Ɛsidarasi 5 - ALA KA KUMA

Zuwifuw be Alabatoso lɔ tugu

¹ O waati la, Isirayɛli ka Ala y'a ka kira Aze, ni Ido dencɛ kira Zakari ci ka kuma zuwifuw fɛ minw tun be Zuda mara la, ani Zeruzalɛmu.

² O la, Salatiyɛli dencɛ Zorobabɛli ni Yozadaki dencɛ Zozuwe wilila ka Ala ka soo lɔbaara daminɛ Zeruzalɛmu. Ala ka kiraw tun tora n'u ye o baara la fana k'u dɛmɛ.

³ O waati la, masacɛ ka lasigiden Tatinayi min tun be Efarati baji kɔfɛ mara kunna, ale ni Setari Bozinayi, ani u tɔɲɔgɔnw wilila ka na u fɛ k'u ɲininga ko: «Jɔn le ye sira di aw ma ko aw ka soo nin n'a laminikogow lɔ?

⁴ Jɔn ni jɔnw le be baara nin kɛra?»

⁵ Nga Ala ye zuwifuw ka cɛkɔrɔbaw dɛmɛ, u ma baara lɔ. U y'o kibaru ci Dariyusi ma fɔlɔ, ka kɔnɔni kɛ fɔɔ o kɔsegi ka na.

U be zuwifuw jalaki Dariyusi ye

⁶ Masacɛ ka lasigiden Tatinayi min be Efarati baji kɔfɛ mara kunna, ale ni Setari Bozinayi, ani u tɔɲɔgɔnw minw be Afarisaki, baji kɔfɛ fana, olu le tun ye bataki ci masacɛ Dariyusi ma.

⁷ Bataki nin na, u tun y'a fɔ a ye ko: «Masacɛ Dariyusi, an b'i fo.

⁸ An b'a fɔ e masacɛ ye ko an tagara Zuda mara la, Ala min ka bon, ale ka soo yɔrɔ la. U b'a lɔra ni kabakurubabaw ye, ani u b'a la ka lɔgɔw yɛrɛ don kogow la. U b'u sɔbɛ don u ka baara la, a fana be ɲana kosɔbɛ.

⁹ An y'u ka cɛkɔrɔbaw ɲininga, ko jɔn le ye sira di u ma ko u ka soo nin lɔ ani a laminikogo.

¹⁰ An fana y'u ɲininga u tɔgɔw la janko an ka se k'u ɲamɔgɔw tɔgɔw yira i la.

¹¹ U ye jaabili min d'an ma, o filɛ: u k'olu ye sankolo ni dugukolotigi Ala ka baarakɛlaw ye, ko Isirayɛlidenw ka masacɛba dɔ le tun ye Ala ka soo nin lɔ a be saan caaman bɔ sisan, k'olu b'o le lalagara k'a lɔ.

¹² Ko nga olu faaw tun y'a kɛ Sankolotigi Ala dimina, k'o la, a tun y'u don Babilɔni masacɛ Nabukodonozɔri Kalideka bolo ko ale lo ye soo nin ci, ani ka jama minɛ ka taga n'u ye Babilɔni.

¹³ «Nga Babilɔni masacɛ Sirusi ka masaya saan fɔlɔ la, ale tun ye sira di ko Ala ka soo nin ka lɔ.

¹⁴ Ko Nabukodonozɔri tun ye Ala ka sokɔnɔminan sanulamanw ni warigwɛlaman minw ta ka bɔ soo nin kɔnɔ Zeruzalɛmu, ka taga u bila Babilɔni joso kɔnɔ, masacɛ Sirusi y'u bɛɛ ta ka bɔ o yɔrɔ la k'u di cɛɛ dɔ ma min tɔgɔ ko Sɛsibasari, a tun ye min sigi Zuda mara kunna.

¹⁵ Ko a tun y'a fɔ ale ye ko a ka taga u bila Zeruzalɛmu, Alabatoso kɔnɔ. A y'a fɔ fana k'u ka Ala ka soo lɔ tugu a yɔrɔkɔrɔ la.

¹⁶ Ko Sɛsibasari nin nana dɔrɔn ka Ala ka soo nin juu sigi Zeruzalɛmu, k'a ta o waati ma fɔɔ ka na se bii ma, k'olu b'a lɔra, nga a ma ban fɔlɔ.

¹⁷ Ayiwa, sisan an b'a ɲini ele masacɛ fɛ ko n'i sɔnna, i k'a to u be ɲinini kɛ Babilɔni masacɛ ka sɛbɛw kɔnɔ, k'a filɛ ni masacɛ Sirusi tun ye sira di tiɲɛ na ko u ka Ala ka soo nin lɔ Zeruzalɛmu. O kɔ, masacɛ, fɛɛn min ka di ele ye, i b'o fɔ an ye.»