Jateri 19 - ALA KA KUMA

Misimuso wuleman bugurigwɛ

¹ Masaba y'a fɔ Musa ni Arɔn ye ko:

² «Ne Masaba ye sariya min sigi, fɛɛn min wajibiyanin be o kɔnɔ, o filɛ nin ye. A fɔ Isirayɛlidenw ye ko u ka na i fɛ ni misimuso wuleman ye, a dafanin, fiɲɛ te min na, min ma deli ka sɛnɛ kɛ.

³ I k'o don sarakalasebaga Eleyazari bolo, ale ka taga n'a ye jama ka sigiyɔrɔ kɔfɛ, u k'a faga a ɲana.

⁴ O kɔ, a k'a joli dɔ ta n'a bolokunnaden ye k'a seriseri Ɲɔgɔnkunbɛn fanibugu ɲafɛla faan fɛ siɲɛ wolonwula.

⁵ U ka misi nin jɛni a ɲana, a golo, n'a sogo, n'a joli, ani a boo bɛɛ.

⁶ Sarakalasebaga ka sɛdiriyiri ni *izɔpiyiri furaburu ani gaari wuleman ta k'u fili tasuma nin kɔnɔ.

⁷ O kɔ, a k'a ka faniw ko ka jii ko. O kɔfɛ, a be se ka segi ka don jama ka sigiyɔrɔ la. Nga a nɔgɔnin bena to fɔɔ wulafɛ.

⁸ Mɔgɔ min ye misi jɛni, ale fana k'a ka faniw ko ka jii ko. A fana nɔgɔnin bena to fɔɔ wulafɛ.

⁹ Mɔgɔ min saniyanin be, ale ka misi nin bugurigwɛ cɛ k'o bila jama ka sigiyɔrɔ kɔfɛ yɔrɔ dɔ la, min saniyanin be sariya faan fɛ. Isirayɛli jama k'o mara janko o ka kɛ fɛɛn saniyaji la. O be bɔ ka kɛ hakɛ yafa saraka ye.

¹⁰ Mɔgɔ min ye bugurigwɛ nin cɛ, ale fana k'a ka faniw ko. A fana nɔgɔnin bena to fɔɔ wulafɛ. O bena kɛ sariya ye min tena dabila Isirayɛlidenw ni lonanw fɛ, minw be u cɛma.

Mɔgɔ saniyacogo

¹¹ «Ni mɔgɔ o mɔgɔ magara suu la, ale nɔgɔnin bena to tile wolonwula kɔnɔ.

¹² A k'a yɛrɛ saniya n'o jii nin ye a tile sabanan loon ni tile wolonwulanan loon, o kɔ, a bena saniya. Nga n'a m'a yɛrɛ saniya a tile sabanan loon, ni tile wolonwulanan loon, a tena saniya.

¹³ Ni mɔgɔ o mɔgɔ magara suu la, n'a ma sɔrɔ k'a yɛrɛ saniya, a be ne Masaba ka fanibugu nɔgɔ. O tigi ka kan ka gwɛn ka bɔ Isirayɛlidenw cɛma. Fɛɛn saniyaji ma seriseri a kan minkɛ, a nɔgɔnin lo, a nɔgɔnin bena to.

¹⁴ «Ni mɔgɔ sara fanibugu dɔ kɔnɔ, sariya min be o la, o filɛ. Mɔgɔ o mɔgɔ donna o fanibugu kɔnɔ, ani minw bɛɛ b'a kɔnɔ, olu nɔgɔnin bena to tile wolonwula kɔnɔ.

¹⁵ Datugulan te minan o minan min daa la o fanibugu kɔnɔ, olu bɛɛ nɔgɔnin lo.

¹⁶ Ka mɔgɔ to kongo kɔnɔ, n'a magara suu la min fagara ni murujan ye, walima min sar'a yɛrɛ ma, walima adamaden kolo, walima kaburu la, o tigi nɔgɔnin bena to tile wolonwula kɔnɔ.

¹⁷ Begɛn min tun jɛnina ka kɛ hakɛ yafa saraka ye, u b'o bugurigwɛ dɔ ta k'o don minan dɔ kɔnɔ ka jii ɲanaman kɛ o kan, mɔgɔ nɔgɔnin nin ka saniyako kama.

¹⁸ Mɔgɔ min saniyanin be, ale be *izɔpiyiri furaburu dɔ ta k'a sun jii nin na k'o seriseri fanibugu nin n'a kɔnɔ minanw bɛɛ kan n'a kɔnɔ mɔgɔw bɛɛ kan. Ni mɔgɔ o mɔgɔ magara adamaden kolo la, walima mɔgɔ min magara suu la, walima min sar'a yɛrɛ ma, walima kaburu dɔ la, a ka kan ka jii nin seriseri o tigi fana kan.

¹⁹ Mɔgɔ min saniyanin lo, ale ka jii nin seriseri mɔgɔnɔgɔnin nin kan a tile sabanan loon ni tile wolonwulanan loon. O kɔ, a be mɔgɔ min saniyara, o tigi k'a ka faniw ko k'a yɛrɛ ko. O wulafɛ, a be saniya.

²⁰ Mɔgɔ min nɔgɔnin lo, n'a m'a yɛrɛ saniya, o tigi ka kan ka gwɛn ka bɔ jama cɛma, bari a ye ne Masaba ka sigiyɔrɔ nɔgɔ. Fɛɛn saniyaji ma seriseri a kan minkɛ, o la, a nɔgɔnin lo.

²¹ O ye sariya ye u fɛ min tena dabila fewu. Mɔgɔ min ye fɛɛn saniyaji nin seriseri, o tigi fana k'a ka faniw ko. Ni mɔgɔ o mɔgɔ magara o jii la, o tigi nɔgɔnin bena to fɔɔ wulafɛ.

²² Ni mɔgɔnɔgɔnin magara fɛɛn o fɛɛn la, o be nɔgɔ. Ni mɔgɔ min magara o fɛɛn nin la fana, o tigi fana nɔgɔnin bena to fɔɔ wulafɛ.»