Jakariya 5 - ALA KA KUMA

Sɛbɛ dɔ

¹ Ne ye n ɲaa kɔrɔta tugu, ne ye fɛɛn dɔ ye. Sɛbɛ tun lo, a tun be sanfɛ i n'a fɔ kɔnɔ!

² Mɛlɛkɛ ko ne ma: «I ɲaa be mun le la?» Ne y'a jaabi ko: «Ne ɲaa be sɛbɛ dɔ la min be tɛmɛna sanfɛ, a jaɲa ye mɛtɛrɛ tan ye, a kɔnɔ boɲa ye mɛtɛrɛ duuru ye.»

³ O kɔ, a y'a fɔ ne ye ko: «Danga lo, min bena se jamana bɛɛ ma. Sɛbɛ nin ɲaa kelen kɔrɔ ko soonw bɛɛ bena gwɛn, kelen fana kɔrɔ ko minw be kali ka galon tigɛ, olu bɛɛ bena gwɛn.»

⁴ Masaba, Setigi ko ale ye danga nin ci, waasa a ka don soonw fɛ, ani mɔgɔ minw be kali ne tɔgɔ la ka galon tigɛ. Ko a bena to u ka soo, k'a bɛɛ halaki, hali a kabakuruw n'a lɔgɔw bɛɛ.

Sinsin dɔ

⁵ Mɛlɛkɛ min tun be to ka kuma ni ne ye, ale gwɛrɛla k'a fɔ ne ye ko: «I ɲaa kɔrɔta ka fɛɛn dɔ natɔ filɛ.»

⁶ Ne ko: «O ye mun ye?» A ko: «Sinsin lo. Jama ka hakɛ lo jamana kɔnɔ yɔrɔ bɛɛ.»

⁷ Sinsin nin nigɛdatugulan yɛlɛla, muso dɔ tun siginin b'a kɔnɔ!

⁸ Mɛlɛkɛ ko: «Juguya lo.» A y'a ɲɔti ka jigi a kɔnɔ ka datugulan nin biri a daa la.

⁹ O kɔ, ne ye n ɲaa kɔrɔta, ne ye koo dɔ ye. Muso fila lo minw be nana i n'a fɔ kɔnɔw, fɔɲɔ tun be fiyɛra u gamanw na! U gamanw tun be i n'a fɔ badalakɔnɔ sifa dɔ gamanw. U nana sinsin nin ta ka yɛlɛ n'a ye sanfɛ.

¹⁰ Ne ye mɛlɛkɛ nin ɲininga ko: «U be tagara ni sinsin nin ye min?»

¹¹ A ye n jaabi ko: «U be tagara n'a ye Babilɔni jamana na. U bena batoyɔrɔ lɔ a ye, ka tutunan lɔ yen, k'a bila a kan.»