Ɛsidarasi 1 - ALA KA KUMA

Masacɛ Sirusi be sira di ko Alabatoso ka lɔ

¹ Kira Zeremi tun ye kuma min fɔ Masaba barika la, janko o koow ka kɛ, Masaba ye hakili di Pɛrɛsi masacɛ Sirusi ma, a ka masaya saan fɔlɔ la ko a ka kuma nin fɔ ani k'a kɛ sɛbɛ ye k'a ci a ka mara bɛɛ la ko:

² «Pɛrɛsi masacɛ Sirusi le ye kuma nin fɔ ko: ‹Masaba, Sankolotigi Ala ye ne kɛ masa ye jamana bɛɛ kunna, ale yɛrɛ fana le y'a ɲini ne fɛ ko n ka ta'a batoso lɔ Zeruzalɛmu, Zuda mara la.

³ Aw jamanadenw cɛma, mɔgɔ o mɔgɔ y'a ka mɔgɔ ye, aw ka taga Zeruzalɛmu, Zuda mara la ka Masaba, Isirayɛli ka Ala ka soo lɔ, ale Ala min be Zeruzalɛmu. Aw ka Ala ka to n'aw ye.

⁴ Jama nin tɔɔ be mara o mara kɔnɔ, o yɔrɔ mɔgɔw ka warigwɛ, ni sanu, ani minanw ni begɛnw di u ma, ani k'u boɲa ni fɛɛnw ye Ala ka soo lɔko kama Zeruzalɛmu.› »

⁵ A kɛra ten, gwatigi minw ye Zuda kɔmɔgɔw ye, ni Bɛnzamɛn kɔmɔgɔw, ani sarakalasebagaw, ni Levi kɔmɔgɔ tɔw, ani Masaba tun ye miiriya don mɔgɔ o mɔgɔ la, u bɛɛ wilila ka taga Zeruzalɛmu k'a ka soo lɔ.

⁶ U sigiɲɔgɔnw bɛɛ ye warigwɛ ni sanu, ani minanw ni begɛnw ani fɛɛn sɔngɔgwɛlɛnw d'u ma. O be danna boɲafɛnw na.

⁷ Masacɛ Nabukodonozɔri tun ye Masaba ka soo kɔnɔ minan minw ta Zeruzalɛmu ka taga u bila a ka joso kɔnɔ, Pɛrɛsi masacɛ Sirusi ye olu ta k'u di.

⁸ Sirusi tun y'a fɔ ko nafolomarabaga Mitiredati k'o bɔ k'u jati k'u di Zuda kɔmɔgɔw ɲamɔgɔba Sɛsibasari ma.

⁹ Minan nunu daa filɛ: tasa sanulaman bi saba, ani tasa warigwɛlaman waa kelen (1 000), ni muru mugan ni kɔnɔntɔn,

¹⁰ ani filen sanulaman bi saba, ni filen sifa wɛrɛ warigwɛlaman kɛmɛ naani ni tan, ani minan dɔ wɛrɛw waa kelen.

¹¹ Sanuminan ni warigwɛ ta bɛɛ tun bɛnna waa duuru ni kɛmɛ naani (5 400) ma. Sɛsibasari y'u bɛɛ ta Babilɔni ka taga n'u ye Zeruzalɛmu u bɔtuma na jɔnya la ka taga.