Jateri 32 - ALA KA KUMA

Galaadi mara diko

¹ Begɛn caaman tun be Urubɛn kɔmɔgɔw ni Gadi kɔmɔgɔw fɛ. U y'a ye ko Yazɛri mara ni Galaadi mara tun ka ɲi begɛnmara la.

² O la, u tagara Musa ni sarakalasebaga Eleyazari ani jama ɲamɔgɔw fɛ k'a fɔ u ye ko:

³ «Atarɔti ni Dibɔn ni Yazɛri ni Nimura ni Ɛsibɔn ni Eleyale ni Sebamu ni Nebo ani Beŋɔn,

⁴ Masaba ye Isirayɛlidenw dɛmɛ ka se mara minw kɔrɔ, olu ka ɲi begɛnmara la dɛ. Ayiwa, begɛnw do be i ka baarakɛlaw fɛ.

⁵ Ni an koo diyara i ye, i k'o mara nunu d'an ma, kana an wajibiya ka taga Zurudɛn baji kɔfɛ.»

⁶ Musa ye Gadi kɔmɔgɔw ni Urubɛn kɔmɔgɔw jaabi ko: «Aw balimaw ka kan ka taga kɛlɛ la k'aw siginin to yan wa?

⁷ Masaba ye jamana min di Isirayɛlidenw ma, mun na aw b'u fari fagara o yɔrɔ donko la?

⁸ Ne y'aw faaw ci ka bɔ Kadɛsi Barineya ka taga jamana yaala tuma min na, u y'o ɲɔgɔn le kɛ.

⁹ U tagara fɔɔ Ɛsikɔli kɔkɛnɛ na ka jamana nin filɛ, o kɔ, u ye Isirayɛlidenw fari faga fɔɔ u ma sɔn ka don jamana nin kɔnɔ, Masaba ye min d'u ma.

¹⁰ Masaba dimina o loon na, ka layidugwɛlɛn ta ko

¹¹ mɔgɔ minw bɔra Ezipiti jamana na, k'a ta minw sii sera saan mugan ma fɔɔ ka tɛmɛ o kan, k'olu si tena jamana nin ye, ale ye min layidu ta Ibrayima ni Isiyaka ani Yakuba ye k'a gwɛlɛya ko a ben'a di u ma, bari u si ma mɛnni kɛ a fɛ sɔbɛ la.

¹² Fɔɔ Kenizi kɔmɔgɔ Yefunɛ dencɛ Kalɛbu ni Nun dencɛ Zozuwe, k'olu kɔni le ye mɛnni kɛ ale Masaba fɛ sɔbɛ la.

¹³ Ayiwa, Masaba dimina Isirayɛlidenw kɔrɔ kosɔbɛ k'a kɛ u munumununa kongokolon kɔnɔ saan bi naani kɔnɔ, mɔgɔ minw ye kojugu kɛ a ɲakɔrɔ, fɔɔ olu bɛɛ ka sa.

¹⁴ Aw fana, kojugukɛla nunu, aw b'aw faaw nɔɔ ta ka dɔ fara Masaba ka dimi kan Isirayɛlidenw kama!

¹⁵ N'aw ye aw kɔɔ sin Masaba ma, a bena Isirayɛli jama to kongokolon kɔnɔ tugu, aw bena kɛ u bɛɛ halaki sababu ye.»

¹⁶ O kɔ, u gwɛrɛla Musa la k'a fɔ ko: «An b'a fɛ ka wɛɛrɛw dilan yan an ka begɛnw ye, ka duguw sigi an ka denbayaw ye.

¹⁷ Nga an sɔnnin be ka kɛlɛkɛminanw ta ka bila Isirayɛliden tɔw ɲa fɔɔ ka se n'u ye u ka yɔrɔ la. K'an to o yɔrɔ la, dugu minw lamininin be ni kogo ye, an ka denbayaw bena sigi olu kɔnɔ janko u ka tanga jamana nin kɔnɔ mɔgɔw ma.

¹⁸ An tena kɔsegi soo ni Isirayɛlidenw kelen kelen bɛɛ ma u niyɔrɔ sɔrɔ.

¹⁹ An tena niyɔrɔ si ta u fɛ Zurudɛn baji kɔfɛ, bari an ye niyɔrɔ sɔrɔ Zurudɛn kɔrɔn ɲafan fɛ.»

²⁰ Musa y'a fɔ u ye ko: «N'aw y'o kɛ, ni aw ye kɛlɛkɛminanw ta kɛlɛ kama Masaba ɲakɔrɔ,

²¹ ni aw la kɛlɛdenw kelen kelen bɛɛ ye Zurudɛn baji tigɛ Masaba ɲakɔrɔ fɔɔ a k'a juguw gwɛn ka bɔ a ɲa,

²² ni aw ma kɔsegi fɔɔ jamana nin ka kolo Masaba ye, o tuma na, aw bena kɛ hɔrɔnw ye Masaba ni Isirayɛliden tɔw faan fɛ. Jamana nin bena kɛ aw ta ye Masaba ɲakɔrɔ.

²³ Nga n'aw m'o kɛ, o tuma na, aw be Masaba hakɛ tara. Aw ka hakɛ juru bena bɔ aw la, siga t'o la.

²⁴ Aw ka duguw sigi aw ka denbayaw ye, ka wɛɛrɛw dilan aw ka begɛnw ye, nga aw y'aw daa di koo min na, aw k'o kɛ.»

²⁵ Gadi kɔmɔgɔw ni Urubɛn kɔmɔgɔw y'a fɔ Musa ye ko: «An matigi mana min fɔ, a ka baarakɛlaw bena o kɛ.

²⁶ An ka denmisɛnw n'an ka musow, n'an ka begɛnw bɛɛ bena to Galaadi mara duguw kɔnɔ yan.

²⁷ Nga i ka baarakɛlaw bɛɛ bena kɛlɛkɛminanw ta ka baa tigɛ ka taga kɛlɛ la Masaba ɲana, i ko an matigi y'a fɔ cogo min na.»

²⁸ Musa y'a fɔ sarakalasebaga Eleyazari ni Nun dencɛ Zozuwe ani Isirayɛli deen tan ni fila kɔmɔgɔw ka gwatigiw ye u ka koo la,

²⁹ ko: «Ni Gadi kɔmɔgɔw ni Urubɛn kɔmɔgɔw bɛɛ ye kɛlɛkɛminanw ta ka Zurudɛn baji tigɛ n'aw ye Masaba ɲakɔrɔ, ni jamana mɔgɔw kolora aw ye tuma min na, o tuma na, aw ka Galaadi mara d'u ma.

³⁰ Nga n'u ma kɛlɛkɛminanw ta ka baa tigɛ n'aw ye, u niyɔrɔ bena kɛ aw cɛma Kanaan jamana na.»

³¹ Gadi kɔmɔgɔw ni Urubɛn kɔmɔgɔw y'a fɔ ko: «Masaba ye min fɔ i ka baarakɛlaw ye, an bena o kɛ.

³² An bena kɛlɛkɛminanw ta ka baa tigɛ ka taga don Kanaan kɔnɔ Masaba ɲakɔrɔ, nga an bena yɔrɔ min sɔrɔ ka kɛ an niyɔrɔ ye, o ka kɛ Zurudɛn yan faan fɛ.»

³³ Amoriw ka masacɛ Siŋɔn ka mara, ni *Basan masacɛ Ɔgi ka mara, o jamana n'a duguw ani u lamini kongow, Musa ye olu bɛɛ di Gadi kɔmɔgɔw ni Urubɛn kɔmɔgɔw ani Yusufu dencɛ Manase kɔmɔgɔw tilancɛ ma.

³⁴ Gadi kɔmɔgɔw ye dugu minw sigi kura ye, olu ye Dibɔn ni Atarɔti ni Arowɛri,

³⁵ ni Atirɔtisofan ni Yazɛri ni Yogibowa,

³⁶ ni Bɛtinimura ani Bɛtaran ye. U ye kogo lɔ k'u lamini, ani ka wɛɛrɛw dilan u ka begɛnw ye.

³⁷ Urubɛn kɔmɔgɔw ye Ɛsibɔn ni Eleyale ni Kiriyatayimu sigi kura ye,

³⁸ ka Nebo ani Bali Meŋɔni sigi fana, k'u tɔgɔw yɛlɛma, ani Sibima. U ye dugu minw sigi kura ye, u ye tɔgɔ wɛrɛw la olu kan.

³⁹ Manase dencɛ Makiri kɔmɔgɔ cɛmanw tagara Galaadi mara kɛlɛ k'a minɛ. Amori minw tun be o yɔrɔ la, u ye olu gwɛn.

⁴⁰ O la, Musa ye Galaadi mara di Manase dencɛ Makiri kɔmɔgɔw ma, olu sigira o yɔrɔ la.

⁴¹ Manase kɔmɔgɔ Yayiri tagara o yɔrɔ dugudenninw minɛ k'u tɔgɔ la ko Yayiri ka dugudenninw.

⁴² Noba tagara Kenati n'a dafɛ dugudenninw minɛ k'a yɛrɛ tɔgɔ la a kan ko Noba.