Ɛsidarasi 9 - ALA KA KUMA

Zuwifuw ka jurumu

¹ Koo nunu kɛra ka ban tuma min na, ɲamɔgɔw gwɛrɛla ne la k'a fɔ ko: «Isirayɛlidenw n'u ka sarakalasebagaw ni Levi kɔmɔgɔ tɔw ma faran ka bɔ jamana nin kɔnɔ siyaw la. U fana ma u ka nɔgɔtɔkow dabila, kanaanw ta ni itiw ta, ni periziw ani zebuziw ni amoniw ni mowabuw, ani Ezipitikaw ni amoriw ta.

² U n'u dencɛw y'o siya nunu denmusow furu. U ye siya saniyanin nin ɲagami ni jamana nin kɔnɔ siyaw ye. U ɲamɔgɔw ni kititigɛlaw, le kɔnna k'o ɲagamini kɛ.»

³ Ne y'o mɛn tuma min na, n ye n ka faniw ni n ka foroca faran faran, ka n kunsigi ni n bonbosiw bɔnbɔn, n hakili ɲagaminin sigira.

⁴ Mɔgɔ minw bɛɛ be siran Isirayɛli ka Ala ka kiti ɲa, olu nana ɲɔgɔn lajɛn ne gɛrɛfɛ, Isirayɛliden minw bɔra jɔnya la ka na, olu ka kojugu kosɔn. Ne hakili ɲagaminin sigira fɔɔ ka taga se wulafɛ saraka bɔwaati ma.

Ɛsidirasi be Ala daali

⁵ Wulafɛ saraka bɔwaati sera, ne wilila ka bɔ n ka makariko la, ni n ka fani ni n ka foroca farannin ye ka n kunbiri gwan duguma, ka n bolo kɔrɔta sanfɛ Masaba n ka Ala faan fɛ.

⁶ N y'a fɔ a ye ko: «Ne ka Ala, maloya fɛ, ne kuun surunna! Ne te se ka n ɲaa kɔrɔta k'i filɛ, ne ka Ala, bari an ka kojuguw n'an ka filiw cayara an kunna fɔɔ ka taga se sankolo la.

⁷ Kabini an faaw ka tile la, an kɛra kojugukɛlabaw ye fɔɔ ka na se bii ma. O le kosɔn anw, ni an ka masaw, ni an ka sarakalasebagaw donna siya wɛrɛw ka masaw bolo, n'u b'an faga ni murujan ye, k'an minɛ ka taga an kɛ jɔɔnw ye, k'an bololafɛnw ta, k'an maloya fɔɔ ka na se bii ma.

⁸ Nga Masaba an ka Ala, i makarila an na k'an dɔw kisi, a ma mɛn, ani ka sigiyɔrɔ d'an ma i ka yɔrɔɲuman na. K'an to an ka jɔnya la, i ye hɛrɛ kɛ an ye k'an nisɔn diya.

⁹ An kɛra jɔɔnw ye, nga an ka Ala tora n'an ye o jɔnya la. A y'an koo diya Pɛrɛsi masacɛw ye, janko an ka se k'an yɛrɛ sɔrɔ, k'an ka Ala ka soo lɔ, k'a lalaga, ani ka se ka sigiyɔrɔ ɲanaman sɔrɔ Zeruzalɛmu, ani Zuda mara la.

¹⁰ An ka Ala, sisan an be se ka mun le fɔ tugu sa? Bari an m'i ka fɔta bato,

¹¹ e tun ye min fɔ an ye n'i ka baarakɛlaw, kiraw y'a fɔ ko: An bena don jamana min kɔnɔ k'a minɛ k'a kɛ an yɛrɛ ta ye, o jamana nin nɔgɔnin lo, a kɔnɔ mɔgɔw ka kakalaya baara kosɔn. U ye konɔgɔninw kɛ jamana nin yɔrɔ bɛɛ la.

¹² I ko an kana an denmusow d'u deenw ma, an kana sɔn an dencɛw k'u ka denmusow furu fana. Koo o koo mana kɛ u ka hɛrɛko ye, an kana sɔn o la fewu! O la, an bena barika sɔrɔ, ka jamana nin tɔnɔ dumu, ani k'a to an kɔmɔgɔw ye cɛɛn na kudayi.

¹³ Koo nunu bɛɛ sera an ma an ka kojugu caaman kosɔn min b'an kunna. O bɛɛ n'a ta, an ka Ala, i ma sɔn k'an jalaki ka kɛɲɛ n'o bɛɛ ye, i ye dɔ to o la, an tɔɔ kisira ka kɔsegi yan.

¹⁴ An bena to k'i ka sariyaw cɛn halibi tugu wa? Ka to ka nɔrɔ siya nɔgɔnin nunu na furu la wa? E tena na dimi an kɔrɔ fɔɔ k'an bɛɛ halaki, hali an tɔɔ yɛrɛ tena to wa?

¹⁵ Masaba, Isirayɛli ka Ala, e le tilennin be, anw le ye an ka siya tɔɔ ye bii. Anw filɛ nin ye i ɲakɔrɔ, n'an ka kojuguw ye. Mɔgɔ si do te se ka lɔ ten i ɲakɔrɔ.»