Ezekiyɛli 3 - ALA KA KUMA

Isirayɛlidenw ladiko

¹ A y'a fɔ ne ye ko: «Adamaden, fɛɛn min b'i ɲakɔrɔ, i k'o dumu, i ka sɛbɛ melekenin nin ɲimi. O kɔ, i ka taga kuma Isirayɛlidenw fɛ.»

² Ne ye n daa yɛlɛ. A y'a kɛ ne ye sɛbɛ nin ɲimi.

³ A y'a fɔ ne ye ko: «Adamaden, ne be sɛbɛ min dira i ma, i k'o ɲimi k'i kɔnɔ fa n'a ye.» Ne y'a ɲimi. A tun ka di n daa la i n'a fɔ lii.

⁴ A y'a fɔ ne ye ko: «Adamaden, taga Isirayɛlidenw fɛ, ka ne ka kuma fɔ u ye.

⁵ I te siya min ka kaan mɛn, minw ka kuma faamuko ka gwɛlɛ, ne t'i cira olu fɛ, ne b'i ci Isirayɛlidenw le fɛ.

⁶ Ne t'i cira siya caaman fɛ minw ka siyakan ka gwɛlɛ, i te min mɛn. Siga t'a la, ni ne tun y'i ci olu fɛ, u tun bena mɛnni kɛ i fɛ.

⁷ Nga Isirayɛlidenw tena sɔn ka mɛnni kɛ i fɛ, bari u t'a fɛ ka mɛnni kɛ ne fɛ, sabu u bɛɛ ɲaa ka gwɛlɛ, u dusu ka gwɛlɛ.

⁸ Nga ne bena i kɛ mɔgɔ ɲanagwɛlɛn ye, mɔgɔ tulogwɛlɛn, i n'a fɔ olu.

⁹ Ne bena i jaa gwɛlɛya i ko luluu janin lo cogo min na. A bena gwɛlɛya ka tɛmɛ kabakurugwɛlɛn kan. Kana siran u ɲa, i jaa kana tigɛ u ɲakɔrɔ, hali ni mɔgɔ murutininw lo.»

¹⁰ O kɔ, a y'a fɔ ne ye ko: «Adamaden, ne bena kuma minw bɛɛ fɔ i ye, i tulo malɔ o la ka ɲa, k'a mara i dusu la.

¹¹ Taga i ka mɔgɔw fɛ minw be jɔnya la, ka kuma u fɛ. U ye mɛnni kɛ i fɛ wo, u ma mɛnni kɛ i fɛ wo, i k'a fɔ u ye ko: ‹Matigi, Masaba ye min fɔ, o filɛ.› »

¹² O tuma na, Ala Nii ye ne kɔrɔta. Ne ye pɛrɛnkan dɔ mɛn n kɔfɛ, n'a b'a fɔra ko: «Boɲa ka la Masaba ka nɔɔrɔ kan, a sigiyɔrɔ la.»

¹³ Fɛɛn niman nunu gaman tun be gosigosi ɲɔgɔn na. Ne y'olu n'u seen nunu mankan mɛn. Mankan nin tun ka bon kosɔbɛ.

¹⁴ O kɔ, Ala Nii ye ne kɔrɔta ka taga ni ne ye, ne dimininba tagara. Masaba ka sebagaya barikaman tun sera ne ma.

¹⁵ Minw tun tagara jɔnya la n'u siginin be Tɛlabibu, Kebari baa daa la, ne tagara se olu fɛ. Ne sera u sigiyɔrɔ la tuma min na, ne sigira u cɛma tile wolonwula kɔnɔ. Ne kɔnɔnafilila kosɔbɛ.

Ezekiyɛli be kɛ jama kɔlɔsibaga ye

¹⁶ Tile wolonwula nunu tɛmɛnin kɔ, Masaba kumana ne fɛ ko:

¹⁷ «Adamaden, ne b'i sigi ka kɛ Isirayɛlidenw kɔlɔsibaga ye. N'i ye kuma min mɛn n daa la, e b'u lasɔmi o la.

¹⁸ Ni ne ye mɔgɔjugu dɔ koo fɔ ko a bena sa, n'i m'a lasɔmi, n'i ma o mɔgɔjugu nin ladi, a k'a ka juguya dabila, waasa a ka to nii na, a bena sa a ka kojugu kosɔn. Nga n bena e le jalaki a ka sayako la.

¹⁹ Nga ni ele y'a lasɔmi, n'a m'a sɔn ka yɛlɛma k'a ka kojugu dabila, a bena sa a ka kojugu kosɔn. Nga e bena kisi.

²⁰ Ni mɔgɔtilennin dɔ y'a ka tilenninya dabila ka to ka tilenbaliyako kɛ, n bena jaan la a ɲafɛ. A bena sa. E m'a lasɔmi minkɛ, a bena sa a ka kojugu kosɔn. A ye ɲumanya min kɛ ka tɛmɛ, o tena jati. Nga n bena e le jalaki a ka sayako la.

²¹ N'i ye mɔgɔtilennin dɔ lasɔmi ko a kana kojugu kɛ, n'a m'a kɛ, a bena to nii na, bari ele y'a lasɔmi. E fana bena kisi.»

Kira bena kɛ bobo ye waati dɔ kɔnɔ

²² Masaba ka sebagaya sera ne ma o yɔrɔ la. A y'a fɔ ne ye ko: «Wili ka taga kɔkɛnɛ na, ne bena kuma dɔ fɔ i ye o yɔrɔ la.»

²³ Ne wilila ka taga kɔda la, ne ye Masaba ka nɔɔrɔ ye o yɔrɔ la, i n'a fɔ n y'a ye cogo min na Kebari baa daa la. Ne birila duguma.

²⁴ Ala Nii donna ne la, ka ne wili ka lɔ, ka kuma ne fɛ ko: «Taga i yɛrɛ datugu i ka boon kɔnɔ.

²⁵ Adamaden, u bena i siri ni juru ye. I tena bɔ u cɛma tugu.

²⁶ Ne ben'a kɛ i nɛɛn be nɔrɔ i naganaga la, i be kɛ bobo ye. I tena se k'u jalaki tugu. Bari, siya murutinin lo.

²⁷ Nga ni ne nana kuma i fɛ tuma min na, ne bena i nɛɛn foni, i ben'a fɔ u ye ko: ‹Matigi, Masaba ko: Mɔgɔ o mɔgɔ b'a fɛ ka mɛnni kɛ, o tigi k'a tulo malɔ. Ni min t'a fɛ ka mɛnni kɛ, o tigi kan'a tulo malɔ. Bari siya murutinin lo.›