Jateri 28 - ALA KA KUMA

Loon o loon sarakaw

¹ Masaba y'a fɔ Musa ye ko: «A fɔ Isirayɛlidenw ye ko

² u ka jija ka sarakaw bɔ ne Masaba ye a waati latigɛnin na, saraka minw be jɛni pewu. O ye ne ka dumuni ye, a kasa ka di ne ye.

³ «A fɔ u ye tugu ko u ka kan ka saraka min bɔ ne ye, k'a jɛni pewu, o filɛ nin ye: saga min ye saan kelen sɔrɔ ni fiɲɛ t'a la, u k'o fila bɔ saraka jɛnita ye loon o loon.

⁴ Sagaden kelen ka bɔ sɔgɔmadafɛ, a tɔ kelen ka bɔ wulafɛ,

⁵ ka mugu tɛntɛnnin kilo saba ɲagami ni olivutulu ɲanaman litiri kelen ni tilan ye, k'o fara sagaden nunu kelen kelen bɛɛ kan k'o fana bɔ suman saraka ye.

⁶ O ye loon o loon saraka jɛnita ye, min bɔko daminɛna Sinayi kulu kan, ka kɛ saraka ye min be jɛni pewu ne Masaba ye. A kasa ka di ne ye.

⁷ Saga o saga bɔwaati la, u ka na ni duvɛn litiri kelen ni tilan ye, k'a kɛ saraka ye. U k'o bɔn ne Masaba ɲakɔrɔ n sigiyɔrɔ la.

⁸ Saga filanan fana ka bɔ wuladafɛ. Suman saraka ni jii min ɲɔgɔn be bɔ sɔgɔmadafɛ, o k'o ɲɔgɔn bɔ fana. O ye saraka ye min be jɛni pewu, a kasa ka di ne Masaba ye.

Lafiɲɛlon sarakaw

⁹ «Lafiɲɛlon na, saga fila minw ye saan kelen kelen sɔrɔ ni fiɲɛ t'u la, aw k'o bɔ saraka ye, n'a jii, ani mugu tɛntɛnnin kilo wɔɔrɔ, ka tulu ɲagami o la, mugu nin ka kɛ suman saraka ye.

¹⁰ O ye saraka jɛnita ye min be bɔ lafiɲɛlon bɛɛ la, ka fara loon o loon saraka jɛnita n'a jii kan.

Kalokura sarakaw

¹¹ «Kalo o kalo loon fɔlɔ, aw ka tura kɛɲɛnin fila bɔ saraka jɛnita ye ne Masaba ye, ni sagajigi kelen, ani sankelensaga cɛman, o deen wolonwula, fiɲɛ kana sɔrɔ u si la.

¹² Tura kelen kelen bɛɛ be bila sira ni suman saraka ye: mugu tɛntɛnnin kilo kɔnɔntɔn, min ɲagamina ni tulu ye. Sagajigi bilasira ta ye mugu tɛntɛnnin kilo wɔɔrɔ ye, k'o ɲagami ni tulu ye.

¹³ Sagaden kelen kelen bɛɛ bilasira ta ye mugu tɛntɛnnin kilo saba ye min ɲagamina ni tulu ye. O ka kɛ saraka jɛnita ye, min be jɛni pewu, a kasa ka di ne Masaba ye.

¹⁴ Jii min ka kan ka bɔn tura kelen kelen bɛɛ bɔtuma na, o ye duvɛn litiri saba ye, sagajigiw ta ka kɛ litiri fila fila ye, sagadenw ta ka kɛ litiri kelen ni tilan ye. O le ye kalo o kalo saraka jɛnita ye min ka kan ka bɔ kalokura bɔtuma na saan kuturu bɛɛ kɔnɔ.

¹⁵ Aw ka bakɔrɔnin kelen kɛ hakɛ yafa saraka ye ne Masaba ye ka fara loon o loon saraka jɛnita n'a jii kan.

Ɲanagwɛw

¹⁶ «Saan kalo fɔlɔ tile tan ni naaninan loon, aw ka *Hɔrɔnya ɲanagwɛ kɛ ka ne Masaba bato.

¹⁷ Kalo nin tile tan ni duurunan loon bena kɛ ɲanagwɛ ye. Aw ka buru dumu tile wolonwula kɔnɔ fununan te min na.

¹⁸ Ɲanagwɛ tile fɔlɔ la, aw ka lajɛn ka ne Masaba bato, aw kana baara gwɛlɛman si kɛ o loon na.

¹⁹ Aw ka saraka jɛnita min be jɛni pewu bɔ ne Masaba ye. O ka kɛ tura kɛɲɛnin fila ye, ni sagajigi kelen, ani sankelensaga wolonwula, fiɲɛ kana sɔrɔ u si la.

²⁰ Mugu tɛntɛnnin ka ɲagami ni tulu ye, o ni begɛn le be bɔ ɲɔgɔn fɛ. Mugu nin kilo kɔnɔntɔn ka bɔ tura kelen kelen bɛɛ bɔtuma na. Kilo wɔɔrɔ ka bɔ sagajigi bɔtuma na,

²¹ kilo saba ka bɔ sagadenw kelen kelen bɛɛ bɔtuma na.

²² Aw ka bakɔrɔnin kelen bɔ hakɛ yafa saraka ye, k'aw ka yafa daali n'o ye.

²³ Aw k'o saraka nunu bɔ k'u fara loon o loon sɔgɔma saraka jɛnita kan.

²⁴ O cogo la fana, aw ka dumuni labɛn ne Masaba ye loon o loon, tile wolonwula kɔnɔ, k'o kɛ saraka ye min be jɛni pewu, a kasa ka di ne Masaba ye. O be bɔ ka fara loon o loon saraka jɛnita n'a jii kan.

²⁵ A tile wolonwulanan loon, aw ka lajɛn ka ne Masaba bato, aw kana baara gwɛlɛman si kɛ o loon na.

Sumantigɛ ɲanagwɛ

²⁶ «Sumantigɛ ɲanagwɛ loon fɔlɔ, n'aw be sɛnɛfɛn deen fɔlɔw bɔ saraka ye ne Masaba ye, aw ka lajɛn ka ne bato, aw kana baara gwɛlɛman si kɛ o loon na.

²⁷ Aw ka tura kɛɲɛnin fila, ni sagajigi kelen, ani sankelensaga wolonwula bɔ saraka jɛnita ye. O kasa ka di ne Masaba ye.

²⁸ Suman saraka min ka kan ka fara o kan, o ye mugu tɛntɛnnin ye ka tulu ɲagami o la. Mugu nin kilo kɔnɔntɔn ka bɔ tura kelen kelen bɛɛ bɔtuma na, kilo wɔɔrɔ ka bɔ sagajigi bɔtuma na,

²⁹ kilo saba ka bɔ sagaden wolonwula nunu kelen kelen bɛɛ bɔtuma na.

³⁰ Aw ka bakɔrɔnin kelen bɔ saraka ye janko k'aw ka hakɛ yafa daali.

³¹ Aw ka saraka nunu bɔ, n'u jii, k'o fara loon o loon saraka jɛnita n'a suman saraka kan. Fiɲɛ kana sɔrɔ o begɛn nunu si la.