⁹ O tɔgɔw filɛ nin ye: Yefunɛ dencɛ Kalɛbu ka bɔ Zuda kɔmɔgɔw la,

²⁰ Simeyɔn kɔmɔgɔw la, o ye Amiwudi dencɛ Semuyɛli ye.

²¹ Bɛnzamɛn kɔmɔgɔw ta ye Kisilɔn dencɛ Ɛlidadi ye.

²² Dan kɔmɔgɔw ta ye Yogili dencɛ Buki ye.

²³ Yusufu deen Manase kɔmɔgɔw ta ye Efɔdi dencɛ Aniyɛli ye.

²⁴ Efarayimu kɔmɔgɔw ta ye Sifitan dencɛ Kemuyɛli ye.

²⁵ Zabulɔn kɔmɔgɔw ta ye Paranaki dencɛ Elisafan ye.

²⁶ Isakari kɔmɔgɔw ta ye Azan dencɛ Palitiyɛli ye.

²⁷ Asɛri kɔmɔgɔw ta ye Selomi dencɛ Ayudi ye,

²⁸ ani Nɛfutali kɔmɔgɔw ta ye Amiwudi dencɛ Pedayɛli ye.»

²⁹ O ye mɔgɔw ye Masaba y'a fɔ minw ye ko u ka Kanaan jamana tilan Isirayɛlidenw cɛ.