Heburuw 3 - ALA KA KUMA

Krista lɔyɔrɔ ka bon ni Musa ta ye

¹ O kosɔn, n badenw, Ala ye aw minw wele k'aw kɛ a taw ye, aw ka Yezu filɛ, min ye Ala ka ciden, ni sarakalasebagaw kuntigiba ye Ala ka sira la an be min koo fɔ.

² Yezu kɛra kantigi ye Ala ɲakɔrɔ a ka baara bɛɛ la i n'a fɔ Musa tun kɛra kantigi ye a ka baara bɛɛ la Ala ka soo kɔnɔ cogo min na.

³ Bonlɔbaga be tɔgɔ sɔrɔ ka tɛmɛ a ka boon lɔnin kan cogo min na, o cogo kelen na, Yezu lɔyɔrɔ ka bon ni Musa ta ye.

⁴ Ayiwa, boon bɛɛ n'a lɔbaga lo, nga fɛɛn bɛɛ lajɛnnin danbaga ye Ala le ye.

⁵ Musa kɔni kɛra baarakɛla kantigi ye koo bɛɛ la Ala ka soo kɔnɔ. Ala ka dalaminɛ tun lo. Nga Krista min ye Ala Dencɛ ye, ale kɛra kantigi ye Ala ka soo kunna.

⁶ An y'an jigi la fɛɛn min kan, n'an y'an jaa gwɛlɛya ka la o la kosɔbɛ, anw be kɛ a ka somɔgɔw ye.

Ala ka hɛrɛ sɔrɔko

⁷ O kama, Nii Senuman y'a fɔ ko: «N'aw y'a kaan mɛn bii,

⁸ aw kana aw dusu gwɛlɛya i ko muruti waati la, kɔrɔbɔlilon na kongokolon kɔnɔ.

⁹ O yɔrɔ la, aw faaw murutira ne Ala ma ka n kɔrɔbɔ. K'a sɔrɔ ne ye koo min bɛɛ kɛ saan bi naani kɔnɔ, u y'o ye.

¹⁰ O le y'a to ne dimina u kɔrɔ, n y'a fɔ ko nunu kɔni be to fili la tuma bɛɛ, u ma ne ka sira lɔn fɔlɔ.

¹¹ Dimikojugu fɛ, ne y'a fɔ k'a gwɛlɛya ko u tena sɔrɔ ka don n ka lafiɲɛyɔrɔ la.»

¹² O tuma na n badenw, aw bɛɛ k'aw yɛrɛ minɛ aw si kana kɛ mɔgɔjugu ye, lanabaliya kan'a kɛ aw be ban Nitigi Ala la.

¹³ Nga aw ka ɲɔgɔn ladi loon o loon hali n'o ka kan ka kɛ waatijan koo ye, min be fɔ ko bii, janko hakɛ kana mɔgɔ si bila tulogwɛlɛya la.

¹⁴ An daminɛna ni jigi min ye, n'an tora o kan fɔɔ a daan na, o tuma na, an ye Krista taamaɲɔgɔnw ye.

¹⁵ A fɔra Ala ka kuma na ko: «N'aw ye Ala kumakan mɛn bii, aw kana aw dusu gwɛlɛya i ko aw faaw murutira Ala ma cogo min na.»

¹⁶ Mɔgɔ jumɛnw le ye Ala kumakan mɛn ka muruti? Musa bɔra ni minw bɛɛ ye Ezipiti jamana na, olu lo.

¹⁷ Ala dimina jɔnw le kɔrɔ saan bi naani kɔnɔ? Minw ye hakɛ kɛ n'u suuw tora kongokolon kɔnɔ, olu lo.

¹⁸ A ko jɔnw le tena don ale ka yɔrɔ labɛnnin na ka lafiɲɛ? Olu mɔgɔmurutininw tɛ wa?

¹⁹ O la, an b'a yera fana k'u ka lanabaliya kosɔn, u ma se ka don.