Jateri 33 - ALA KA KUMA

Jama ka taama

¹ Isirayɛlidenw lɔra yɔrɔ minw na u bɔnin kɔ Ezipiti jamana na, jɛnkulu jɛnkulu ni Musa ni Arɔn b'u ɲa, olu filɛ nin ye.

² U tun sigira yɔrɔ minw na, Musa y'o yɔrɔw tɔgɔw sɛbɛn ka kɛɲɛ ni Masaba ka fɔta ye. U ka taama filɛ nin ye ka kɛɲɛ n'u lɔyɔrɔw ye.

³ Isirayɛlidenw wilila ka bɔ Aramusɛsi, saan kalo fɔlɔ tile tan ni duurunan loon. *Hɔrɔnya ɲanagwɛ dugusagwɛ, Isirayɛlidenw jaa gwɛlɛyanin bɔra Ezipitikaw bɛɛ ɲana ka taga.

⁴ Masaba tun ye Ezipitikaw deen fɔlɔw faga, u tun b'a la ka olu suuw don. Bari Masaba tun y'a ka setigiya yira u ka joow kan.

⁵ Isirayɛlidenw wilila ka bɔ Aramusɛsi ka taga sigi Sukɔti,

⁶ ka bɔ Sukɔti ka taga sigi Etamu, kongokolon daa la.

⁷ U bɔra Etamu ka kɔsegi ka na Piyayirɔti, k'u ɲaa sin Baalisefɔn ma, ka sigi Migidɔli faan fɛ.

⁸ U bɔra Piyayirɔti gɛrɛfɛ ka kɔgɔji cɛtigɛ ka taga kongokolon kɔnɔ. U ye tile saba taama kɛ Etamu kongokolon kɔnɔ ka sɔrɔ ka sigi Mara.

⁹ O kɔ, u wilila ka bɔ Mara ka taga Elimu, jibɔyɔrɔ tan ni fila ani tamarosun bi wolonwula tun be yɔrɔ nin na, u sigira yen.

¹⁰ U bɔra Elimu ka taga sigi Buruku kɔgɔji kɔrɔ,

¹¹ ka bɔ kɔgɔji nin daa la ka taga sigi Sin kongokolon kɔnɔ,

¹² ka bɔ Sin kongokolon kɔnɔ ka taga sigi Dofuka,

¹³ ka bɔ Dofuka ka taga sigi Alusi,

¹⁴ ka bɔ Alusi ka taga sigi Erefidimu. Jama tun ma jiminta sɔrɔ o yɔrɔ la.

¹⁵ U wilila ka bɔ Erefidimu ka taga sigi kongokolon kɔnɔ Sinayi kulu gɛrɛfɛ.

¹⁶ U wilila ka bɔ Sinayi kongokolon kɔnɔ ka taga sigi Kiburɔtagawa, o kɔrɔ ko Wasabaliya kaburu.

¹⁷ U bɔra Kiburɔtagawa ka taga sigi Aserɔti,

¹⁸ ka bɔ Aserɔti ka taga sigi Iritima,

¹⁹ ka bɔ Iritima ka taga sigi Irimɔnpɛrɛsi,

²⁰ ka bɔ Irimɔnpɛrɛsi ka taga sigi Libina,

²¹ ka bɔ Libina ka taga sigi Irisa,

²² ka bɔ Irisa ka taga sigi Keelata,

²³ ka bɔ Keelata ka taga sigi Sefɛri kulu kɔrɔ,

²⁴ ka bɔ Sefɛri kulu kɔrɔ ka taga sigi Arada,

²⁵ ka bɔ Arada ka taga sigi Makeelɔti,

²⁶ ka bɔ Makeelɔti ka taga sigi Tagati,

²⁷ ka bɔ Tagati ka taga sigi Tera,

²⁸ ka bɔ Tera ka taga sigi Mitika,

²⁹ ka bɔ Mitika ka taga sigi Asimona,

³⁰ ka bɔ Asimona ka taga sigi Moserɔti,

³¹ ka bɔ Moserɔti ka taga sigi Bɛneyakan,

³² ka bɔ Bɛneyakan ka taga sigi Ɔrigidigadi,

³³ ka bɔ Ɔrigidigadi ka taga sigi Yɔtibata,

³⁴ ka bɔ Yɔtibata ka taga sigi Abirona,

³⁵ ka bɔ Abirona ka taga sigi Ɛsiyɔngɛbɛri,

³⁶ ka bɔ Ɛsiyɔngɛbɛri ka taga sigi Kadɛsi, o ye Zin kongokolon kɔnɔna ye.

³⁷ U wilila ka bɔ Kadɛsi ka taga sigi Ɔri kulu gɛrɛfɛ, Edɔmu mara daan na.

³⁸ Masaba y'a fɔ sarakalasebaga Arɔn ye ko a ka yɛlɛ Ɔri kulu kan, a yɛlɛla yen ka kɛɲɛ ni Masaba ka fɔta ye, a sara o yɔrɔ la Isirayɛlidenw bɔnin kɔ Ezipiti jamana na saan bi naaninan kalo duurunan tile fɔlɔ loon na.

³⁹ Arɔn sii tun ye saan kɛmɛ ni mugan ani saba ye a satuma na Ɔri kulu kan.

⁴⁰ Aradi masacɛ min siginin tun be Kanaan jamana worodugu ɲafan fɛ, ni kanaancɛ lo, ale ye Isirayɛlidenw nako mɛn.

⁴¹ Isirayɛlidenw wilila ka bɔ Ɔri kulu gɛrɛfɛ ka taga sigi Salimona,

⁴² ka bɔ Salimona ka taga sigi Punɔn,

⁴³ ka bɔ Punɔn ka taga sigi Obɔti,

⁴⁴ ka bɔ Obɔti ka taga sigi Iyabarimu, Mowabu mara daan na.

⁴⁵ U wilila ka bɔ Iyabarimu ka taga sigi Dibɔngadi,

⁴⁶ ka bɔ Dibɔngadi ka taga sigi Alimɔndibilatayimu,

⁴⁷ ka bɔ Alimɔndibilatayimu ka taga sigi Abarimu kuluw yɔrɔ la, Nebo faan fɛ.

⁴⁸ U wilila ka bɔ Abarimu kuluw yɔrɔ la ka taga sigi Mowabu kɛnɛba la, Zurudɛn baji daa la Zeriko faan fɛ.

⁴⁹ U sigira Mowabu kɛnɛba la, Zurudɛn baji daa la, k'a ta Bɛtiyesimɔti fɔɔ ka taga se Abɛlisitimu.

Kanaan jamana tilancogo

⁵⁰ Ka Musa to Mowabu kɛnɛba la Zurudɛn baji daa la Zeriko faan fɛ, Masaba y'a fɔ a ye ko:

⁵¹ «Kuma Isirayɛlidenw fɛ k'a fɔ u ye ko n'u ye Zurudɛn baji tigɛ ka don Kanaan jamana na tuma min na,

⁵² ko u ka jamana mɔgɔ nunu bɛɛ gwɛn ka bɔ yen. Ko u k'u ka joo kabakurulamanw bɛɛ ci, k'u ka joow bɛɛ cɛn, minw dilanna ni nigɛ yelennin ye, n'u ka sɔnnikɛyɔrɔw bɛɛ.

⁵³ Ko u ka jamana nin minɛ ka sigi a kɔnɔ, bari ne y'a di u ma ka kɛ u ta ye.

⁵⁴ Ko u ka kala la ka jamana nin tilan ka kɛɲɛ n'u ka fadenyabolow ye. Minw ka ca, u k'olu niyɔrɔ boɲa, min ka dɔgɔ, u k'olu ta dɔgɔya. Ni kalabon y'a yira ko yɔrɔ min ka kɛ fadenyabolo min ta ye, olu ta bena kɛ o yɔrɔ ye. Ko u ka jamana nin tilan ka kɛɲɛ n'u bɛmaw kɔmɔgɔw mɔgɔda ye.

⁵⁵ Nga ni u ma jamana nin kɔnɔ mɔgɔw gwɛn ka bɔ u ɲa, u bena minw to yen, olu bena kɛ i n'a fɔ ŋɔnimisɛnw ka don u ɲaden na, ka kɛ ŋɔni ye k'u gɛrɛnw sɔgɔ. Ko u bena sigi jamana min kɔnɔ, u bena u tɔɔrɔ yen.

⁵⁶ Ko ne tun b'a fɛ ka min kɛ olu la, ne bena o le kɛ aw la.»