Ezekiyɛli 29 - ALA KA KUMA

Kirayakuma, Ezipiti kama

¹ Isirayɛlidenw minɛnin kɔ ka taga jamana wɛrɛ la, o saan tannan kalo tannan tile tan ni filanan loon, Masaba kumana ne fɛ ko:

² «Adamaden, i ɲaa sin Ezipiti masacɛ ma ka kiraya kɛ ale ni Ezipiti jamana bɛɛ koo la.

³ A fɔ a ye ko: ‹Ele Ezipiti masacɛ, ne be nana i kama. E min be i ko banba belebeleba, min lanin be Nili baa cɛma. I ko baji nin ye i ta ye, ko e le y'a dan.

⁴ Ayiwa, ne bena nigɛ don i dakala la k'a kɛ i ka baji kɔnɔ jigɛw be nɔrɔ i faraw la. Ne bena i sama ka bɔ i ka bajiw la, e n'i ka baji kɔnɔ jigɛ minw nɔrɔnin be i faraw la.

⁵ Ne bena i fili kongokolon kɔnɔ, e n'i ka baji kɔnɔ jigɛw bɛɛ. I bena ben kongo kɔnɔ. Mɔgɔ si tena i suu ta, walima ka janto i la. Ne bena i kɛ waraw, ani kɔnɔw ka dumuni ye.

⁶ O tuma na, Ezipiti kɔnɔ mɔgɔw bɛɛ ben'a lɔn ko ne ye Masaba le ye. E tun kɛra bere barikatan ye Isirayɛlidenw fɛ.

⁷ U y'i ta u bolo la, i karila k'u gaman sɔgɔ. U k'u be tintin i kan, i karila k'u kɔɔ mugu.›

⁸ «O la, ne Matigi, Masaba ko: ‹Ne bena murujantigiw ci i kama k'i ka mɔgɔw n'u ka begɛnw faga.

⁹ Ezipiti bena kɛ yɔrɔlakolon ye. O tuma na, u ben'a lɔn ko ne ye Masaba le ye. Bari, i y'a fɔ ko Nili baa ye i ta ye, ko i y'a dan.

¹⁰ O la, ne bena wili e n'i ka baji kama, ka Ezipiti jamana kɛ tomoyɔrɔ ni yɔrɔlakolon ye, jii te min kɔnɔ, k'a ta Migidɔli fɔɔ ka taga se Asuwani, ka tɛmɛ ka ta'a bila Etiyopi jamana daan na.

¹¹ Mɔgɔ si seen tena la Ezipiti kɔnɔ, begɛn si tena tɛmɛ o yɔrɔ la. Mɔgɔ si tena sigi a kɔnɔ saan bi naani kɔnɔ.

¹² Ne bena Ezipiti kɛ yɔrɔlakolon ye, ka tɛmɛ jamana tɔw bɛɛ kan. A ka duguw bena kɛ tomow ye ka tɛmɛ dugu halakinin wɛrɛw kan. A bena kɛ ten saan bi naani kɔnɔ. Ne bena Ezipitikaw jɛnsɛn siya wɛrɛw cɛma, ne bena u yɛrɛkɛ jamana wɛrɛw la.›

Koo minw bena Ezipitikaw sɔrɔ

¹³ «Ne Matigi, Masaba ko: Ezipitikaw jɛnsɛnna siya minw cɛma, ne bena u lajɛn ka bɔ o yɔrɔw la saan bi naani tɛmɛnin kɔ.

¹⁴ Ne bena Ezipitikaw ka koo yɛlɛma, k'u kɔsegi Ezipiti worodugu faan mara kɔnɔ, u yɛrɛ ka faso la. U bena maradennin dɔ sigi o yɔrɔ la,

¹⁵ min fanga bena dɔgɔya ni siya tɔw bɛɛ ta ye. A ten'a yɛrɛ fisaya ni siya wɛrɛw ye tugu. Ne ben'a fanga nagasi fɔɔ a tena kuntigiya kɛ siya wɛrɛw kan tugu.

¹⁶ Isirayɛlidenw tena u jigi la Ezipiti kan tugu. Ezipiti bena u hakili jigi ko u tun ye dɛmɛ ɲini u fɛ ka kojugu kɛ ten. O tuma na, u ben'a lɔn ko ne ye Matigi, Masaba le ye.»

¹⁷ Saan mugan ni wolonwulanan kalo fɔlɔ tile fɔlɔ loon, Masaba kumana ne fɛ ko:

¹⁸ «Adamaden, Babilɔni masacɛ Nabukodonozɔri y'a ka kɛlɛdenw bila baaragwɛlɛn na Tiri kama. A y'a ka kɛlɛdenw wajibiya ka donibabaw ta, o y'u bɛɛ kunsigi ban, k'u gamanw gwan. O bɛɛ n'a ta, a n'a ka kɛlɛdenw ma nafa si sɔrɔ u ka baaragwɛlɛn na Tiri kama.

¹⁹ O la, ne Matigi, Masaba ko: Ne be Ezipiti jamana di Babilɔni masacɛ Nabukodonozɔri ma. A ben'a kɔnɔ nafolo cɛ ka taga n'a ye, k'a ka nafolo bɛɛ cɛ k'o kɛ a ka kɛlɛdenw ka sara ye.

²⁰ Ne be Ezipiti d'a ma k'a kɛ a ka baara sara ye, bari a n'a ka kɛlɛdenw ye baara kɛ ne ye. Ne Matigi, Masaba le ko ten.

²¹ «O loon na, ne bena Isirayɛlidenw barika boɲa. Ele adamaden, ne ben'a to i be kuma Isirayɛlidenw cɛma. O tuma na, u ben'a lɔn ko ne ye Masaba le ye.»