Ezekiyɛli 36 - ALA KA KUMA

Isirayɛlidenw bena u ka jamana tigiya sɔrɔ tugu

¹ «Ele adamaden, kiraya kɛ Isirayɛli kuluw kama ko: Isirayɛli kuluw, aw k'aw tulo malɔ Masaba ka kuma na.

² Matigi, Masaba ko: Juguw y'a fɔ aw koo la ko: ‹Aha!› minkɛ, kulu nunu, minw be yen kabini fɔlɔfɔlɔ, olu kɛra anw ta ye.

³ O la Ezekiyɛli, kiraya kɛ ko ne Matigi, Masaba ko: Mɔgɔw wilila aw kama faan bɛɛ la janko k'aw lakolonya, u ɲaa bɔra aw fɛ, aw kɛra siya tɔw ta ye. Olu yɛlɛla aw ma k'aw nɛni.

⁴ O kosɔn, Isirayɛli kuluw, aw k'aw tulo malɔ ne Matigi, Masaba ka kuma na. Ne b'a fɔ aw ye ko aw ni tintinw, ni jisiraw ni kɔkɛnɛw, ni yɔrɔ minw cɛnna, ani dugu lakolonw, siya wɛrɛ minw bɛɛ b'aw laminina ye o minw kɔnɔfɛnw cɛ k'u lɔgɔbɔ.

⁵ Ne Matigi, Masaba ko: Ne dusu gwannin be kumagwɛlɛn le fɔra siya tɔw bɛɛ koo la, ani Edɔmu mara bɛɛ, bari u ye ne ka jamana minɛ ni nisɔndiya ye kɔnɔnajuguya la janko k'a kongow kɛ u ta ye.

⁶ «O le kosɔn, kiraya kɛ Isirayɛli jamana koo la k'a fɔ kuluw ni tintinw, ni jisiraw ani kɔkɛnɛw ye ko ne Matigi, Masaba ko: ‹Ne diminin be keliya kuma fɔ, bari siya wɛrɛw y'aw dɔgɔya.›

⁷ Ne Matigi, Masaba ko: ‹Ne ye n bolo wili ka kali ko aw lamini siyaw fana bena dɔgɔya sɔrɔ.

⁸ Nga aw, Isirayɛli kuluw, yiriw bena to aw kan minw furaburu bena caya, u bena den ne ka jama Isirayɛli ye bari yanni dɔɔni u bena kɔsegi u faso la.

⁹ Ayiwa, ne bena aw dɛmɛ ka n janto aw la, aw bena sɛnɛ, danni bena kɛ aw kan.

¹⁰ Ne bena Isirayɛlidenw caya jamana yɔrɔ bɛɛ la. Mɔgɔw bena segi ka sigi duguw kɔnɔ. Dugu minw tun cira, olu bena lɔ kura ye.

¹¹ Ne bena mɔgɔw ni begɛnw caya aw kan, u bena deen caaman sɔrɔ ka caya kosɔbɛ. Ne bena mɔgɔw sigi aw kan i n'a fɔ waati tɛmɛnin na, k'u ka nafolo caya ni fɔlɔta ye. O tuma na, aw ben'a lɔn ko ne ye Masaba le ye.

¹² Ne ben'a to ne ka jama Isirayɛli be taama yen. Aw bena kɛ u ta ye, aw bena kɛ u niyɔrɔ ye. Aw tena u deenw faga tugu.›

¹³ «Ayiwa, Matigi, Masaba ko: ‹Isirayɛli kuluw, a fɔra aw koo la ko aw be mɔgɔw halaki k'aw ka jamanadenw faga minkɛ,

¹⁴ aw tena mɔgɔw halaki tugu. Aw tena u deenw faga tugu. Ne Matigi, Masaba ko:

¹⁵ Ne ten'a to aw be siya wɛrɛw ka dɔgɔyakuma mɛn tugu. Aw tena tɔɔrɔ siyaw ka dɔgɔya kosɔn tugu. Aw ten'a to aw ka siya seen be talon ka ben tugu. Ne Matigi, Masaba le ko ten.› »

Masaba bena Isirayɛlidenw lajɛn tugu

¹⁶ Masaba kumana ne fɛ tugu ko:

¹⁷ «Adamaden, Isirayɛlidenw sigira u yɛrɛ ka jamana kɔnɔ tuma min na, u y'a nɔgɔ u taamacogo n'u ka kɛwaliw fɛ. U taamacogo tun be ne ɲana i n'a fɔ muso landatɔ ka nɔgɔ.

¹⁸ Ne ye n dimi bɔ u la kosɔbɛ, bari u ye mɔgɔw faga jamana kɔnɔ, k'u yɛrɛ nɔgɔ u ka joo sɔnko fɛ.

¹⁹ Ne y'u jɛnsɛn siya wɛrɛw cɛma, u yɛrɛkɛnin tun be jamana wɛrɛw kɔnɔ. Ne y'u kiti ka kɛɲɛ n'u taamacogo n'u ka kɛwaliw ye.

²⁰ U tagara yɔrɔ o yɔrɔ siya wɛrɛw cɛma, u ye ne tɔgɔ senuman cɛn bari a fɔra u koo la ko u ye Masaba ka mɔgɔw ye, nga u wajibiyara ka bɔ a ka jamana kɔnɔ.

²¹ Ayiwa, ne tun be hami n tɔgɔ senuman koo la, Isirayɛlidenw tun ye o min cɛn siya wɛrɛw cɛma u taayɔrɔw la.

²² «O le kosɔn, a fɔ Isirayɛlidenw ye ko ne Matigi, Masaba ko: Isirayɛlidenw, ne tena nin kɛ aw kosɔn, ne ben'a kɛ n tɔgɔ senuman le kosɔn, aw ye min cɛn siya wɛrɛw cɛma aw taayɔrɔw la.

²³ Aw ye ne tɔgɔba min cɛn siya wɛrɛw cɛma, ne bena nɔɔrɔ la o kan. Ni ne y'o kɛ u ɲana aw sababu la, u ben'a lɔn ko ne ye Masaba le ye. Ne Matigi, Masaba le ko ten.

²⁴ Ne bena aw bɔ siya wɛrɛw cɛma, jamanaw bɛɛ la, k'aw lajɛn, k'aw segi aw yɛrɛ ka jamana na.

²⁵ «Ne bena jiɲuman seriseri aw kan, aw bena saniya. Ne bena aw saniya ka bɔ aw ka nɔgɔtɔya koow n'aw ka josɔnko bɛɛ la.

²⁶ Ne bena dusukura di aw ma k'aw hakili lakuraya. Aw dusu min ka gwɛlɛ i n'a fɔ kabakuru, ne bena o bɔ aw la ka dusuɲuman di aw ma.

²⁷ Ne bena n Nii don aw la, k'a kɛ aw be ne ka kolatigɛninw kɛ ka ne ka fɔtaw bato ka ɲa.

²⁸ Ne ye jamana min di aw bɛmaw ma, aw bena sigi o kɔnɔ. Aw bena kɛ ne ka mɔgɔw ye, ne bena kɛ aw ka Ala ye.

²⁹ Ne bena aw kisi ka bɔ aw ka nɔgɔtɔyaw bɛɛ ma. Ne ben'a kɛ suman be ɲa, ne tena kɔngɔ bila aw la tugu.

³⁰ Ne ben'a kɛ yiriw be deen caaman kɛ, sɛnɛfɛnw be caya janko aw kana maloya kɔngɔ kosɔn tugu siya wɛrɛw cɛma.

³¹ O tuma na, aw hakili bena jigi aw taamacogojugu n'aw ka kɛwalijuguw la. Aw bena ɲugu aw yɛrɛ la, aw ka kojuguw bɛɛ kosɔn.

³² Aw k'a lɔn ko ne tena nin kɛ aw kosɔn dɛ. Ne Matigi, Masaba le ko ten. Isirayɛlidenw, aw ka maloya, aw kuun ka surun aw taamacogo kosɔn!

³³ «Ne Matigi, Masaba ko: Ni ne y'aw saniya ka bɔ aw ka kojuguw bɛɛ la loon min na, o loon na, ne ben'a kɛ mɔgɔw be sigi aw ka duguw kɔnɔ tugu. Dugu minw tun kɛra tomo ye, olu bena lɔ kura ye tugu.

³⁴ Dugukololakolon bena sɛnɛ, tɛmɛbagaw ten'a filɛ yɔrɔlakolon ye tugu.

³⁵ U ben'a fɔ ko nin dugukolo min tun cɛnna, ko sisan a kɛra i n'a fɔ Ala ka yɔrɔɲuman. Ko dugu minw tun cira ka lakolonya ka kɛ tomo ye, sisan u y'olu lɔ ka kɛ dugu barikamanw ye, mɔgɔw sigira u kɔnɔ.

³⁶ O tuma na, siya minw tora aw lamini na, olu ben'a lɔn ko ne Masaba ye dugu cininw lɔ kura ye, ko dugukolo min tun kɛra yɔrɔlakolon ye, ne ye danni kɛ o kɔnɔ. Ne Masaba le ko ten, ne ye min fɔ, ne bena o kɛ.

³⁷ «Ne Matigi, Masaba ko: Ne bena sɔn Isirayɛlidenw ka ne daali tugu ne n'u dɛmɛ. Ne bena u kɔmɔgɔw caya i n'a fɔ sagakulu.

³⁸ Dugu cininw bena fa jamakuluw la, u bena caya i n'a fɔ saraka sagaw, u be minw kɛ sarakaw ye Zeruzalɛmu, ɲanagwɛ waatiw la. O tuma na, u ben'a lɔn ko ne ye Masaba le ye.»