Ezekiyɛli 23 - ALA KA KUMA

Samari ye kakalamuso ye

¹ Masaba kumana ne fɛ ko:

² «Adamaden, muso fila tun be yen, u fila bɛɛ ye baa kelen ye.

³ U ye kakalaya kɛ Ezipiti kabini u sunguruman. U siin benna cɛɛw bolo o yɔrɔ la. K'u to sunguruya la, u y'u disi mɔmɔ o yɔrɔ la.

⁴ Kɔrɔmuso tɔgɔ ko Oola, a dɔgɔmuso tɔgɔ ko Ooliba. U tun ye ne taw ye, u ye dencɛw ni denmusow wolo. Oola ye Samari ye, Ooliba ye Zeruzalɛmu ye.

⁵ Oola tun ye ne ta ye, nga a ye kakalaya kɛ. A kanubagaw, Asirikaw nigɛ y'a minɛ.

⁶ Fani bulaman b'u kaan na, lasigidenw n'u kuntigiw tun lo. U bɛɛ tun ye kanbelenɲumanw ye, n'u be yaala soow kan.

⁷ A ye kakalaya kɛ ni Asiri mɔgɔbabaw bɛɛ ye. Mɔgɔ o mɔgɔ nigɛ y'a minɛ, a y'a yɛrɛ nɔgɔ ni olu n'u ka joow bɛɛ ye.

⁸ A y'a daminɛ ka kakalaya min kɛ Ezipiti a sunguruman, a ma o dabila. Olu le y'a ka sunguruya sɔrɔ, ani k'a disi mɔmɔ, u ye kakalaya kɛ n'a ye kosɔbɛ.

⁹ O le kosɔn, ne ye Samari don a kanubagaw, Asiri jamana bolo, olu minw nigɛ tun b'a la.

¹⁰ Olu y'a lakolonya, u y'a dencɛw n'a denmusow minɛ k'ale faga ni murujan ye. A ka ɲagwan kɛra talen ye musow cɛma.

Zeruzalɛmu be i ko kakalamuso

¹¹ «A dɔgɔmuso Ooliba y'o bɛɛ ye, nga a ka nigɛjugu n'a ka kakalaya juguyara n'a kɔrɔmuso ta ye.

¹² Asirikaw nigɛ y'ale fana minɛ: u ka lasigidenw n'u ka kuntigiw, u ka kɛlɛden minw masirinin be n'u be yaala soow kan, u bɛɛ kanbelenɲumanw.

¹³ Ne y'a ye ko ale fana y'a yɛrɛ nɔgɔ, u fila bɛɛ ye sira kelen taama.

¹⁴ Nga a ye dɔ fara a ka kakalaya kan. A ye Babilɔni cɛɛw jaaw ye kogo la, minw dilanna ni fɛnwulen ye,

¹⁵ Cɛsirilanw tun b'u cɛɛ la, fani melekenin tun b'u kuun na. U bɔnin tun be Babilɔnikaw fɛ ka bɔ Babilɔni jamana na.

¹⁶ A y'u ye dɔrɔn, u nigɛ y'a minɛ. A ye cidenw bila ka taga u fɛ Babilɔni jamana na.

¹⁷ Babilɔnikaw nan'a fɛ ka jɛn n'a ye k'a nɔgɔ kakalaya fɛ. U y'a nɔgɔ ka ban tuma min na, a ɲugura u la, ka ban u la.

¹⁸ A y'a ka kakalaya kɛ kɛnɛ kan k'a fari lakolon yira tuma min na, ne fana ɲugur'a la ka ban a la i n'a fɔ ne tun ɲugur'a kɔrɔmuso la cogo min na.

¹⁹ O bɛɛ n'a ta, a ka kakalaya juguyara ka taga ɲa. A hakili tor'a ka sunguruman waati la, a ye kakalaya kɛ Ezipiti tuma min na.

²⁰ O yɔrɔ kakalaw nigɛ y'a minɛ, minw tun be i n'a fɔ falicɛw, walima socɛw.

Zeruzalɛmu ɲaa bena gwan

²¹ «Ayiwa, Ezipitikaw y'i sunguruman siin mɔmɔ cogo min na, i y'a daminɛ k'o kakalaya ɲɔgɔn kɛ tugu.

²² O la, ne Matigi, Masaba ko: Ooliba, i ɲugura i kanubaga minw na, ne ben'a kɛ olu be wili i kama, ka na i kama ka bɔ faan bɛɛ la:

²³ Babilɔni dugu ni Babilɔni jamana mɔgɔw bɛɛ, pekɔdicɛw ni sowacɛw ni kowacɛw, ani Asirikaw bɛɛ. U bɛɛ tun ye kanbelenɲumanw ye, ni lasigidenw, ani kuntigiw, ni kɛlɛkuntigiw, ani mɔgɔbabaw. U bɛɛ be yaala soow kan.

²⁴ U bena bɔ kɔgɔdugu ɲafan fɛ ka na i kama ni kɛlɛkɛwotorow ni bolifɛn dɔ wɛrɛw ye, ani jamaba. U b'u yɛrɛ labɛn ni nigɛkunbɛnnanw ni nigɛfugulanw ye ka na i kama k'i lamini. Ne bena i ka koo gwɛya u ye, u bena i kiti ka kɛɲɛ n'u ka sariyaw ye.

²⁵ Ne ka dimi bena sin i ma keliya bolo, u bena i minɛ ni dimiba ye. U bena i nuun tigɛ, n'i tulow. Mɔgɔ minw tora, olu bena faga ni murujan ye. U bena i dencɛw n'i denmusow minɛ. Mɔgɔ minw mana to i kɔnɔ, olu bena halaki tasuma bolo.

²⁶ U bena i walaka k'i ka masirifɛnɲumanw bɔsi i la.

²⁷ O la, ne bena i ka nigɛjugu, n'i ka kakalaya ban, i y'a daminɛ ka min kɛ k'i to Ezipiti. O koo nunu tena diya i ye tugu, i hakili tena to Ezipiti koo la tugu.

²⁸ «Ne Matigi, Masaba ko: I be minw kɔniya, i ɲugura minw na, ne bena i don olu bolo.

²⁹ U bena i kɔnɔ mɔgɔw minɛ ni kɔnɔnajuguya ye. U ye baara kɛ ka bololafɛn minw sɔrɔ, u bena o bɛɛ cɛ, k'i walaka k'i fari lakolon to. I ka kakalaya maloya bena bɔ kɛnɛ kan, an'i ka nigɛjugu, n'i ka kakalaya.

³⁰ O sera i ma, bari, i ye kakalaya kɛ ni siya wɛrɛw ye k'i yɛrɛ nɔgɔ n'u ka joow ye.

³¹ E y'i kɔrɔmuso ka sira le ta. O le kosɔn, ale ye minni kɛ filen min na, ne ben'o don i bolo.

³² Ayiwa, ne Matigi, Masaba ko: I bena minni kɛ i kɔrɔmuso ka filen na, a ka bon kosɔbɛ. Mɔgɔw bena yɛlɛ i ma k'i lɛɛbu, bari filen nin fanin lo.

³³ Ɲanamini ni dusukasi bena i sɔrɔ, halakilijugu filen lo, i kɔrɔmuso Samari ka filen lo.

³⁴ I ben'a kɔnɔfɛn min k'a bɛɛ ban. I ben'a ci n'i ɲiiw ye, k'a kɛ k'i siin tigɛtigɛ. Ne Matigi, Masaba le kumana.

³⁵ «Ne Matigi, Masaba ko: I ɲinɛna ne kɔ ka ban ne la minkɛ, o la, i ka kan ka lɔ n'i ka nigɛjugu n'i ka kakalaya kunko ye.»

Ala bena Samari ni Zeruzalɛmu kiti

³⁶ Masaba y'a fɔ ne ye ko: «Adamaden, yala i b'a fɛ ka Oola ni Ooliba kiti wa? Ayiwa, u ka kokolonw yira u la.

³⁷ U ye kakalaya kɛ, mɔgɔfagalaw lo. U ye kakalaya kɛ n'u ka joow ye. U ye deen minw wolo ne fɛ, u y'u ka joow sɔn n'u ye janko olu k'u ɲimi.

³⁸ U ye koo wɛrɛ kɛ ne la fana. O waati la, u ye ne ka sigiyɔrɔ nɔgɔ ka ne ka lafiɲɛlonw cɛn.

³⁹ U y'u deenw kɛ ka joow sɔn loon min na, u donna ne ka sigiyɔrɔ la o loon kelen na k'a nɔgɔ. U y'o le kɛ ne ka soo kɔnɔ.

⁴⁰ Ka fara o kan, u ye cii bila ka taga jamanajan na ka mɔgɔw wele ka na. U sera tuma min na, i kora u kosɔn, ka kale la k'i masiri.

⁴¹ I sigira dilanɲuman kan, tabali labɛnnin tun b'a ɲafɛ, i tun ye ne ka wusulan ni ne ka tulu bila min kan.

⁴² Jamaba mankan tun be bɔra, u tun te hami foyi la. Cɛɛ caaman tun be jamaba nin cɛma ka bɔ kongokolon faan bɛɛ la. U ye bololanigɛ don balimamuso fila nunu bolo la, ka masirifɛnɲumanw biri u kuun na.

⁴³ O la, muso min sigɛnna ɲamɔgɔya fɛ, ne y'a fɔ ale koo la ko a b'a yɛrɛ bilara kakalaya la tugu.

⁴⁴ U jɛnna n'a ye. Mɔgɔ be jɛn ni kakalamuso ye cogo min na, u jɛnna n'u ɲamɔgɔmuso nunu ye o cogo la, minw ye Oola ni Ooliba ye.

⁴⁵ Nga mɔgɔtilenninw bena muso nunu kiti ka kɛɲɛ ni kakalamuso jalakicogo ye, ani muso min be mɔgɔ faga, bari kakalamusow ni mɔgɔfagalaw lo.

⁴⁶ «Ayiwa, ne Matigi, Masaba ko: Aw ka jamaba kɔnɔnasu k'a bila u la. A k'u jaa tigɛ k'u bololafɛnw cɛ.

⁴⁷ Jamaba nin bena u bon ni kabakuruw ye, k'u kɛlɛ ni murujanjanw ye, k'u dencɛw n'u denmusow faga k'u ka soow jɛni.

⁴⁸ O la, ne bena aw ka nigɛjugu ban jamana kɔnɔ, musow bɛɛ bena hakili sɔrɔ, u tena aw ka kojugu ɲɔgɔn kɛ.

⁴⁹ Aw ka nigɛjugu jalaki bena ben aw kan, aw bena lɔ n'aw ka josɔnko kunko ye. O tuma na, aw ben'a lɔn ko ne ye Matigi, Masaba le ye.»