Jateri 26 - ALA KA KUMA

Isirayɛlidenw jatiko filanan

¹ O fɔɲɔbana tɛmɛnin kɔ, Masaba y'a fɔ Musa ni sarakalasebaga Arɔn dencɛ Eleyazari ye ko:

² «Isirayɛliden minw sii sera saan mugan ma, walima ka tɛmɛ o kan, n'u be se ka taga kɛlɛ la, aw ka olu bɛɛ tɔgɔ sɛbɛn. Aw k'u sɛbɛn soo ma soo ma.»

³ O la, Musa ni sarakalasebaga Eleyazari kumana Isirayɛlidenw fɛ k'u to Mowabu mara kɛnɛba la Zurudɛn baji daa la Zeriko faan fɛ. U y'a fɔ ko:

⁴ «Aw ka cɛdenw tɔgɔ sɛbɛn minw sii sera saan mugan ma, walima ka tɛmɛ o kan, i ko Masaba y'a fɔ Musa ye cogo min na.» Isirayɛliden minw bɔra Ezipiti jamana la, olu filɛ nin ye:

⁵ Isirayɛli dencɛ fɔlɔ tun ye Urubɛn ye. Urubɛn kɔmɔgɔw tɔgɔ filɛ nin ye: Anɔki kɔmɔgɔw ka fadenyabolo bɔra Anɔki la. Palu kɔmɔgɔw ta bɔra Palu la.

⁶ Kelen fana bɔra Ɛsirɔn la. Kelen bɔra Karami la.

⁷ Olu le tun ye Urubɛn kɔmɔgɔw ka fadenyabolow ye. Cɛɛ minw jatira, olu tun ye mɔgɔ waa bi naani ni saba, ani kɛmɛ wolonwula ni bi saba (43 730) ye.

⁸ Palu dencɛ tun ye Eliyabu ye.

⁹ Eliyabu dencɛw tun ye Nemuyɛli ni Datan ani Abiramu ye. Ale Datan ni Abiramu le tun ye jama ɲamɔgɔw ye minw murutira Musa ni Arɔn ma. U tun farala Kore nunu kan tuma min na u murutira Masaba ma.

¹⁰ Dugukolo pɛrɛnna k'u ni Kore kunu, ani mɔgɔ minw tun tugur'a kɔ, olu satuma na, mɔgɔ kɛmɛ fila ni bi duuru nunu jɛnituma na. U ka koo kɛra lasɔmiko ye.

¹¹ O bɛɛ n'a ta, Kore dencɛw ma sa.

¹² Simeyɔn kɔmɔgɔw filɛ nin ye ka kɛɲɛ n'u ka fadenyabolow ye: fadenyabolo kelen bɔra Nemuyɛli la. Kelen bɔra Yamin na. Kelen bɔra Yakin na.

¹³ Kelen bɔra Zera la. Kelen bɔra Sayuli la.

¹⁴ Olu le tun ye Simeyɔn kɔmɔgɔw ka fadenyabolow ye. U tun ye cɛɛ waa mugan ni fila ani kɛmɛ fila (22 200) ye.

¹⁵ Gadi kɔmɔgɔw filɛ nin ye ka kɛɲɛ n'u ka fadenyabolow ye: fadenyabolo dɔ bɔra Sefɔn la. Kelen bɔra Agi la. Kelen bɔra Suni la.

¹⁶ Kelen bɔra Ozini la. Kelen bɔra Ɛri la.

¹⁷ Kelen bɔra Arɔdi la. Kelen bɔra Areli la.

¹⁸ Olu le tun ye Gadi kɔmɔgɔw ka fadenyabolow ye. Mɔgɔ minw jatira, olu tun ye cɛɛ waa bi naani ani kɛmɛ duuru (40 500) ye.

¹⁹ Ɛri ni Onan tun ye Zuda dencɛw ye, nga olu sara Kanaan jamana na.

²⁰ Zuda kɔmɔgɔw filɛ nin ye ka kɛɲɛ n'u ka fadenyabolow ye: fadenyabolo kelen bɔra Sela la. Kelen bɔra Pɛrɛti la. Kelen bɔra Zera la.

²¹ Pɛrɛti kɔmɔgɔw filɛ nin ye: fadenyabolo dɔ bɔra Ɛsirɔn la. Dɔ bɔra Amuli la.

²² Olu le tun ye Zuda kɔmɔgɔw ka fadenyabolow ye. Mɔgɔ minw jatira, olu tun ye cɛɛ waa bi wolonwula ni wɔɔrɔ ani kɛmɛ duuru (76 500) ye.

²³ Isakari kɔmɔgɔw filɛ nin ye ka kɛɲɛ n'u ka fadenyabolow ye: fadenyabolo kelen bɔra Tola la. Kelen bɔra Puwa la.

²⁴ Dɔ bɔra Yasubu la. Dɔ bɔra Simirɔn na.

²⁵ Olu le tun ye Isakari kɔmɔgɔw ka fadenyabolow ye. Mɔgɔ minw jatira, olu tun ye cɛɛ waa bi wɔɔrɔ ni naani ani kɛmɛ saba (64 300) ye.

²⁶ Zabulɔn kɔmɔgɔw filɛ nin ye ka kɛɲɛ n'u ka fadenyabolow ye: fadenyabolo dɔ bɔra Sɛrɛdi la. Dɔ bɔra Elɔn na. Dɔ bɔra Yaleyɛli la.

²⁷ Olu le tun ye Zabulɔn kɔmɔgɔw ka fadenyabolow ye. Mɔgɔ minw jatira, olu tun ye cɛɛ waa bi wɔɔrɔ ani kɛmɛ duuru (60 500) ye.

²⁸ Yusufu dencɛw tun ye Manase ni Efarayimu ye. O kɔmɔgɔw filɛ nin ye ka kɛɲɛ n'u ka fadenyabolow ye.

²⁹ Manase kɔmɔgɔw filɛ nin ye: fadenyabolo dɔ bɔra Makiri la. Makiri tun ye Galaadi facɛ ye. Fadenyabolo dɔ bɔra Galaadi fana na.

³⁰ Galaadi ta fana filɛ nin ye: fadenyabolo kelen bɔra Yezɛri la. Dɔ bɔra Elɛki la.

³¹ Dɔ bɔra Asiriyɛli la. Dɔ bɔra Sɛkɛmu la.

³² Dɔ bɔra Semida la. Dɔ bɔra Efɛri la.

³³ Efɛri dencɛ Selofeyadi ma dencɛ sɔrɔ, fɔɔ denmusow. A denmusow tɔgɔw ko Maala ni Nowa ni Ogila ni Milika ani Tirisa.

³⁴ Olu le tun ye Manase kɔmɔgɔw ka fadenyabolow ye. Mɔgɔ minw jatira, olu tun ye cɛɛ waa bi duuru ni fila, ani kɛmɛ wolonwula (52 700) ye.

³⁵ Efarayimu kɔmɔgɔw filɛ nin ye ka kɛɲɛ n'u ka fadenyabolow ye: fadenyabolo kelen bɔra Sutela la. Dɔ bɔra Bɛkɛri la. Dɔ bɔra Tagan la.

³⁶ Sutela kɔmɔgɔw filɛ nin ye: fadenyabolo dɔ bɔra Eran la.

³⁷ Olu le tun ye Efarayimu kɔmɔgɔw ka fadenyabolow ye. Mɔgɔ minw jatira, olu tun ye cɛɛ waa bi saba ni fila ani kɛmɛ duuru (32 500) ye. Olu le tun ye Yusufu kɔmɔgɔw ye ka kɛɲɛ n'u ka fadenyabolow ye.

³⁸ Bɛnzamɛn kɔmɔgɔw filɛ nin ye ka kɛɲɛ n'u ka fadenyabolow ye: fadenyabolo dɔ bɔra Bɛla la. Dɔ bɔra Asibɛli la. Dɔ bɔra Ayiramu la.

³⁹ Dɔ bɔra Sufamu la. Dɔ bɔra Ufamu la.

⁴⁰ Bɛla dencɛw tun ye Aradi ni Naaman ye. Aradi kɔmɔgɔw ka fadenyabolo bɔra Aradi la. Naaman kɔmɔgɔw ta bɔra Naaman la.

⁴¹ Olu le tun ye Bɛnzamɛn kɔmɔgɔw ka fadenyabolow ye. Mɔgɔ minw jatira, olu tun ye cɛɛ waa bi naani ni duuru ani kɛmɛ wɔɔrɔ (45 600) ye.

⁴² Dan kɔmɔgɔw tun ye fadenyabolo kelen ye ka bɔ Suwamu la.

⁴³ Suwamu kɔmɔgɔw bɛɛ lajɛnnin tun ye cɛɛ waa bi wɔɔrɔ ni naani, ani kɛmɛ naani (64 400) ye.

⁴⁴ Asɛri kɔmɔgɔw filɛ nin ye ka kɛɲɛ n'u ka fadenyabolow ye: fadenyabolo kelen bɔra Yimina la. Dɔ bɔra Yisiwi la. Dɔ bɔra Beriya la.

⁴⁵ Fadenyabolo minw bɔra Beriya kɔmɔgɔw la, olu filɛ nin ye: dɔ bɔra Ebɛri la. Dɔ bɔra Malikiyɛli la.

⁴⁶ Denmuso fana tun be Asɛri fɛ, a tɔgɔ tun ko Sera.

⁴⁷ Olu le tun ye Asɛri kɔmɔgɔw ka fadenyabolow ye. Mɔgɔ minw jatira, olu tun ye cɛɛ waa bi duuru ni saba ani kɛmɛ naani (53 400) ye.

⁴⁸ Nɛfutali kɔmɔgɔw filɛ nin ye ka kɛɲɛ n'u ka fadenyabolow ye: fadenyabolo dɔ bɔra Yaseyɛli la. Dɔ bɔra Guni la.

⁴⁹ Dɔ bɔra Yesɛri la. Dɔ bɔra Silɛmu la.

⁵⁰ Olu le tun ye Nɛfutali kɔmɔgɔw ka fadenyabolow ye. Mɔgɔ minw jatira, olu tun ye cɛɛ waa bi naani ni duuru ani kɛmɛ naani (45 400) ye.

⁵¹ Isirayɛli cɛden tun kɛra mɔgɔ waa kɛmɛ wɔɔrɔ ni kelen, ani kɛmɛ wolonwula ni bi saba (601 730) ye.

⁵² Masaba y'a fɔ Musa ye ko:

⁵³ «Jamana nin bena tilan Isirayɛlidenw cɛ ka kɛ u niyɔrɔ ye ka kɛɲɛ n'u mɔgɔdaw ye.

⁵⁴ Mɔgɔ minw ka ca, i ka olu niyɔrɔ boɲa. Minw man ca, i ka olu ta dɔgɔya. I bena u kelen kelen bɛɛ ta di u ma ka kɛɲɛ n'u daa ye jatili tuma na.

⁵⁵ U ka kala la, ka jamana nin tilan ka kɛɲɛ n'o ye. U niyɔrɔ ka di u ma ka kɛɲɛ n'u bɛmaw kɔmɔgɔw daa ye.

⁵⁶ Mɔgɔ minw ka ca, ani minw man ca, u niyɔrɔ bena tilan ka di u ma ka kɛɲɛ ni kala lacogo ye.»

⁵⁷ Levi kɔmɔgɔ minw jatira ka kɛɲɛ n'u ka fadenyabolow ye, olu filɛ nin ye: fadenyabolo dɔ bɔra Gɛrisɔn la. Dɔ bɔra Keyati la. Dɔ bɔra Merari la.

⁵⁸ Levi kɔmɔgɔw ka fadenyabolow filɛ nin ye: Libini kɔmɔgɔw ka fadenyabolo, ni Eburɔn kɔmɔgɔw ta, ni Maali kɔmɔgɔw ta, ni Musi kɔmɔgɔw ta, ani Kore kɔmɔgɔw ta. Keyati tun ye Amuramu bɛma ye.

⁵⁹ Amuramu muso tɔgɔ ko Yokɛbɛdi, Levi kɔmɔgɔ tun lo, Levi kɔmɔgɔ dɔ lo y'a wolo Ezipiti jamana na. Yokɛbɛdi ye Arɔn ni Musa n'u kɔrɔmuso Miriyama wolo Amuran ye.

⁶⁰ Arɔn tun ye Nadabu ni Abiyu, ani Eleyazari ni Itamari facɛ ye.

⁶¹ Nga Nadabu ni Abiyu tun nana ni takami wɛrɛ ye Masaba ɲakɔrɔ, olu tun sara.

⁶² Ayiwa, Levi kɔmɔgɔ cɛman minw bɛɛ jatira, k'a ta kalokelenden ma fɔɔ ka taga ɲa, olu tun ye mɔgɔ waa mugan ni saba (23 000) ye. U tun ma Levi kɔmɔgɔw jati ni Isirayɛliden tɔw ye, bari u ma niyɔrɔ sɔrɔ u cɛma.

⁶³ Musa ni sarakalasebaga Eleyazari ye Isirayɛliden minw tɔgɔ sɛbɛn k'u jati k'u to Mowabu kɛnɛba la Zurudɛn baji daa la Zeriko faan fɛ, olu ye o ye.

⁶⁴ Musa ni sarakalasebaga Arɔn tun ye Isirayɛliden minw tɔgɔ sɛbɛn k'u jati k'u to kongokolon kɔnɔ Sinayi kulu gɛrɛfɛ, olu si niin tun t'u la.

⁶⁵ Bari Masaba tun y'a fɔ u ye ko siga t'a la, u bena sa kongokolon kɔnɔ, o la, u si ma to fɔɔ Yefunɛ dencɛ Kalɛbu ni Nun dencɛ Zozuwe.