Ezekiyɛli 34 - ALA KA KUMA

Kirayakuma, Isirayɛlidenw ka ɲamɔgɔw kama

¹ Masaba kumana ne fɛ ko:

² «Adamaden, kiraya kɛ Isirayɛli ɲamɔgɔw kama, k'a fɔ u ye ko Matigi, Masaba ko: ‹Isirayɛli ɲamɔgɔ minw be janto u yɛrɛ la dɔrɔn, bɔnɛ be olu ye! Yala sagadɛndɛbagaw man kan ka janto sagaw la wa?

³ Aw be begɛn tulɔninw ɲimi k'aw fɛɛrɛ bɔ ni sagaw sii ye, ka sagababaw faga, k'a sɔrɔ aw te janto sagaw la.

⁴ Aw ma saga barikatanw dɛmɛ, aw ma saga banabagatɔw furakɛ, aw ma saga mandimininw joliw furakɛ. Saga minw tun be tagara yɔrɔ wɛrɛ, aw ma olu gwɛn ka na. Minw tununa, aw ma olu ɲini. Aw y'u mara ni fariya ye, aw ma makari u la.

⁵ Sagaw jɛnsɛnna ka kɛ waraw ka dumuni ye bari dɛndɛbaga tun t'u la.

⁶ Ne ka sagaw tagara yaala u kunfɛ kuluw ni tintinjanw bɛɛ kan. U jɛnsɛnna faan bɛɛ la dugukolo kan. Mɔgɔ si ma ɲiningali kɛ u koo la, mɔgɔ si ma taga u ɲini.›

⁷ «O le kosɔn aw ɲamɔgɔw, aw k'aw tulo malɔ Masaba ka kuma na.

⁸ Ne Matigi, Masaba tɔgɔ kosɔn, ne b'a fɔ ko: Sagadɛndɛbaga tanya kosɔn, mɔgɔw nana ne ka sagaw minɛ, dɔw kɛra waraw ka dumuni ye. Ne ka sagadɛndɛbagaw ma ne ka saga tununinw yaala. Yanni u ka janto ne ka sagaw la, u y'u janto u yɛrɛ la.

⁹ O la ɲamɔgɔw, aw k'aw tulo malɔ Masaba ka kuma na.»

¹⁰ Matigi, Masaba ko: «Ne bena wili sagadɛndɛbagakolon nunu kama k'o ɲininga ne ka sagaw koo la. Ne ten'a to u b'u dɛndɛ tugu. U tena se ka janto u yɛrɛ la dɔrɔn tugu. Ne bena n ka sagaw kisi ka bɔ aw daa la, u tena kɛ aw ka dumuni ye tugu.»

¹¹ Matigi, Masaba ko: «Ne yɛrɛ bena na ne ka saga tununinw yaala, ka janto u la.

¹² Ka sagadɛndɛbaga to a ka sagakulu cɛma, n'u dɔw jɛnsɛnna, a be taga u yaala cogo min na, ne bena n ka sagaw yaala ten. U jɛnsɛnna ka taga yɔrɔ minw bɛɛ la lonjugu la, ne bena u kisi ka bɔ o yɔrɔw la.

¹³ Ne bena u bɔ siya wɛrɛw cɛma k'u lajɛn ka bɔ jamana wɛrɛw la, ka na n'u ye u yɛrɛ ka jamana na. Ne bena u dɛndɛ Isirayɛli kuluw kan, jidaw la, ani mɔgɔw be se ka sigi yɔrɔ minw bɛɛ la.

¹⁴ Ne bena u dɛndɛ yɔrɔɲuman na, u ka ɲiminikɛyɔrɔ bena kɛ Isirayɛli kuluyɔrɔw ye. U bena lafiɲɛ o yɔrɔɲuman na, u bena ɲimini kɛ binɲumanw yɔrɔ la Isirayɛli kuluw kan.

¹⁵ Ne yɛrɛ le bena janto ne ka sagaw la ka lafiɲɛyɔrɔ d'u ma. Ne Matigi, Masaba le ko ten.

¹⁶ Min tununa, ne bena o yaala, min tagara yɔrɔ wɛrɛ, ne bena o gwɛn ka na. Ne bena saga mandimininw joliw furakɛ, ka saga barikatanw dɛmɛ. Nga minw ka bonbon, ni barika b'u la, ne bena olu faga. Ne bena u bɛɛ kɔlɔsi ni tilenninya ye.

Ala ben'a ka mɔgɔw dɛmɛ

¹⁷ «Ne Matigi, Masaba ko: Aw kɔni, ne ka sagaw, ne bena aw bɔ ɲɔgɔn na, ani ka sagajigiw ni bakɔrɔninw bɔ ɲɔgɔn na.

¹⁸ N'aw ye ɲimini kɛ yɔrɔɲumanw na, o t'aw wasa wa? Fɔɔ aw b'a tɔɔ dɔn le aw seen kɔrɔ! N'aw ye jiɲuman min, o fana te aw wasa wa? Fɔɔ aw k'aw seen kɛ k'a tɔɔ duuru le.

¹⁹ O la, aw ye biin min dɔn aw seen kɔrɔ, ne ka sagaw wajibiyanin lo k'o ɲimi. Aw ye jii min duuru n'aw seen ye, u wajibiyanin lo k'o min.

²⁰ «O le kosɔn, ne Matigi, Masaba ko: Ne yɛrɛ le bena sagababaw ni saga fasaninw bɔ ɲɔgɔn na.

²¹ Aw b'u ɲɔti n'aw gɛrɛn ye, ani aw ɲafɛsenw ye, ka saga barikatanw bɛɛ susu n'aw gɔɔnw ye fɔɔ k'u gwɛn k'u jɛnsɛn minkɛ,

²² o la, ne bena na n ka sagaw dɛmɛ, mɔgɔw tena na u minɛ tugu. Ne bena sagaw bɔ ɲɔgɔn na.

²³ Ne bena sagadɛndɛbaga kelen bila u kunna, ale bena u kɔlɔsi. O ye ne ka baarakɛla Dawuda ye. Ale lo bena janto u la, ka kɛ u kɔlɔsibaga ye.

²⁴ Ne Masaba le bena kɛ u ka Ala ye, ne ka baarakɛla Dawuda bena kɛ u ɲamɔgɔ ye. Ne Masaba le ko ten.

²⁵ «Ayiwa, ne bena bɛn n'u ye hɛrɛ ka sɔrɔ an ni ɲɔgɔn cɛ, ani ka waraw ban ka bɔ jamana kɔnɔ janko ne ka mɔgɔw ka se ka sigi kongokolon kɔnɔ ani ka si tubaw la hɛrɛ la.

²⁶ Ne bena hɛrɛ kɛ u ye ka ne ka kulu gɛrɛfɛla kɛ hɛrɛyɔrɔ ye. Ne bena sanji di a diwaati la, o bena kɛ hɛrɛsanji ye.

²⁷ Kongo kɔnɔ yiriw bena den, sɛnɛ bena ɲa, ne ka jama bena to hɛrɛ la u yɛrɛ ka jamana kɔnɔ. Ni ne y'u hɔrɔnya tuma min na, k'u bɔsi mɔgɔw bolo, minw tun y'u kɛ jɔɔnw ye, o tuma na, u ben'a lɔn ko ne ye Masaba le ye.

²⁸ Siya wɛrɛw tena ben u kan tugu, waraw tena u minɛ tugu. U bena to hɛrɛ la, mɔgɔ si tena siranya bila u la.

²⁹ Ne bena dugukoloɲuman d'u ma, a lɔnnin bɛ ko suman be ɲa min na. Kɔngɔ tena u ɲaa gwan jamana kɔnɔ tugu, siya wɛrɛw tena u dɔgɔya tugu.

³⁰ O tuma na, u ben'a lɔn ko ne Masaba u ka Ala be n'u ye, k'olu Isirayɛlidenw ye ne ka mɔgɔw ye. Ne Matigi, Masaba le ko ten.

³¹ «Aw ye ne ka sagaw ye ne be janto minw na, aw adamadenw, ne ye aw ka Ala ye. Ne Matigi, Masaba le ko ten.»