Ezekiyɛli 13 - ALA KA KUMA

Kira galontigɛlaw koo

¹ Masaba kumana ne fɛ ko:

² «Adamaden, Isirayɛli kira minw be kiraya kɛ ka kɛɲɛ n'u yɛrɛ ka miiriya ye, i ka kiraya kɛ olu kama, k'a fɔ u ye ko: ‹Aw ye Masaba ka kuma mɛn!

³ Matigi, Masaba ko: Kira hakilitan minw be tugu u yɛrɛ ka miiriyaw kɔ k'a sɔrɔ foyi ma yira u la, bɔnɛ ye olu ta ye!

⁴ Isirayɛlidenw, kongowulu be tomo kan cogo min na, aw ka kiraw be ten le.

⁵ U ma taga dugu laminikogo cɛnyɔrɔw dilan, u ma dɔ lɔ ka Isirayɛlidenw tanga kɛlɛ kama, min bena kɛ Masaba ka loon na.

⁶ U ka yelifɛnw ye fɛnkolonw ye, u ka kirayakuma ye galon ye. U b'a fɔ ko: Masaba kumana, k'a sɔrɔ Masaba ma u ci. O bɛɛ n'a ta, u be miiri ko u be min fɔ, k'o bena kɛ.

⁷ Aw ye fɛɛn minw ye, o ye fɛnkolonw ye, tiɲɛ tɛ. Aw ye kirayakuma minw fɔ, o te galon ye wa? Aw minw b'a fɔ ko: Masaba kumana, k'a sɔrɔ ne ma foyi fɔ.

⁸ O la, ne Matigi, Masaba ko: Aw ye galon tigɛ, ka yelifɛnkolonw koo fɔ minkɛ, ne be na aw kama. Ne Matigi, Masaba le ko ten.

⁹ Kira minw be yelifɛnkolonw ye ka galonkiraya kɛ, ne bena wili olu kama. U tena sɔrɔ ne ka mɔgɔw ka ɲɔgɔnyew la, u tɔgɔ tena sɛbɛn Isirayɛlidenw ka buruju sɛbɛ kɔnɔ, u tena don Isirayɛli jamana kɔnɔ tugu. O tuma na, aw ben'a lɔn ko ne ye Matigi, Masaba le ye.›

¹⁰ «U be ne ka mɔgɔw nigɛ, ko: ‹Hɛrɛ o hɛrɛ› k'a sɔrɔ hɛrɛ te yen. Ne ka mɔgɔw be kogo lɔ, k'a mɔn. O kosɔn,

¹¹ minw ye kogo mɔn, i k'a fɔ olu ye ko kogo nin bena ben. Sanjiba bena na, ne ben'a kɛ sanbɛrɛ be ben, sanfɔɲɔjugu bena ci.

¹² Ni kogo nin benna tuma min na, mɔgɔw bena aw ɲininga ko: ‹Aw ye min kɛ ka kogo nin mɔn, o be min?›

¹³ O la, ne Matigi, Masaba ko: Ne dusu gwannin ben'a kɛ sanfɔɲɔjugu be wili. Ne diminin ben'a to sanjiba be ben ni sanbɛrɛ ye ka cɛnni kɛ.

¹⁴ Aw ye kogo min mɔn, ne bena o ci k'a ben duguma, a juu bena bɔ kɛnɛma. Kogo nin bena ben, a bentɔ, aw bena halaki. O tuma na, aw ben'a lɔn ko ne ye Masaba le ye.

¹⁵ Ne bena n ka dimi bɛɛ bɔ kogo n'a mɔnbagaw la. Ne ben'a fɔ aw ye ko: ‹Kogo te yen tugu. A mɔnbagaw fana te yen tugu,

¹⁶ Isirayɛli kira nunu, minw tun be kiraya kɛ Zeruzalɛmu koo la ka hɛrɛko fɔ a koo la k'a sɔrɔ hɛrɛ tun te yen.› Ne Matigi, Masaba y'o fɔ.

Lagwɛlikɛlaw be jalaki

¹⁷ «Adamaden, Isirayɛli muso minw be kiraya kɛ k'u yɛrɛ ka miiriya fɔ, i k'i ɲaa sin olu ma ka kiraya kɛ u kama

¹⁸ k'a fɔ ko ne Matigi, Masaba ko: ‹Musow, aw minw be bololasɛbɛw dilan ka musɔrɔ siri mɔgɔw kuun na, mɔgɔkɔrɔba fara denmisɛnw kan, janko k'u sɔrɔ aw ka fanga kɔrɔ, bɔnɛ ye aw ta ye. Aw b'a miiri ko aw bena ne ka mɔgɔw kɛ ten k'aw yɛrɛ nii kisi kɛ?

¹⁹ Aw ye ne tɔgɔ cɛn ne ka mɔgɔw cɛma bolo ɲaa damani suman ni buru kunkurun damani kosɔn. Mɔgɔ minw man kan ka faga, aw be olu faga, minw ka kan ka sa, aw be olu to yen, ka ne ka mɔgɔw nigɛ, minw be galon lamɛn.›

²⁰ O la, ne Matigi, Masaba ko: Ne te sɔn aw bololasɛbɛw ma, aw be mɔgɔw ɲaa siri ni minw ye. Ne bena u tigɛ ka bɔ aw bolow la. Aw ye mɔgɔ minw minɛ jaan na i n'a fɔ kɔnɔninw, ne bena olu labila.

²¹ Ne bena aw ka musɔrɔw faran ka ne ka mɔgɔw kisi ka bɔ aw bolo. U tena kɛ aw ka fanga kɔrɔ tugu. O tuma na, aw ben'a lɔn ko ne ye Masaba le ye.

²² Aw ye mɔgɔtilenninw fari faga n'aw ka galonw ye k'a sɔrɔ ne ma kojugu latigɛ u kama, aw ye mɔgɔjuguw jaa gwɛlɛya janko u kana u ka sirajuguw bila k'u nii kisi minkɛ,

²³ o la, aw tena yelifɛnkolon si ye tugu, aw tena lagwɛli kɛ tugu. Ne bena n ka mɔgɔw kisi ka bɔ aw bolo. O tuma na, aw ben'a lɔn ko ne ye Masaba le ye.»