Ezekiyɛli 19 - ALA KA KUMA

Dusukasidɔnkili

¹ E kɔni, i ka dusukasidɔnkili la Isirayɛli ɲamɔgɔw koo la ko:

² «Aw baa tun ye jaramuso ye, a ɲɔgɔn tun te warabaw cɛma. A y'a deenw balo waraba kanbelenw cɛma.

³ A y'a deen dɔ balo, o kɛra jara barikaman ye. A ye sogominɛ dege, a ye mɔgɔw dumu.

⁴ Siyaw y'a koo mɛn, u y'a minɛ jaan kɔnɔ. U ye nigɛ don a nuun na ka taga n'a ye Ezipiti jamana na.

⁵ Jaramuso ye kɔnɔni kɛ ka dɛsɛ. A y'a ye ko a jigi tun be min kan, k'o tununa. A y'a deen dɔ wɛrɛ ta k'o balo ka kɛ waraba barikaman ye.

⁶ Ale tun be yaala jaraw cɛma bari a kɛra jara barikaman ye. A ye sogominɛ dege, a ye mɔgɔw dumu.

⁷ A y'u ka masasow cɛn k'u ka duguw halaki. Jamana n'a kɔnɔ mɔgɔw bɛɛ jaa tigɛra a kasikan kosɔn.

⁸ A lamini siyaw wilil'a kama ka bɔ faan bɛɛ la. U y'u ka jaanw la a ɲa, a minɛna u kɔnɔ.

⁹ U ye nigɛ don a nuun na k'a bila sansaraba kɔnɔ, ka taga n'a ye Babilɔni masacɛ fɛ. U y'a bila kaso la, janko a mankan kana mɛn Isirayɛli kuluw kan tugu.

Kasikan, ɛrɛzɛnsun kosɔn

¹⁰ «Aw baa tun be i ko *ɛrɛzɛnsun min tutura jida la. Deen caaman ni bolo caaman tun b'a la jii caya kosɔn.

¹¹ Barika tun b'a bolow la, u kɛra masaberew ye. A jaɲana ka tɛmɛ yiri tɔw kan. A ye tun man gwɛlɛ a bolow jaɲa n'u caya kosɔn.

¹² Nga a bɔnna yen ni dimiba ye ka fili duguma. Fɔɲɔ bɔra kɔrɔn fɛ k'a deenw ja, u benna, a bolo barikamanw jara, tasuma y'u jɛni.

¹³ Sisan, a tutura kongokolon kɔnɔ, dugukolo janin na, jii te yɔrɔ min na.

¹⁴ Tasuma bɔr'a juu la k'a bolow n'a deenw jɛni. Bolo barikaman si t'a la tugu min be se ka kɛ masabere ye.» Nin ye dɔnkili ye, min ka kan ka la i n'a fɔ dusukasidɔnkili.