Ezekiyɛli 6 - ALA KA KUMA

Ala be josɔnlaw jalaki

¹ Masaba kumana ne fɛ ko:

² «Adamaden, filɛli kɛ Isirayɛli kuluw kan ka kiraya kɛ u koo la

³ ko: Isirayɛli kuluw, aw k'aw tulo malɔ Matigi, Masaba kumakan na. Matigi, Masaba ko aw kuluw ma, ni tintinw, ni kulu furancɛw, ani kɔkɛnɛw ma ko: Ne bena murujan bila ka na aw fɛ k'aw ka sɔnnikɛyɔrɔw halaki.

⁴ Aw ka sarakabɔyɔrɔw bena walaka, aw ka wusulandagaw bena ci. Ne bena mɔgɔ caaman faga aw ka joow kɔrɔ.

⁵ N bena Isirayɛlidenw suu lala u ka joow ɲafɛ, k'u kolow yɛrɛkɛ u ka sarakabɔyɔrɔw lamini na.

⁶ Aw sigiyɔrɔw bɛɛ la, duguw bena kɛ tomo ye, sɔnnikɛyɔrɔw bena kɛ lakolon ye. Aw ka sarakabɔyɔrɔw bena walaka ka halaki. Aw ka joow bena karikari ka nagasi. Aw ka wusulandagaw bena ci, aw ye fɛɛn minw dilan, olu bena halaki.

⁷ Aw caaman bena sa. O tuma na, aw ben'a lɔn ko ne ye Masaba ye.

⁸ «Nga ne ben'a kɛ aw tɔɔ be to, u tena olu faga ni murujan ye, o tɔɔ nin bena jɛnsɛ siya wɛrɛw cɛma.

⁹ Aw tɔɔ min bena to, o bena miiri ne la k'u to jamana wɛrɛw la, u minɛna ka taga minw kɔnɔ. U hakili bena jigi ne la. U hakili bena to a la k'u ye kakalaya kɛ, k'u ka miiriya bɔ ne kan, k'a sin u ka joow ma. U nigɛ bena bɔ u yɛrɛ la u ka kojugu kɛninw bɛɛ kosɔn.

¹⁰ O la, u ben'a lɔn ko ne ye Masaba ye, ko ne tun y'a fɔ ko n bena kojugu min kɛ u la, k'o ma kɛ bagabagakuma dama ye.»

¹¹ Matigi, Masaba y'a fɔ tugu ko: «Tɛgɛrɛ fɔ, seen mankan bɔ, k'a fɔ ko: ‹Ebe!› Isirayɛlidenw ka kojuguw n'u ka kokolonw bɛɛ kosɔn, murujan ni kɔngɔ ani fɔɲɔbana bena u faga.

¹² Min yɔrɔ ka jan, fɔɲɔbana bena ale faga. Min yɔrɔ ka surun, ale bena faga ni murujan ye. Kɛlɛdenw ye min datugu, kɔngɔ bena ale faga. Ne ka dimi bena se fɔɔ a daan na.

¹³ N'u ka suuw benbenna u ka joow cɛma, k'u ka sarakabɔyɔrɔw lamini, kulujanw ni tintinw bɛɛ kan, ani yirituw ni yirisunbabaw kɔrɔ, u tun be wusulan kasadimanw jɛni yɔrɔ minw na u ka joow bɛɛ ye tuma min na, o tuma na, aw ben'a lɔn ko ne ye Masaba ye.

¹⁴ Ne bena wili u kama ka n ka seko yira u la. U siginin be yɔrɔ o yɔrɔ jamana nin kɔnɔ, ne ben'u halaki k'a lakolon bila, k'a ta kongolakolon ma fɔɔ ka na se Dibila dugu ma. O la, u ben'a lɔn ko ne ye Masaba ye.»