Ezekiyɛli 15 - ALA KA KUMA

Ɛrɛzɛnsun be jɛni

¹ Masaba kumana ne fɛ ko:

² «Adamaden, *ɛrɛzɛnlɔgɔ ka fisa ni tuu kɔnɔ lɔgɔ bɛɛ ye wa?

³ Mɔgɔ be se k'a kɛ a makoɲafɛn ye wa? Yala u b'a kɛ ka minandulonfɛn dilan wa?

⁴ Ayi, u b'a don tasuma na k'a jɛni. Ni tasuma y'a dakun fila jɛni, n'a cɛmancɛ be manana, a be se ka fɛɛn ɲa tugu wa?

⁵ K'a dafanin to, nafa tun t'a la, sankofɛrɛ n'a jɛnina. Mɔgɔ be se ka mun kɛ n'a ye tugu?

⁶ «O le kosɔn, ne Matigi, Masaba ko: U be ɛrɛzɛnlɔgɔ ta k'a don tasuma na ka tuu kɔnɔ yiriw to yen cogo min na, ne bena Zeruzalɛmukaw minɛ o cogo la.

⁷ Ne bena n ɲaa sin u ma. Hali n'u bɔra tasuma kɔnɔ, tasuma bena tila k'u jɛni k'u halaki. Ni ne ye n ɲaa sin u ma k'u kɛlɛ tuma min na, aw ben'a lɔn ko ne ye Masaba le ye.

⁸ Ne bena u ka jamana kɛ yɔrɔlakolon ye, bari u ma tilen ne ma. Ne Matigi, Masaba le ko ten.»