Jateri 12 - ALA KA KUMA

Miriyama ni Arɔn be Musa kɔrɔfɔ

¹ Miriyama ni Arɔn ye Musa kɔrɔfɔ a muso Etiyopika kosɔn, bari a tun ye Etiyopika dɔ furu.

² U ko: «Masaba kumana Musa kelen le barika la wa? A ma kuma an fana barika la wa?» Masaba y'o mɛn.

³ O y'a sɔrɔ Musa tun ye mɔgɔmajiginin ye ka tɛmɛ mɔgɔw bɛɛ kan dugukolo kan.

⁴ O yɔrɔnin bɛɛ, Masaba y'a fɔ Musa ni Arɔn ani Miriyama ye ko u mɔgɔ saba bɛɛ ka taga Ɲɔgɔnkunbɛn fanibugu daa la. U saba bɛɛ tagara yen.

⁵ Masaba jigira sankaba la ka lɔ soo daa la. A ye Arɔn ni Miriyama wele, u fila gwɛrɛla.

⁶ A ko: «Aw ye ne ka kuma lamɛn. Ni kira dɔ be aw cɛma, ne Masaba be n yɛrɛ yira a la yirali fɛ, ne be kuma a fɛ siko la.

⁷ Nga ne ka baarakɛla Musa ka koo te ten. Kantigi lo koo bɛɛ la ne ka soo kɔnɔ.

⁸ Ne be kuma gwɛnin fɔ ale ye daa ni daa, ne te kuma a fɛ talen na. Ale be ne Masaba cogo ye. Mun na aw ma siran ka ne ka baarakɛla Musa kɔrɔfɔ?»

⁹ Masaba dimina u kɔrɔ kosɔbɛ, a tagara k'u to yen.

¹⁰ Sankaba wilila ka bɔ soo kunna tuma min na, iye! O yɔrɔ nin bɛɛ farisogobana tun bɔra Miriyama la, a fari gwɛnin tun lo parapara. Arɔn y'a ɲaa yɛlɛma ko a b'a filɛ, haya, a y'a ye ko kaba b'a la.

¹¹ A y'a fɔ Musa ye ko: «Ne matigi, ne b'i daali, i ka yafa an ma. An ye nalomanya kɛ ka hakɛ kɛ.

¹² Miriyama kana kɛ i n'a fɔ deen sanin min wolola, n'a farisogo tilancɛ tolinin lo a wolotuma na.»

¹³ Musa kasira Masaba nɔɔ fɛ ko: «Ala, ne b'i daali, i k'a kɛnɛya!»

¹⁴ Masaba ye Musa jaabi ko: «N'a facɛ tun ye daji tu a ɲada kan, a tun tena maloya tile wolonwula kɔnɔ wa? A minɛ k'a bila danna jama ka sigiyɔrɔ kɔfɛ fɔɔ tile wolonwula. O kɔ, a bena se ka segi jama cɛma.»

¹⁵ O la, u ye Miriyama bila a danna jama ka sigiyɔrɔ kɔfɛ tile wolonwula kɔnɔ. Jama ma wili ka bɔ u sigiyɔrɔ la, fɔɔ Miriyama kɔsegira ka don u cɛma tuma min na.

¹⁶ O kɔ, u wilila ka bɔ Aserɔti ka taga sigi Paran kongokolon kɔnɔ.