Jakariya 2 - ALA KA KUMA

Gɔɔnw ni numuw

¹ Ne ye n ɲaa kɔrɔta, ne ye fɛɛn dɔ ye. Gɔɔn naani tun lo.

² Mɛlɛkɛ min tun be kumana ni ne ye, ne ye ale ɲininga ko: «Gɔɔn nunu kɔrɔ ye mun ye?» A ye ne jaabi ko: «Olu ye siya barikamanw ye, minw ye Zuda mara mɔgɔw ni Isirayɛli mara mɔgɔw, ani Zeruzalɛmukaw yɛrɛkɛ.»

³ O kɔ, Masaba ye numucɛ naani yira ne la.

⁴ Ne y'a ɲininga ko: «Nunu be nana mun le kɛ?» A ye ne jaabi ko: «Gɔɔn nunu le ye Zuda mara mɔgɔw yɛrɛkɛ fɔɔ hali mɔgɔ kelen te se k'a kuun kɔrɔta. Numu nunu nana janko k'u jaa tigɛ, ka siya nunu ka gɔɔnw halaki, u tun ye sebagaya min kɛ ka Zuda mara kɛlɛ k'u yɛrɛkɛ.»

Jurukisɛ

⁵ Ne ye n ɲaa kɔrɔta, ne ye koo dɔ ye tugu. Cɛɛ dɔ lo ni sumanikɛjuru b'a bolo.

⁶ Ne y'a ɲininga ko: «I be tagara min?» A ye ne jaabi ko: «Ne be tagara Zeruzalɛmu dugu suma, k'a kɔnɔ boɲa n'a jaɲa lɔn.»

⁷ Mɛlɛkɛ min tun be to ka kuma ni ne ye, ale gwɛrɛla, o y'a sɔrɔ mɛlɛkɛ wɛrɛ fana tun b'ale kunbɛnna.

⁸ A y'a fɔ a ye ko: «Boli ka ta'a fɔ kanbelen nin ye ko: ‹Kogo man kan ka Zeruzalɛmu lamini, bari a bena kɛ jamaba, ni begɛn caaman ka yɔrɔ ye.

⁹ Ne yɛrɛ bena kɛ yen. Ne bena kɛ tasuma ye k'a lamini i ko kogo. Ne bena kɛ a ka boɲa sababu ye.› » Masaba le ko ten.

Babilɔni sigibagaw bena kɔsegi

¹⁰ «Aw ye bɔ! Aw ye bɔ! Aw ye boli ka bɔ kɔgɔdugu ɲafan jamanaw kɔnɔ!» Masaba le ko ten. «Bari, ne le tun y'aw yɛrɛkɛ ka taga dugukolo faan bɛɛ la.» Masaba le ko ten.

¹¹ «*Siyɔnkaw, aw minw siginin be Babilɔni, aw ye bɔ!»

¹² Masaba, Setigi, min ye ne ci ni dalilu ye siyaw kama, minw tun benna aw kan, a ko: «Mɔgɔ o mɔgɔ mana maga aw la, a be kɛ i n'a fɔ o tigi magara ne ɲaden le la.

¹³ Ne bena wili u kama tigitigi, waasa u ka jɔɔnw k'u ka nafolo cɛ.» O tuma na, aw ben'a lɔn ko Masaba, Setigi le ye ne ci.

¹⁴ Masaba ko: «Aw ye nisɔndiyakan bɔ Siyɔnkaw, bari, ne be nana to n'aw ye.

¹⁵ O loon na, siya caaman bena sɔn ne Masaba ma. U bena kɛ n ka mɔgɔw ye tigitigi. Ne bena to aw cɛma.» O la, aw ben'a lɔn ko Masaba, Setigi le ye ne ci aw fɛ.

¹⁶ Masaba bena Zuda kɛ a ta ye, jamana senuman nin na. A bena na Zeruzalɛmu woloma tugu.

¹⁷ Mɔgɔw bɛɛ ka je Masaba ɲafɛ. Bari, a be wilila ka bɔ a ka yɔrɔ senuman na.