Ezekiyɛli 16 - ALA KA KUMA

Zeruzalɛmu ye deen bilanin ye

¹ Masaba kumana ne fɛ ko:

² «Adamaden, Zeruzalɛmu ka kokolonw yir'a la

³ k'a fɔ ko ne Matigi, Masaba b'a fɔ a ye ko: ‹I bɔyɔrɔ n'i woloyɔrɔ ye Kanaan jamana ye. I faa tun ye amoriw ye, i baa tun ye iti ye.

⁴ I wolola loon min na, u ma i barajuru tigɛ, u ma i ko k'i saniya, u ma i mɔn ni kɔgɔ ye, walima ka fani meleke i la.

⁵ Mɔgɔ si ma makari i la ka janto i la. U tun y'i fili kongo kɔnɔ i wololon na, bari u tun y'i mangoya.

⁶ Ne tɛmɛtɔ i gɛrɛfɛ, ne y'i firinfirintɔ ye joli la. K'i lanin to joli la, ne y'a fɔ i ye ko: I ka balo! I ka balo!

⁷ Ne ye n janto i la, i ye barika sɔrɔ. I boɲana ka kɔgɔ ka kɛ sunguru cɛɲuman ye kosɔbɛ. I siin fara, i sera furu ma yɛrɛ, nga i fari lakolon tun lo.

⁸ Ayiwa, waati wɛrɛ, ne tɛmɛna i gɛrɛfɛ, ne y'a ye ko i sera furu ma. Ne ye n ka fani biri i kan k'i farilakolon datugu. Ne ye n daa d'i ma ka bɛn n'i ye. O la, i kɛra ne ta ye.› Ne Matigi, Masaba le ko ten.

⁹ ‹Ne y'i ko, ka joli bɔ i fari la, k'i mɔn ni tulu ye.

¹⁰ Ne y'i fɛɛrɛ bɔ ni fani kaan sɔgɔnin ye, ka sanbara gololaman don i seen na. Ne ye jese ɲanaman cɛsirilan d'i ma, ni birifani sɔngɔgwɛlɛn.

¹¹ Ne ye masirifɛnw d'i ma: ne ye bololanigɛw don i bolo la, ka kɔnɔ don i kaan na.

¹² Ne ye nigɛ don i nuun na, ka tulolanigɛw don i tulo la, ka masafugulan ɲanaman biri i kuun na.

¹³ I masirila ni sanu ni warigwɛ ye, i ka faniw tun ye fani ɲanaman ye, ni fani sɔngɔgwɛlɛnw, ani fani kaan sɔgɔninw. I balofɛn tun ye mugu ɲanaman, ni lii, ani tulu ye. I tun cɛ ka ɲi kosɔbɛ, i kɛra masamuso ye.

¹⁴ I tɔgɔ bɔra siya wɛrɛw cɛma i ka cɛɲa kosɔn, bari ne tun ye masirifɛn minw d'i ma, o y'a kɛ i dafanin tun be, i tun cɛ ka ɲi kosɔbɛ.› Ne Matigi, Masaba le ko ten.

Zeruzalɛmu ye kakalamuso ye

¹⁵ « ‹Nga e y'i jigi la i ka cɛɲa kan. I ye kakalaya kɛ i tɔgɔba kosɔn. Mɔgɔ o mɔgɔ tɛmɛna, i y'o kanu k'i yɛrɛ d'a ma.

¹⁶ I y'i ka fani dɔw ta ka sɔnnikɛyɔrɔw masiri n'o ye, k'i yɛrɛ bila kakalaya la yen. O ɲɔgɔn tun ma deli ka kɛ ka kɔrɔ, a ɲɔgɔn tena kɛ tugu.

¹⁷ Ne ye masirifɛn ɲanaman minw d'i ma, i y'o sanu n'o warigwɛ ta ka joo cɛmanw dilan n'o ye, ka biri u kɔrɔ k'u sɔn.

¹⁸ E y'i ka fani kaan sɔgɔninw ta k'u don joo nunu na, i y'u sɔn ni ne ka tulu ni ne ka wusulan ye.

¹⁹ Ne ye dumuni min d'i ma: mugu ɲanaman, ni tulu, ani lii, i y'u ta k'u bila joo nunu kɔrɔ i n'a fɔ wusulan kasadiman. A kɛra ten dɛ! Ne Matigi, Masaba le ko ten.

²⁰ I ye dencɛ ni denmuso minw wolo ne ye, i ye olu kɛ ka joo nunu sɔn, olu ka kɛ u ka balo ye. I ka kakalaya tun ma i wasa wa?

²¹ I ye ne deenw faga ka joow sɔn n'u ye.

²² K'i to i ka kokolonw n'i ka kakalaya la, i hakili ma to i ka denmisɛnya waati la, i fari lakolon tun lo tuma min na, n'i tun be firinfirinna joli la.›

²³ «Ayiwa, ne Matigi, Masaba ko: ‹Bɔnɛ y'i ta ye, i ka kɛwalijuguw kosɔn. Bɔnɛ y'i ta ye!

²⁴ I ye yɔrɔ labɛn kakalaya kama, ka batolikɛyɔrɔw lɔ dugu forobayɔrɔw bɛɛ la.

²⁵ I ye batolikɛyɔrɔw lɔ dugu kɔnɔ siraw bɛɛ kunbɛnyɔrɔw la k'i ka cɛɲa nagasi, mɔgɔ o mɔgɔ tɛmɛna, i ye kakalaya kɛ n'o tigi ye.

²⁶ I ye kakalaya kɛ n'i sigiɲɔgɔn Ezipiti jamana kanbelen barikamanw ye siɲɛ caaman ka ne dusu gwan.

²⁷ O kosɔn, ne wilila i kama k'i ka dumuniko gwɛlɛya k'i don i jugu filisiw bolo. Olu yɛrɛ kabakoyara i ka kakalaya kosɔn.

²⁸ I ye kakalaya kɛ ni Asirikaw ye fana, bari i tun ma wasa. Hali o kɔfɛ, i ma wasa.

²⁹ I ye kakalaya kɛ siɲɛ caaman Babilɔni jamana kɔnɔ, o min ye jagokɛlaw ka jamana ye. O si ma i wasa.

³⁰ I y'i yɛrɛ di dɛ! Ne Matigi, Masaba le ko ten. I tun be kakalaya kɛ ni jagwɛlɛya ye i n'a fɔ kakalamuso!

³¹ I ye kakalayakɛyɔrɔ labɛn dugu kɔnɔ siraw bɛɛ kunbɛnyɔrɔw la, ka batolikɛyɔrɔw lɔ forobayɔrɔw bɛɛ la tuma min na, i tun ma kɛ i n'a fɔ kakalamuso bari i mako tun te wari la.

³² I ye ɲamɔgɔmuso ye, lonanw koo tun ka d'i ye ka tɛmɛ i furucɛ kan.

³³ Kakalamusow bɛɛ be sara sɔrɔ, nga ele tun be boɲafɛnw d'i kanubagaw bɛɛ ma. I tun be wari d'u ma janko u ka bɔ faan bɛɛ la ka na kakalaya kɛ n'i ye.

³⁴ O la, e ni kakalamuso tɔw te kelen ye, bari mɔgɔ si t'i ɲinina. Ele le be cɛɛw sara, cɛɛw t'i sara, o le y'a to e ni tɔw te kelen ye.› »

Ala be Zeruzalɛmu kiti

³⁵ O la, Zeruzalɛmu kakalamuso, i tulo malɔ Masaba ka kuma na!

³⁶ Matigi, Masaba ko: «I y'i yɛrɛ walaka. I fari lakolon yera i ka kakalaya kosɔn n'i kanubagaw ye, an'i ka joow bɛɛ, fɛnjugu nunu. E y'i deenw faga k'i ka joow sɔn n'u ye.

³⁷ O la, ne bena i kanubagaw bɛɛ lajɛn, e y'i diyanakow kɛ ni minw ye, minw koo ka d'i ye an'i ye minw kɔniya. Ne bena u bɛɛ lajɛn i kama ka bɔ faan bɛɛ la, k'i walaka u ɲana, u bɛɛ bena i fari lakolon ye.

³⁸ Ne bena i kiti k'i ɲaa gwan i ko u be kakalamuso, ni muso mɔgɔfagala ɲaa gwan cogo min na. Ne ka dimi ni ne ka keliya kosɔn, ne bena i ka sara kɛ saya ye.

³⁹ O kɔ, ne bena i don i kanubaga nunu bolo, olu bena i ka kakalayakɛyɔrɔw ci k'i ka batolikɛyɔrɔw cɛn. U bena i ka faniw bɔ k'i ka masirifɛn ɲanamanw cɛ k'i fari lakolon to.

⁴⁰ U bena jamaba bila ka taga i nɔɔ fɛ k'i bon ni kabakuruw ye k'i fari tigɛtigɛ n'u ka murujanjanw ye.

⁴¹ U bena i ka soow jɛni k'i ɲaa gwan muso caaman ɲana. Ne bena i ka kakalaya kɛko ban, i tena i kanubagaw sara tugu.

⁴² O tuma na, ne dusu bena suma i kɔrɔ, keliya tena ne minɛ tugu, ne ka dimi bena nɔgɔya i koo la. Ne dusu tena dimi tugu.

⁴³ Ne ye min kɛ i ye i ka denmisɛnya waati la, i ma i hakili to o la, nga i ye ne dusu gwan n'i ka kɛwaliw ye minkɛ, o la, ne bena i ka kɛwaliw kunko la i kan. Yala i ma kakalaya fara i ka kokolon tɔw bɛɛ kan wa? Ne Matigi, Masaba le ko ten.

Zeruzalɛmu ka jugu ni dugu tɔw ye

⁴⁴ «Mɔgɔ minw bɛɛ be talen la, u bena talen nin la i koo la ko: ‹Denmuso n'a baa jogo ka kan.›

⁴⁵ Muso min ɲugura a cɛɛ n'a deenw na, i y'o denmuso ye yɛrɛ yɛrɛ. I balimamuso minw ɲugura u cɛɛw n'u deenw na, i ye olu ka balimamuso ye sɔbɛ sɔbɛ la. Aw baa tun ye iti ye, aw faa tun ye amoriw ye.

⁴⁶ I kɔrɔmuso ye Samari n'a dafɛduguw ye, kɔgɔdugu ɲafan fɛ, i dɔgɔmuso ye Sodɔmu n'a dafɛduguw ye, worodugu ɲafan fɛ.

⁴⁷ I ye olu ka siraw taama, k'u ka kokolonw ɲɔgɔn kɛ, i ma dan o ma. I juguyara ka tɛmɛ olu kan i ka kɛwaliw bɛɛ la.

⁴⁸ Ne Matigi, Masaba le ko: Ne tɔgɔ kosɔn, i balimamuso Sodɔmu n'a dafɛduguw ma e n'i dafɛduguw ka kɛtaw ɲɔgɔn kɛ.

⁴⁹ I balimamuso Sodɔmu ka filiyɔrɔ filɛ nin ye: A n'a dafɛduguw tun b'u yɛrɛ boɲa, u wasanin tun lo, u mako tun te mɔgɔ wɛrɛ la. U ma dɛsɛbagatɔw ni fantanw dɛmɛ.

⁵⁰ U fanin tun be u yɛrɛ la, u ye kojuguw kɛ ne ɲakɔrɔ. O le kosɔn, ne y'u bɛɛ halaki i n'a fɔ i y'a ye cogo min na.

⁵¹ I ye kojugu minw kɛ, Samari ma o ɲɔgɔn tilancɛ kɛ. I ye koo kɛ minw ka jugu n'u ta ye. N'u be e n'i balimamuso nunu suma ɲɔgɔn fɛ, mɔgɔ b'a fɔ k'olu yɛrɛ tilennin lo i ka kɛwaliw bɛɛ kosɔn.

⁵² I ka maloya k'i kuun surun, bari i ye sababu d'i balimamusow ma. E ye kojugu kɛ ka tɛmɛ u kan fɔɔ mɔgɔ yɛrɛ b'a fɔ k'u tilennin be. O le kosɔn, i ka maloya k'i kuun surun, bari n'u y'aw suma ɲɔgɔn fɛ, mɔgɔ yɛrɛ b'a fɔ ko i balimamusow tilennin lo.

⁵³ «Sodɔmu n'a dafɛduguw, ani Samari n'a dafɛduguw, ani e min be u cɛma, ne bena aw ta ɲa tugu,

⁵⁴ janko i ka maloya k'i kuun surun i ka kɛwaliw bɛɛ kosɔn, i ye minw bɛɛ kɛ k'u dusu suma.

⁵⁵ I balimamusow Sodɔmu ni Samari, ani u dafɛduguw bena segi u cogokɔrɔ la, ani e n'i dafɛduguw fana.

⁵⁶ E tun b'i balimamuso Sodɔmu dɔgɔya i ka yɛrɛboɲa waati la

⁵⁷ sann'i ka juguya ka bɔ kɛnɛ kan. Sisan, edɔmuw ka duguw n'u dafɛduguw, ani filisiw ka duguw be e le mafiɲɛya, olu minw b'i mangoyara faan bɛɛ la.

⁵⁸ I bena lɔ n'i ka kakalaya, n'i ka kokolonw kunko ye. Ne Masaba le ko ten.

⁵⁹ «Ɔnhɔn, ne Matigi, Masaba ko: I y'i ka kalili mafiɲɛya k'an ka bɛɛn cɛn minkɛ, i ka kan ni min ye, ne bena o kɛ i la.

⁶⁰ Nga ne ye layidu min ta i ye i denmisɛn tuma na, ne hakili bena to o la, ne bena bɛn n'i ye, o min tena cɛn abada.

⁶¹ N'i y'i balimamusow, i kɔrɔmusow n'i dɔgɔmusow ye tuma min na, o tuma na, i hakili bena jigi i ka kɛwaliw la, ka maloya. Ne bena u d'i ma ka kɛ i n'a fɔ i denmusow, nga n tena o kɛ n ka layidu kosɔn, ne ye min ta i ye.

⁶² Ne bena bɛn n'i ye, i ben'a lɔn ko ne ye Masaba le ye.

⁶³ O tuma na, i hakili bena jigi i taamacogokɔrɔ la ka maloya, ni ne ye i ka kɛwaliw bɛɛ yafa tuma min na, i tena se ka foyi fɔ tugu maloya kosɔn. Ne Matigi, Masaba le ko ten.»