Jakariya 12 - ALA KA KUMA

Zeruzalɛmu dugu tangako

¹ Masaba ye min fɔ Isirayɛli kosɔn, o filɛ nin ye. Masaba ka kuma lo. Ale min ye sankolo ni dugukolo dan, ani ka nii don adamadenw na, a ko:

² «Ne bena Zeruzalɛmu kɛ a gɛrɛfɛsiyaw bɛɛ tɔɔrɔfɛn ye. Ni Zeruzalɛmu minɛna tuma min na, Zuda mara bena kɛ o cogo kelen na.

³ O loon na, ne bena Zeruzalɛmu bila siyaw bɛɛ ɲafɛ i n'a fɔ kabakuruba, min te se ka kɔrɔta. Ni min ko a b'a kɔrɔta, o tigi b'a yɛrɛ mandimi. O la, siyaw bɛɛ bena jɛn ale kelen kama.

⁴ O tuma na, ne bena siranyaba bila u ka soow bɛɛ la, k'a kɛ u yɛlɛbagaw kuun be wili. Ne Masaba le ko ten. Ne bena Zuda mara mɔgɔw filɛ ka janto u la, nga n bena siya wɛrɛw ka soow bɛɛ kɛ fiɲɛntɔw ye.

⁵ Zuda mara ɲamɔgɔw ben'a fɔ u yɛrɛ kɔnɔ ko: ‹Zeruzalɛmukaw ka fanga bɔyɔrɔ ye Masaba ye, Setigi, u ka Ala.›

⁶ O loon na, ne bena Zuda mara ɲamɔgɔw kɛ i n'a fɔ takami, lɔgɔ cɛma, k'a kɛ i n'a fɔ kala mananinw, suman juuw cɛma. Siya minw b'u lamini na u kinibolo n'u numanbolo la, u bena olu bɛɛ jɛni. Nga Zeruzalɛmu be to a nɔɔ na yen.

⁷ «Masaba bena kɔn ka Zuda mara le kisi fɔlɔ, waasa Dawuda ka somɔgɔw, ni Zeruzalɛmukaw kana boɲa sɔrɔ ka tɛmɛ u ta kan.

⁸ O loon na, ne Masaba bena Zeruzalɛmukaw tanga. Mɔgɔ min barika ka dɔgɔ u bɛɛ la, o loon na, ale bena fanga sɔrɔ i n'a fɔ Dawuda. Dawuda ka soo bena kɛ i n'a fɔ Ala, i ko Masaba ka Mɛlɛkɛ u ɲafɛ.

Jamana bɛɛ ka dusukasi

⁹ «O loon na, ne Masaba bena jija ka siya wɛrɛw bɛɛ halaki, minw tun wilila Zeruzalɛmu kama.

¹⁰ Ne bena miiriyaɲuman, ani Aladali hakili don Dawuda ka somɔgɔw ni Zeruzalɛmukaw la. U ye mɔgɔ min sɔgɔ, u bena ale filɛ, ka kasi a ka saya la i n'a fɔ mɔgɔ be kasi a deen kelen saya la cogo min na. U bena kasi kosɔbɛ i n'a fɔ mɔgɔ be kasi a dencɛ fɔlɔ ka saya la cogo min na.

¹¹ O loon na, Zeruzalɛmu ka dusukasi bena boɲa i n'a fɔ Adadirimɔn ta, Megido kɔkɛnɛ la.

¹² Jamanadenw bena kasi. Dawuda ka fadenyabolow cɛmanw ni musomanw b'u ta kɛ danna danna. Natan ka fadenyabolow cɛmanw ni musomanw b'u ta kɛ danna danna.

¹³ Levi ka fadenyabolow cɛmanw ni musomanw b'u ta kɛ danna danna. Simeyi ka fadenyabolow cɛmanw ni musomanw b'u ta kɛ danna danna.

¹⁴ Tɔw bɛɛka fadenyabolow, cɛmanw ni musomanw b'u ta kɛ danna danna.