Jateri 14 - ALA KA KUMA

Isirayɛlidenw ka murutiko

¹ O loon sufɛ, jama bɛɛ kulera kosɔbɛ fɔɔ ka dugu gwɛ.

² Isirayɛlidenw bɛɛ ŋunuŋununa Musa ni Arɔn kama, k'a fɔ u ye ko: «Ni an tun sara Ezipiti jamana na, o tun ka fisa! Walima n'an sara kongokolon nin yɛrɛ kɔnɔ, o fana bele ka fisa!

³ Mun na Masaba be tagara n'an ye jamana nin na? U bena an faga ni murujan ye, k'an musow, n'an deenw cɛ ka taga n'u ye. A man fisa an ka segi ka taga Ezipiti wa?»

⁴ U y'a fɔ ɲɔgɔn ye ko: «Aw ye to an ka ɲamɔgɔ sigi an kunna ka kɔsegi Ezipiti.»

⁵ O tuma na, Isirayɛli jama min bɛɛ tun lajɛnnin be o yɔrɔ la, Musa ni Arɔn lara u ɲakɔrɔ k'u ɲaa biri duguma.

⁶ Mɔgɔw minw tun tagara jamana nin yaala, Nun dencɛ Zozuwe ni Yefunɛ dencɛ Kalɛbu tun be olu cɛma. U y'u ka faniw faran faran

⁷ k'a fɔ Isirayɛli jama bɛɛ ye ko: «An tagara jamana min yaala k'a filɛ, a ka ɲi kosɔbɛ.

⁸ N'an koo diyara Masaba ye, a bena bila an ɲa ka don n'an ye a kɔnɔ k'a d'an ma. Nɔnɔ ni lii ka ca a kɔnɔ kosɔbɛ, jamana diman lo.

⁹ Aw kana muruti Masaba ma, aw kana siran jamana nin kɔnɔ mɔgɔw ɲa. An bena se u kɔrɔ, o yɛrɛ tena kɛ baasi ye. Marabaga t'u la tugu, Masaba b'anw fɛ. Aw kana siran u ɲa.»

Musa be yafa daali jama ye

¹⁰ Jama bɛɛ y'a fɔ ko u ka kan ka bon ni kabakuruw ye k'u faga. O waati yɛrɛ la, Masaba y'a ka nɔɔrɔ yira Isirayɛlidenw bɛɛ la Ɲɔgɔnkunbɛn fanibugu kunna.

¹¹ Masaba y'a fɔ Musa ye ko: «Jama nin bena to ka ne mafiɲɛya fɔɔ tuma jumɛn? U bena ban ka la ne la fɔɔ tuma jumɛn? K'a sɔrɔ ne ye kabako caaman kɛ u cɛma.

¹² Ne bena fɔɲɔbana bila u la k'u halaki, nga ne bena siya dɔ wɛrɛ bɔ i la min ka ca n'u ye, n'a barika ka bon n'u ta ye.»

¹³ Musa y'a fɔ Masaba ye ko: «I ye mɔgɔ nunu bɔ Ezipitika minw cɛma ni barika ye, olu do bena o kibaru mɛn,

¹⁴ k'o lakali jamana nin mɔgɔw ye! U y'a mɛn ka ban ko e Masaba be ni anw ye, ko i delila k'i yɛrɛ yira an na, ko i ka sankaba be to an kunna, ko i be bila an ɲa sankaba kɔnɔ tilefɛ, ka bila an ɲa sankaba tasumaman kɔnɔ sufɛ.

¹⁵ N'i ye jama nin faga yɔrɔnin kelen, siya minw ye i ka koo kibaruya mɛn, olu ben'a fɔ ko:

¹⁶ ‹Masaba tun ye layidugwɛlɛn ta ko a bena jamana min di mɔgɔ nunu ma, a tun te se ka don n'u ye o yɔrɔ la, o le kosɔn, a y'u faga kongokolon kɔnɔ.›

¹⁷ Ayiwa, Masaba, ne b'i daali, i k'i ka sebagaya yira i ko i y'a fɔ cogo min na ko:

¹⁸ ‹Masaba te dimi joona, a ka makari ka bon. A be mɔgɔw ka tilenbaliya n'u ka murutili yafa, nga a te kojugukɛla to yen. A be faaw ka tilenbaliya juru sara u deenw na fɔɔ ka se u mamadenw n'u tulomasamaw ma.›

¹⁹ Masaba, i ka ɲumanya kama, ne b'i daali ko i ka mɔgɔ nunu ka tilenbaliyako yafa i n'a fɔ i yafara u ma cogo min na kabini u bɔtuma na Ezipiti fɔɔ ka na se sisan ma.»

Jama ka munumunuko kongokolon kɔnɔ

²⁰ Masaba ye Musa jaabi ko: «Ne yafara u ma i n'a fɔ i y'a daali ne fɛ cogo min na.

²¹ O bɛɛ n'a ta, tiɲɛ lo, ne Masaba be yen, ne ka nɔɔrɔ be dugukolo faan bɛɛ la,

²² mɔgɔ minw ye ne ka sebagaya ni n ka kabako kɛninw ye Ezipiti, ani kongokolon kɔnɔ, olu minw ye ne darabɔ siɲɛ tan, n'u fana ma n ka kuma bato,

²³ olu si tena jamana nin ye, ne ye layidugwɛlɛn ta u bɛmaw ye min koo la ko ne ben'a d'u ma. Mɔgɔ o mɔgɔ ye ne mafiɲɛya, o si ten'a ye fewu.

²⁴ Nga ne ka baarakɛla Kalɛbu ye hakili wɛrɛ sɔrɔ ka ne sago kɛ sɔbɛ la. O le y'a to a tagara jamana min na, ne ben'a to ale be don yen, a be kɛ a kɔmɔgɔw ta ye.

²⁵ Ayiwa, amalɛkiw ni kanaanw do siginin be kɔkɛnɛw na, sini aw ka kɔsegi ka kongokolon kɔnɔ sira minɛ, min be taga Buruku kɔgɔji faan fɛ.»

²⁶ Masaba y'a fɔ Musa ni Arɔn ye ko:

²⁷ «Jama nin ka jugu. U be ŋunuŋununa ne koo la. U bena to k'o kɛ fɔɔ tuma jumɛn? Ne ye Isirayɛliden nunu ŋunuŋunukan mɛn.

²⁸ Aw k'a fɔ u ye ko ne Masaba ko ne be yen. Ko u ye min fɔ ne tulo kɔrɔ, ne bena o le kɛ u la.

²⁹ Minw bɛɛ jatira k'u tɔgɔw sɛbɛn, k'a ta minw sii sera saan mugan ma fɔɔ ka tɛmɛ o kan, olu minw ŋunuŋununa ne kama, u kelen kelen bɛɛ bena sa kongokolon nin kɔnɔ.

³⁰ Ko ne tun ye layidugwɛlɛn ta ko ne bena jamana min kɛ u ka sigiyɔrɔ ye, u si tena don yen fɔɔ Yefunɛ dencɛ Kalɛbu ni Nun dencɛ Zozuwe dɔrɔn.

³¹ Ko u deenw, u y'a fɔ minw koo la ko u juguw bena u minɛ ka taga n'u ye, ne ben'a to olu be don jamana nin na, olu banna min na, u deenw ben'a diya lɔn.

³² Nga olu kɔni bena sa kongokolon nin kɔnɔ.

³³ Ko u deenw bena kɛ begɛnmaralaw ye kongokolon kɔnɔ yan saan bi naani kɔnɔ ka sɛgɛn u ka tilenbaliya kosɔn fɔɔ n'u bɛɛ sara kongokolon kɔnɔ tuma min na.

³⁴ Ko u ye tile bi naani kɛ ka jamana yaala cogo min na, o cogo kelen la, u bena tɔɔrɔ u ka tilenbaliya kosɔn saan bi naani kɔnɔ, saan kelen be kɛɲɛ tile kelen ma. U ben'a lɔn ko ni ne wilila u kama, k'o man di!

³⁵ Ne Masaba ka kuma le ye o ye. Siga t'a la, ne bena o koo nunu bɛɛ kɛ u la, mɔgɔjugu nunu, minw bɛnna ka muruti ne ma. U bɛɛ bena halaki kongokolon nin kɔnɔ, yan bena kɛ u sayɔrɔ ye.»

³⁶ Musa tun ye mɔgɔ minw ci ka taga jamana yaala, n'u kɔsegira ka na kibarujugu fɔ jamana nin koo la, k'a kɛ jama bɛɛ ŋunuŋununa Musa kama,

³⁷ o mɔgɔ nunu, minw tun ye kibarujugu fɔ jamana nin koo la, olu sara banajugu dɔ bolo Masaba ɲakɔrɔ.

³⁸ Mɔgɔ minw tun tagara jamana nin yaala, olu cɛma, Nun dencɛ Zozuwe ni Yefunɛ dencɛ Kalɛbu dɔrɔn le tora nii na.

Jama be muruti Masaba ma tugu

³⁹ Musa ye koo nin lakali Isirayɛlidenw bɛɛ ye tuma min na, u dusu kasira kosɔbɛ.

⁴⁰ O dugusagwɛ sɔgɔma joona, u wilila ka taga kulujanw yɔrɔ faan fɛ. U ko: «An ye hakɛ kɛ. Masaba kumana yɔrɔ min koo la, an bena taga yen.»

⁴¹ Nga Musa ko: «Mun na aw be ban Masaba ka kuma ma? O koo nin tena ɲa!

⁴² Aw kana taga, bari Masaba te n'aw ye. N'aw tagara, aw juguw bena se aw kɔrɔ.

⁴³ Amalɛkiw ni kanaanw b'aw ɲa. U bena aw faga ni murujan ye, bari aw y'aw kɔɔ sin Masaba ma, o la, a tena to ni aw ye.»

⁴⁴ O bɛɛ n'a ta, u ye kungwɛlɛya kɛ ka taga kulujanw yɔrɔ faan fɛ, nga Masaba ka layidu taamasiɲɛ kɛsu ani Musa ma bɔ jama ka sigiyɔrɔ la.

⁴⁵ Amalɛkiw ni Kanaan minw siginin tun be o kuluyɔrɔ la, olu jigira k'u kɛlɛ k'u gwɛn fɔɔ ka taga se Ɔrima.