Jateri 31 - ALA KA KUMA

Isirayɛlidenw be se madiyanw kɔrɔ

¹ Masaba y'a fɔ Musa ye ko:

² «I ka Isirayɛlidenw mɔnɛ bɔ madiyanw la. O kɔ, i bena taga i faaw fɛ.»

³ O la, Musa y'a fɔ jama ye ko: «Aw ka kɛlɛkɛminanw di aw ka cɛɛ dɔw ma, u ka taga madiyanw kama k'u kɛlɛ, ka Masaba mɔnɛ bɔ u la.

⁴ Aw ka cɛɛ waa kelen kelen bɔ Isirayɛli deen tan ni fila nunu kɔmɔgɔw kelen kelen bɛɛ la k'u ci ka taga kɛlɛ la.»

⁵ U ye cɛɛ waa kelen kelen bɔ Isirayɛli deen tan ni fila nunu kɔmɔgɔw kelen kelen bɛɛ la. Cɛɛ minw labɛnnin tun be ni kɛlɛkɛminanw ye, o bɛɛ lajɛnnin tun kɛra mɔgɔ waa tan ni fila (12 000) ye.

⁶ Musa y'u ci ka taga kɛlɛ la, cɛɛ waa kelen kelen ka bɔ Isirayɛli deen tan ni fila nunu kɔmɔgɔw kelen kelen bɛɛ la, ka sarakalasebaga Eleyazari dencɛ Pinasi bila ka taga n'u ye. Ale tagara ni Masaba sigiyɔrɔ minanw ye, ni buruw ye u be minw fiyɛ ka jama lasɔmi.

⁷ U tagara madiyanw kɛlɛ i ko Masaba y'a fɔ Musa ye cogo min na, ka cɛɛw bɛɛ faga.

⁸ U ye mɔgɔ minw faga, madiyanw ka masacɛ duuru tun b'u cɛma. Olu tɔgɔw filɛ nin ye: Ewi ni Ɛrɛkɛmu ni Suri ni Huri ani Ɛrɛba. U ye Bewɔri dencɛ Balamu fana faga ni murujan ye.

⁹ Isirayɛlidenw ye madiyanmusow n'u denmisɛnw minɛ, k'u ka misiw n'u ka begɛnmisɛnw n'u bololafɛn bɛɛ cɛ

¹⁰ k'u ka duguw n'u ka kongosow bɛɛ jɛni.

¹¹ U ye fɛɛn minw sɔrɔ, u y'o bɛɛ ta, begɛn fara mɔgɔw kan.

¹² U ye mɔgɔ minw minɛ ka fɛɛn minw cɛ, u tagara n'o ye Musa ni sarakalasebaga Eleyazari ani Isirayɛli jama fɛ u ka sigiyɔrɔ la, Mowabu kɛnɛba la, Zurudɛn baji daa la Zeriko faan fɛ.

¹³ Musa ni sarakalasebaga Eleyazari ani jama ɲamɔgɔw bɛɛ bɔra ka taga u kunbɛn jama ka sigiyɔrɔ kɔfɛ.

¹⁴ Kɛlɛdenw kuntigi minw kɔsegira ka bɔ kɛlɛyɔrɔ la, Musa dimina olu kɔrɔ. U dɔw tun ye mɔgɔ waa kelen kelen kuntigiw ye, dɔw ye mɔgɔ kɛmɛ kɛmɛ kuntigiw ye.

¹⁵ A y'u ɲininga ko: «Aw ye muso nunu bɛɛ to nii na wa?

¹⁶ Olu le tun tugura Balamu ka ladili kɔ ka Isirayɛlidenw kuun ɲagami u murutira Masaba ma Pewɔri fɔɔ fɔɲɔbana wilila Masaba ka jama cɛma.

¹⁷ Ayiwa, sisan aw ye dencɛw bɛɛ faga, ani cɛɛ lara ni muso minw bɛɛ ye ka tɛmɛ.

¹⁸ Nga sunguru minw ma la ka ye ni cɛɛ ye, aw k'olu bɛɛ to yen, u ka kɛ aw ta ye, aw kana olu faga.

¹⁹ Aw minw ye mɔgɔ dɔ faga, walima minw bɛɛ magara suu la, aw ka to jama ka sigiyɔrɔ kɔfɛ ka tile wolonwula kɛ, k'aw yɛrɛ saniya tile sabanan ni tile wolonwulanan loon, ani aw ye mɔgɔ minw minɛ fana.

²⁰ Aw ka faniw bɛɛ saniya, ni fɛɛn o fɛɛn kɛra golo ye, ni minw dilanna ni baasi ye, ani yiriminanw, aw k'olu bɛɛ saniya.»

²¹ Kɛlɛden minw tun tagara kɛlɛ la, sarakalasebaga Eleyazari y'a fɔ olu ye ko: «Ka kɛɲɛ ni Masaba ye sariya min fɔ Musa ye, a wajibiyanin lo

²² sanu ni warigwɛ ni zira ni nigɛfin ni fugan ani nigɛ sifa dɔ wɛrɛ,

²³ fɛɛn o fɛɛn min be se ka don ka bɔ tasuma na, o bɛɛ ka don a la k'u nɔgɔ bɔ. Fɛɛn saniyaji be kɛ k'u saniya fana. Fɛɛn o fɛɛn te se ka don ka bɔ tasuma kɔnɔ, aw k'o don jii la.

²⁴ Tile wolonwulanan loon na, aw k'aw ka faniw ko, aw bena saniya. O kɔ, aw be se ka don jama ka sigiyɔrɔ la.»

Kɛlɛyɔrɔ fɛɛnw tilanko

²⁵ Masaba y'a fɔ Musa ye ko:

²⁶ «U ye mɔgɔw ni begɛn minw bɛɛ minɛ, e ni sarakalasebaga Eleyazari ni jama kuntigiw ka olu jati.

²⁷ Kɛlɛden minw tagara kɛlɛ la, u ye fɛɛn minw minɛ yen, aw k'o tilan olu ni jama cɛ.

²⁸ Kɛlɛden minw tagara kɛlɛ la, i ka dɔ bɔ olu niyɔrɔ la k'o kɛ ne Masaba ta ye, mɔgɔ kɛmɛ duuru o kɛmɛ duuru, i ka mɔgɔ kelen bɔ, misiw ni faliw ani sagaw ni baaw kɛmɛ duuru o kɛmɛ duuru, i ka kelen kelen bɔ u la.

²⁹ O bɔ olu niyɔrɔ la k'u di sarakalasebaga Eleyazari ma ka kɛ ne niyɔrɔ ye.

³⁰ Minw ye Isirayɛlidenw niyɔrɔ ye, i ka kelen kelen bɔ o bi duuru duuru bɛɛ la, mɔgɔw ni misiw ni faliw ni sagaw ni baaw ani begɛn dɔ wɛrɛw, k'u di Levi kɔmɔgɔ tɔw ma, minw be ne Masaba ka fanibugu kɔlɔsi.»

³¹ Masaba ye min fɔ Musa ye, Musa ni sarakalasebaga Eleyazari y'o kɛ.

³² Kɛlɛdenw ye fɛɛn minw minɛ kɛlɛyɔrɔ la, min tora o la, o tun ye saga waa kɛmɛ wɔɔrɔ ni waa bi wolonwula ni duuru (675 000) ye,

³³ ani misi waa bi wolonwula ni fila (72 000),

³⁴ ani fali waa bi wɔɔrɔ ni kelen (61 000),

³⁵ ani muso waa bi saba ni fila (32 000), cɛɛ tun ma la ka ye ni minw ye.

³⁶ Mɔgɔ minw tun tagara kɛlɛ la, olu ye tilan kelen min sɔrɔ fɛɛn nunu na, o kɛra saga waa kɛmɛ saba ni bi saba ni wolonwula ani kɛmɛ duuru (337 500) ye.

³⁷ U ye kɛmɛ wɔɔrɔ ni bi wolonwula ni duuru bɔ olu la k'o di Masaba ma.

³⁸ Misiw tun ye waa bi saba ni wɔɔrɔ (36 000) ye. U ye bi wolonwula ni fila bɔ u la k'u di Masaba ma.

³⁹ Faliw tun ye waa bi saba ni kɛmɛ duuru (30 500) ye. U ye bi wɔɔrɔ ni kelen bɔ o la k'o di Masaba ma.

⁴⁰ Mɔgɔw tun ye waa tan ni wɔɔrɔ (16 000) ye. U ye mɔgɔ bi saba ni fila bɔ u la k'u di Masaba ma.

⁴¹ Min dira Masaba ma, Musa y'o di sarakalasebaga Eleyazari ma, u ka kɛ Masaba niyɔrɔ ye i ko Masaba tun y'a fɔ a ye cogo min na.

⁴² Tilancɛ min sera Isirayɛlidenw ma, Musa tun ye min bɔ ka bila danna kɛlɛdenw ta la,

⁴³ n'o kɛra jama niyɔrɔ ye, o filɛ nin ye: saga waa kɛmɛ saba ni bi saba ni wolonwula ani kɛmɛ duuru,

⁴⁴ ni misi waa bi saba ni wɔɔrɔ,

⁴⁵ ani fali waa bi saba ni kɛmɛ duuru (30 500),

⁴⁶ ani mɔgɔ waa tan ni wɔɔrɔ (16 000).

⁴⁷ O tilancɛ min tun ye Isirayɛlidenw niyɔrɔ ye, Musa ye kelen kelen bɔ o bi duuru duuru bɛɛ la, begɛn fara mɔgɔ kan, k'u di Levi kɔmɔgɔw ma, minw tun be Masaba ka fanibugu kɔlɔsi la, i ko Masaba y'a fɔ a ye cogo min na.

⁴⁸ Kɛlɛden waa kelen kelen kuntigiw ni kɛlɛden kɛmɛ kɛmɛ kuntigiw gwɛrɛla Musa la

⁴⁹ k'a fɔ a ye ko: «An be kɛlɛden minw kunna, an ye olu jati. Hali mɔgɔ kelen m'an jɛn.

⁵⁰ O la, an kelen kelen bɛɛ ye sanufɛn minw sɔrɔ, an nana ni olu ye k'u di Masaba ma: bololataw, ni tulolataw, ani kannataw. An b'o di Masaba ma k'an yɛrɛ saniya.»

⁵¹ Musa ni sarakalasebaga Eleyazari ye sanufɛn dilannin nunu bɛɛ minɛ u fɛ.

⁵² U ye kɛlɛdenw kuntigi nunu ka sanu min di Masaba ma, o bɛɛ gwiliya tun sera kilo kɛmɛ ni bi wolonwula ma.

⁵³ Kɛlɛdenw tun ye fɛɛn minw cɛ, u kelen kelen bɛɛ tora n'u ta ye.

⁵⁴ Musa ni sarakalasebaga Eleyazari ye kɛlɛdenw kuntigi nunu ka sanu minɛ ka don n'a ye Ɲɔgɔnkunbɛn fanibugu kɔnɔ, a ka kɛ fɛɛn ye min be Masaba hakili jigi Isirayɛlidenw la.