Ezekiyɛli 10 - ALA KA KUMA

Masaba b'a ka nɔɔrɔ yira Ezekiyɛli la

¹ Ne ye filɛli kɛ ka fɛɛn dɔ ye *serubɛn nunu kuun sanfɛ. O fɛɛn nin tun be i ko kabakuru bulaman dɔ, a bɔnin tun be masasigilan fɛ.

² Masaba y'a fɔ fani ɲanaman tigi ye ko: «Wotorosen bisigi minw be serubɛnw jukɔrɔ, i ka don olu cɛma. I bolo fa takami na ka bɔ serubɛnw cɛma, ka ta'a yɛrɛkɛ dugu nin kan.» Ne y'a taatɔ ye.

³ Serubɛnw lɔnin tun be Alabatoso kinibolo ɲafan fɛ. Fani ɲanaman tigi nin donna tuma min na, sankaba ye soo kɔnɔnalu fa.

⁴ O tuma na, Masaba ka nɔɔrɔ wilila ka bɔ serubɛnw sanfɛ ka taga Alabatoso donda la. Sankaba ye soo nin fa, Masaba ka nɔɔrɔ tun be manamana luu kɔnɔ yɔrɔ bɛɛ.

⁵ Serubɛnw gamanw mankan bɔra fɔɔ kɛnɛmalu kɔnɔ. O tun be i n'a fɔ Setigi Ala kumakan.

⁶ Masaba y'a fɔ fani ɲanaman tigi ye tuma min na ko a ka takami cɛ serubɛnw jukɔrɔ, wotorosen bisigiw cɛma, a tagara lɔ seen kelen kɔrɔ.

⁷ Serubɛn kelen y'a bolo sin tasuma faan fɛ serubɛnw cɛma. A ye takami cɛ, k'a don fani ɲanaman tigi bolo. Ale y'o minɛ ka bɔ.

⁸ Mɔgɔ bolo bisigi dɔ tun be serubɛnw gamanw jukɔrɔ.

⁹ Ne ye filɛli kɛ tugu, ne ye seen naani ye serubɛnw gɛrɛfɛ, seen kelen tun be u kelen kelen bɛɛ gɛrɛfɛ. U tun be manamana i n'a fɔ kabakuru sɔngɔgwɛlɛn dɔ.

¹⁰ Seen naani nunu bɛɛ tun bɔnin be ɲɔgɔn fɛ. U kelen kelen bɛɛ tun be i ko u dondonnin be ɲɔgɔn na.

¹¹ N'u be tagara, u tun be se ka taga faan naani nunu bɛɛ la. U tun te yɛlɛma ka sɔrɔ ka taama daminɛ. U ɲaa tun sinnin be faan min ma, u tun be taga yen, u te yɛlɛma.

¹² Serubɛn nunu fari yɔrɔ bɛɛ tun ye ɲadenw ye, u kɔɔ n'u bolow n'u gamanw, ani u jukɔrɔ seen naani nunu bɛɛ.

¹³ Ayiwa, ne y'a mɛn ko u be seen nunu wele ko fununfunun.

¹⁴ Ɲada naani tun be serubɛn nunu kelen kelen bɛɛ fɛ. A fɔlɔ ɲada tun ye serubɛn ɲada ye, a filanan tun ye mɔgɔ ta ye, a sabanan tun ye jara ta ye, a naaninan tun ye sɛgɛn ɲada ye.

¹⁵ O kɔ, serubɛn nunu wilila sanfɛ. Ne tun ye nimanfɛn minw ye Kebari baa daa la, olu tun lo.

¹⁶ N'u be tagara, seenw be munumunu u kɔrɔ. N'u y'u gamanw kɔrɔta ko u be wili sanfɛ, seen nunu tun te bɔ u kɔrɔ.

¹⁷ N'u lɔra, seen nunu fana be lɔ. N'u be wili sanfɛ, u ni seenw be wili ɲɔgɔn fɛ, bari nimanfɛn nunu sago le tun be seen nunu fana na.

Ala ka nɔɔrɔ be bɔ a batoso kɔnɔ

¹⁸ Masaba nɔɔrɔ wilila ka bɔ Ala ka soo donda la ka taga lɔ *serubɛn nunu sanfɛ.

¹⁹ Serubɛnw y'u gamanw kɔrɔta ka wili ka bɔ duguma ne ɲana. U taatɔ, seen nunu tagara n'u ye. U lɔra Masaba ka soo donda la min be kɔrɔn ɲafan fɛ. Isirayɛli ka Ala nɔɔrɔ tun b'u sanfɛ.

²⁰ Ne tun ye nimanfɛn naani minw ye Isirayɛli ka Ala jukɔrɔ, Kebari baa daa la, olu tun lo. Ne y'a faamu ko u ye serubɛnw ye.

²¹ Ɲada naani ni gaman naani tun be u kelen kelen bɛɛ fɛ, ani mɔgɔ bolo bisigi tun be u gamanw jukɔrɔ.

²² Ne tun ye nimanfɛn minw ye Kebari baa daa la, serubɛn nunu ɲada bɔnin tun be olu fɛ. U kelen kelen bɛɛ tun be tilen ka taga u ɲafɛ le.