Ɛsidarasi 8 - ALA KA KUMA

Ɛsidirasi taamaɲɔgɔnw

¹ Gwatigi minw bɔra ni ne ye Babilɔni, masacɛ Aritasɛrisɛsi ka tile la, olu tɔgɔ filɛ nin ye, ka kɛɲɛ n'u ka buruju ye:

² Pinasi kɔmɔgɔw la, o ye Gɛrisɔmu ye, Itamari kɔmɔgɔw la, o ye Daniyɛli ye, Dawuda kɔmɔgɔw la, o ye Atusi ye,

³ Sekaniya kɔmɔgɔw la ni Parewɔsi kɔmɔgɔw la, Zakari, mɔgɔ kɛmɛ ni bi duuru tɔgɔw le sɔrɔla ka sɛbɛn ka fara ale kan.

⁴ Paati Mowabu kɔmɔgɔw la, Zeraya dencɛ Eliyoyenayi, ni mɔgɔ kɛmɛ fila minw tun tugura ale kɔ,

⁵ Sekaniya kɔmɔgɔw la, Yaaziyɛli dencɛ, mɔgɔ kɛmɛ saba tun be ni ale ye.

⁶ Adin kɔmɔgɔw la, Yonatan deen Ebɛdi, mɔgɔ bi duuru tun be n'ale ye.

⁷ Elamu kɔmɔgɔw la, Ataliya dencɛ Yesaya, mɔgɔ bi wolonwula le tun be n'o ye.

⁸ Sefatiya kɔmɔgɔw la, Mikayɛli dencɛ Zebadiya, mɔgɔ bi seegi le tun tugura ale kɔ.

⁹ Yowabu kɔmɔgɔw la, o ye Yeyɛli dencɛ Obadiya ye, mɔgɔ kɛmɛ fila ni tan ni seegi le tun be n'a ye.

¹⁰ Selomiti kɔmɔgɔw la, Yozifiya deen, mɔgɔ kɛmɛ ni bi wɔɔrɔ le tun be ni ale ye.

¹¹ Bebayi kɔmɔgɔw la, o ye Bebayi deen Zakari ye, mɔgɔ mugan ni seegi tun be n'ale ye.

¹² Azigadi kɔmɔgɔw la, o ye Akatan deen Yowanan ye, mɔgɔ kɛmɛ ni tan le tun be n'a ye.

¹³ Adonikamu kɔmɔgɔw, minw kɛra u bɛɛ kɔfɛ mɔgɔw ye, olu tɔgɔ filɛ nin ye: Elifɛlɛti, Yeyɛli ani Semaya, mɔgɔ bi wɔɔrɔ tun be ni olu ye.

¹⁴ Bigibayi kɔmɔgɔw la, o ye Utayi ni Zabudi ye, mɔgɔ bi wolonwula tun be ni olu ye.

Ɛsidirasi b'a ka taga labɛnna

¹⁵ Ne y'u bɛɛ lajɛn Ahawa baa daa la. An tora o yɔrɔ la fɔɔ tile saba. Ne ye jama ni sarakalasebagaw kɔlɔsi, n ma Levi kɔmɔgɔ tɔw si ye u cɛma.

¹⁶ O la, ne ye ɲamɔgɔ Eliyezɛri ni Ariyɛli, ni Semaya, ni Ɛlinatan ani Yaribu ni Ɛlinatan ni Natan ni Zakari ni Mesulamu wele, ani kalanfa Yoyaribu ni Ɛlinatan,

¹⁷ k'u ci Ido fɛ min ye Kazifiya mara ɲamɔgɔ ye. U tun ka kan ka min fɔ Ido n'a balimaw ye, minw tun ye Ala ka soo kɔnɔ baarakɛlaw ye n'u siginin be Kazifiya mara la, janko u be mɔgɔ dɔw di, minw bena to ka baara kɛ an ka Ala ka soo kɔnɔ. N y'o kuma bɛɛ fɔ u ye.

¹⁸ An ka Ala tun be n'an ye minkɛ, u nana ni Serebiya ye, min ye mɔgɔ hakiliman ye Mali kɔmɔgɔw cɛma min tun ye Isirayɛliden Levi deen ye. U nana n'a dencɛw n'a balimaw ye fana. Olu bɛɛ lajɛnnin kɛra mɔgɔ tan ni seegi,

¹⁹ ani Asabiya. Merari deenw cɛma, Yesaya n'a balimaw n'u deenw fana nana ni Asabiya ye, olu bɛɛ lajɛnnin kɛra mɔgɔ mugan.

²⁰ Dawuda ni ɲamɔgɔw tun ye mɔgɔ minw woloma k'olu kɛ baarakɛlaw ye k'u ka Levi kɔmɔgɔw dɛmɛ, u nana ni olu mɔgɔ kɛmɛ fila ni mugan ye fana. U bɛɛ tɔgɔ tun sɛbɛnna.

²¹ K'an to Ahawa baa daa la, ne y'a latigɛ ko an ka suun don janko k'an yɛrɛ majigi an ka Ala ɲakɔrɔ, k'a daali a k'an ka taama nɔgɔya an bolo, an n'an deenw n'an ka nafolo.

²² Ni ne tun ye masacɛ daali ko a ka kɛlɛden dɔw fara an kan soow be minw fɛ, olu k'an kɔlɔsi juguw kama sira la, o tun bena kɛ maloya ye ne ma, bari an tun y'a fɔ a ye ka ban ko mɔgɔ minw be an ka Ala fɛ, ko a be olu bɛɛ dɛmɛ, nga minw be ban a la, a be dimi olu kɔrɔ kosɔbɛ.

²³ O le y'a to an ye suun don k'an ka Ala daali koo nin na, a fana y'an jaabi.

²⁴ O kɔ, n tun ye sarakalasebagaw kuntigiw mɔgɔ tan ni fila woloma, ani Serebiya ni Asabiya ani u baden mɔgɔ tan.

²⁵ Masacɛ n'a ladibagaw ani a ka ɲamɔgɔw ni Isirayɛliden minw bɛɛ tun be yen, olu tun ye sanu ni warigwɛ ani fɛɛn wɛrɛ minw di an ka Ala ka soo kama, ne y'o bɛɛ suma u ɲana.

²⁶ N ye warigwɛ tɔni mugan le suma k'o don u bolo, ani minan minw dilanna ni warigwɛ ye, o tɔni saba, ni sanu tɔni saba,

²⁷ ani filen sanulaman mugan, minw hakɛ be se sanukuru waa kelen ma, ni daga fila minw dilanna ni zira ye min baarala ka ɲa, ale fana sɔngɔ ka gwɛlɛ i n'a fɔ sanu ta.

²⁸ O kɔ, n y'a fɔ u ye k'olu ni minan nunu kɛra Masaba ta ye. Warigwɛ ni sanu nunu, mɔgɔw le y'u di ka Masaba, an faaw ka Ala boɲa.

²⁹ K'u k'o kɔlɔsi ka ɲa kosɔbɛ, fɔɔ ka taga se n'u ye Zeruzalɛmu, Masaba ka soo kɔnɔ, k'o suma sarakalasebagaw kuntigiw ni Levi kɔmɔgɔ tɔw, ani Isirayɛlidenw ka gwatigiw ɲana.

³⁰ Warigwɛ, ni sanu, ani minan minw tun sumana, sarakalasebagaw ni Levi kɔmɔgɔw ye olu ta, janko ka taga n'u ye an ka Ala ka soo kɔnɔ Zeruzalɛmu.

Cidenw be se Zeruzalɛmu

³¹ Saan kalo fɔlɔ tile tan ni filanan loon, an wilila Ahawa baa daa la ka Zeruzalɛmu sira ta. An ka Ala tora n'an ye sira kan k'an mara, k'an tanga an juguw ni benkannikɛlaw ma.

³² An sera Zeruzalɛmu ka lafiɲɛ tile saba.

³³ Tile naaninan loon, an tun ye sanu ni warigwɛ ni minan minw suma k'o don Uriya dencɛ sarakalasebaga Meremɔti bolo, an ka Ala ka soo kɔnɔ. Pinasi dencɛ Eleyazari ni Levi kɔmɔgɔ Yesuwa dencɛ Yozabadi ani Levi kɔmɔgɔ Binuwi dencɛ Nowadiya, olu tun be n'u ye.

³⁴ An y'u bɛɛ filɛ, a bɛɛ dafara, o kɔ, an y'o gwiliya daa sɛbɛn sɛbɛ dɔ kɔnɔ.

³⁵ Mɔgɔ minw bɔra jɔnya la ka na, olu ye saraka jɛnita bɔ Isirayɛli ka Ala ye. U ye tura tan ni fila bɔ saraka ye u ka siya bɛɛ kosɔn, ani sagajigi bi kɔnɔntɔn ni wɔɔrɔ, ni sagaden bi wolonwula ni wolonwula, ka bakɔrɔnin tan ni fila bɔ saraka ye u ka hakɛ yafa kosɔn. U y'o bɛɛ bɔ saraka jɛnita ye Masaba ma.

³⁶ U ye masacɛ ka cii d'a ka marakuntigiw, n'a ka lasigidenw ma, minw be baji kɔfɛ, olu ye jama dɛmɛ Ala ka soo lɔko la.