Ezekiyɛli 2 - ALA KA KUMA

Ala be Ezekiyɛli ci Isirayɛlidenw fɛ

¹ A y'a fɔ ne ye ko: «Adamaden, wili ka lɔ, bari ne bena kuma i fɛ.»

² K'a to kuma na ne fɛ, Ala Nii donna ne la ka ne wili ka lɔ. Min tun be kumana ne fɛ, ne y'o kaan mɛn.

³ A y'a fɔ ne ye ko: «Adamaden, ne b'i ci Isirayɛlidenw fɛ, siya murutinin lo. U n'u faaw murutira ne ma fɔɔ ka na se bii ma.

⁴ Ne b'i ci mɔgɔ minw fɛ, mɔgɔ ɲanagwɛlɛnw lo, u dusu ka gwɛlɛ. A fɔ u ye ko: ‹Matigi, Masaba ko:

⁵ Mɔgɔ murutininw lo. U ye mɛnni kɛ i fɛ wo, u ma sɔn ka mɛnni kɛ i fɛ wo, u ben'a lɔn ko kira b'u cɛma.

⁶ E kɔni, adamaden, i kana siran u ɲa. Kana sɔn u ka kumaw k'i siran. U bena i sɔsɔ. A bena kɛ i fɛ i ko i be ŋɔniw le cɛma, walima bunteniw. O n'a ta bɛɛ, kana sɔn u ka kumaw k'i siran fewu. Kana i jaa tigɛ mɔgɔ murutinin nunu ɲada cogo kosɔn.

⁷ I ka ne ka kuma fɔ u ye, u ye mɛnni kɛ i fɛ wo, u ma sɔn ka mɛnni kɛ wo. Mɔgɔ murutininw lo.›

⁸ «E kɔni, adamaden, ne be min fɔra i ye, e k'i tulo malɔ o la. Kana muruti i ko mɔgɔmurutinin nunu. Ne bena min d'i ma, e k'i daa yɛlɛ k'o dumu.»

⁹ O tuma na, ne y'a ye ko bolo dɔ sinna ne ma. Sɛbɛ melekenin tun b'a la.

¹⁰ Bolo nin ye sɛbɛ nin dayɛlɛ ne ɲakɔrɔ, sɛbɛnni tun b'a faan fila bɛɛ la. A kɔnɔnakuma tun ye kasiko ni dusukasiko, ani bɔnɛkow ye.