Jateri 11 - ALA KA KUMA

Tasuma min bɔra Masaba fɛ

¹ Jama wilila ka to ka ŋunuŋunu Masaba tulo kɔrɔ u ka sigɛn kosɔn. Masaba y'o mɛn tuma min na, a dimina. Tasuma bɔr'a fɛ ka jigi u cɛma k'u ka sigiyɔrɔ faan dɔ jɛni.

² Jama kasira Musa kɔ, a ye Masaba daali, tasuma fagara.

³ O la, u y'o yɔrɔ tɔgɔ la ko Tabera, bari tasuma tun bɔra Masaba fɛ ka jigi u cɛma.

Masaba be sogo di jama ma

⁴ Siya wɛrɛ minw tun be Isirayɛlidenw cɛma, miɲɛtɔya gwanna olu la kosɔbɛ. Isirayɛlidenw yɛrɛ fana y'a daminɛ ka kasi tugu k'a fɔ ko: «Jɔn bena sogo d'an ma an b'a ɲimi?

⁵ An tun be jigɛ min ɲimi gwansan Ezipiti jamana na, an hakili b'o la, ani kɔnkɔnburuw, ni melɔnw, ni puwarow, ni jaba, ani layi.

⁶ Sisan an daa bɛɛ cɛnnin lo, an te foyi yera fɔɔ maanɛ dɔrɔn!»

⁷ Maanɛ tun be i n'a fɔ suman dɔ kisɛ, a tun gwɛnin lo.

⁸ Jama tun be yaala k'o cɛ, ka sɔrɔ k'a sin wugu kan, walima k'a susu kolon kɔnɔ, k'a tobi daga kɔnɔ, walima k'a kɛ ŋɔmi ye. A tun ka di i n'a fɔ tulu ye ŋɔmi min labɔ.

⁹ Ni komiji yɛlɛla jama ka sigiyɔrɔ la sufɛ tuma min na, maanɛ fana be jigi.

¹⁰ Musa ye jama kasikan mɛn u ka gwasow la k'u kelen kelen bɛɛ to u ka fanibuguw daa la. Masaba dimina kosɔbɛ, Musa hakili ɲagamina.

¹¹ A y'a fɔ Masaba ye ko: «Mun na e b'i ka baarakɛla tɔɔrɔ? Ne ye mun kɛ fɔɔ ne koo goyara i ye, i ye mɔgɔ nunu bɛɛ ka doni la ne kan?

¹² Ne le ye mɔgɔ nunu bɛɛ kɔnɔ ta wa? Ne le y'u wolo wa? N'i b'a fɔ ne ye ko ne k'u ta i n'a fɔ deen minɛbaga be deen ta cogo min na wa? I ye layidugwɛlɛn ta an bɛmaw ye jamana min koo la ko i bena o d'u ma, i ko ne ka taga n'u ye o yɔrɔ la wa?

¹³ Ne be se ka sogo sɔrɔ min k'a di mɔgɔ nunu bɛɛ ma? U be to ka kasi ne kɔrɔ ko ne ka sogo d'u ma u k'a ɲimi.

¹⁴ Ne kelen te se u bɛɛ kɔrɔ, o doni ka gwili ne ma.

¹⁵ San'i k'o bɛɛ la ne kan, ni ne koo diyara i ye, i ka ne faga janko ne kana sɛgɛn tugu.»

¹⁶ Masaba y'a fɔ Musa ye ko: «I be Isirayɛli cɛkɔrɔba minw lɔn, ko u ye jama ɲamɔgɔw ye, mɔgɔw be minw jati, i ka olu mɔgɔ bi wolonwula woloma k'u lajɛn ne ɲakɔrɔ. E ni olu ka na lɔ ɲɔgɔn fɛ Ɲɔgɔnkunbɛn fanibugu daa la.

¹⁷ Ne bena jigi ka kuma i fɛ o yɔrɔ la. See min b'i fɛ, ne bena o ɲɔgɔn di u ma. U bena i dɛmɛ ka mɔgɔ nunu ka doni ta, janko i kana o ta i kelen.

¹⁸ A fɔ jama ye ko: ‹Aw k'aw yɛrɛ labɛn yanni sini ka Masaba kunbɛn, aw bena sogo ɲimi. Bari Masaba ye aw kasikan mɛn, tuma min na aw tun ko jɔn bena sogo di aw ma, aw k'a ɲimi. Ko aw tun be hɛrɛ la Ezipiti jamana na. O la, Masaba bena sogo di aw ma, aw ben'a ɲimi.

¹⁹ Aw ben'a ɲimi, tile kelen koo tɛ, tile fila koo tɛ, tile duuru koo tɛ, tile tan koo tɛ, tile mugan fana koo tɛ.

²⁰ Aw ben'a ɲimi fɔɔ kalo kelen kuturu, fɔɔ a kasa be bɔ aw nuun la, fɔɔ a bena fɔɔnɔ nigɛ don aw la bari Masaba min be aw cɛma, aw banna ale la ka kasi a ɲakɔrɔ ko mun na aw bɔra Ezipiti.› »

²¹ Musa ko: «Ne be mɔgɔ minw cɛma, olu ye cɛɛ waa kɛmɛ wɔɔrɔ (600 000) le ye. E ko i bena sogo d'u ma, ko u ben'a ɲimi fɔɔ kalo kelen kuturu!

²² Hali n'an ye an ka begɛnw bɛɛ faga u ye, o bena u bɔ wa? Walima ni mɔgɔ tun sera ka kɔgɔji kɔnɔ jigɛw bɛɛ minɛ, o bena u bɔ wa?»

²³ Masaba ye Musa jaabi ko: «Yala, see te ne ye wa? Sisan i ben'a ye, ne ye min fɔ, n'a bena kɛ, walima n'a tena kɛ.»

²⁴ Musa bɔra yen ka taga Masaba ka kuma fɔ jama ye. A ye cɛkɔrɔba bi wolonwula lajɛn ka bɔ jama cɛma, ka na u lɔ ka fanibugu lamini.

²⁵ O kɔ, Masaba jigira sankaba la ka kuma a fɛ. See min tun be Musa fɛ, Masaba y'o ɲɔgɔn di cɛkɔrɔba bi wolonwula nunu ma. Ala ka Nii jigira u kan tuma min na dɔrɔn, u ye kiraya kɛ, nga o kɔ, u ma o kɛ tugu.

²⁶ Cɛɛ fila tun tora jama ka sigiyɔrɔ la, kelen tɔgɔ ko Ɛlidadi, kelen tɔgɔ ko Medadi. Olu niin tun be cɛkɔrɔba nunu na, nga u ma taga fanibugu daa la. O n'a ta bɛɛ, Ala Nii jigira u kan fana, u ye kiraya kɛ k'u to jama ka sigiyɔrɔ la.

²⁷ Kanbelen dɔ bolila ka ta'a fɔ Musa ye ko: «Ɛlidadi ni Medadi be kiraya kɛra jama ka sigiyɔrɔ la.»

²⁸ Nun dencɛ Zozuwe, min tun ye Musa dɛmɛbaga ye kabini a denmisɛnman, ale ye kuma ta k'a fɔ ko: «Ne matigi Musa, a fɔ ko u k'o dabila!»

²⁹ Musa y'a jaabi ko: «Keliya b'i la ne kosɔn wa? Ala m'a kɛra, Masaba ka mɔgɔw bɛɛ ka kɛ kiraw ye, Masaba k'a ka Nii don u bɛɛ la!»

³⁰ O kɔ, Musa ni Isirayɛli cɛkɔrɔbaw bɔra yen ka kɔsegi jama ka sigiyɔrɔ la.

Ala be kɔnɔw ci

³¹ Masaba y'a kɛ fɔɲɔba wilila ka bɔ kɔgɔji faan fɛ, ka na ni tukɔnɔwɔlɔnw ye. U nana benben ka jama ka sigiyɔrɔ lamini faan bɛɛ la fɔɔ ka taga se mɔgɔ ka tile kelen taama jaɲa ma. U lalanin ɲɔgɔn kan wilila ka se mɛtɛrɛ kelen ɲɔgɔn ma.

³² Jama wilila ka taga tukɔnɔwɔlɔn nunu cɛ o tile bɛɛ kɔnɔ, ani o suu bɛɛ kɔnɔ, ani o dugusagwɛ fana, ka suu ko a la tugu. Mɔgɔ min ka sɔrɔta ma se sinsin ɲaa bi wɔɔrɔ ɲɔgɔn ma, o tigi tun te yen. U y'u lala k'u ka sigiyɔrɔ lamini faan bɛɛ.

³³ Nga ka sogo nin to u daa la, sanni u ka se k'a ɲimi, Masaba dimina u kɔrɔ kosɔbɛ, a ye banajugu bila u la.

³⁴ O la, u y'o yɔrɔ tɔgɔ la ko Wasabaliya kaburu, bari miɲɛtɔya tun gwanna mɔgɔ minw na, u ye olu suuw don yen.

³⁵ Jama wilila ka bɔ Wasabaliya kaburu yɔrɔ la ka taga sigi Aserɔti.