Ezayi 66 - ALA KA KUMA

Masaba bena mɔgɔ bɛɛ kiti

¹ Masaba ko: «Sankolo ye n ka masasigilan ye, dugukolo ye n seen bilayɔrɔ ye. Aw do bena se ka boon jumɛn lɔ ne ye? Yɔrɔ jumɛn bena kɛ ne ka lafiɲɛyɔrɔ ye?

² Ne le y'o fɛɛn nunu bɛɛ dan, o bɛɛ ye ne bulonɔ ye. Ne Masaba le ko ten. Mɔgɔ min b'a yɛrɛ majigi, mɔgɔ min dusu b'a jalaki, mɔgɔ min be siran ne ɲa ka sɔn n ka kuma ma, ne b'o tigi le filɛ.

³ Mɔgɔ dɔw be misi saraka ka tila ka adamaden faga. U be saga saraka ka tila ka wulu kuun ci. U be suman saraka bɔ ka tila ka lɛɛ joli bɔn. U be wusulan jɛni ne ye ka tila ka joo sɔn. Mɔgɔ nunu y'a latigɛ k'u b'u yɛrɛ sago kɛ, u be nisɔndiya kojugu nunu la.

⁴ Ne y'a latigɛ ko n bena u tɔɔrɔ. U be siran koo min ɲa, ne ben'a to o le b'u sɔrɔ. Bari, ne tun ye weleli kɛ, mɔgɔ si m'a laminɛ, ne tun kumana, mɔgɔ si m'a tulo malɔ. U ye kojugu kɛ ne ɲakɔrɔ. Koo min man di ne ye, u tora k'o le kɛ.»

⁵ Aw minw be siran Masaba ɲa ka sɔn a ka kuma ma, aw y'aw tulo malɔ a ka kuma na. Aw balima minw b'aw kɔniya, n'u b'aw gwɛn ne kosɔn, olu b'a fɔ ko: «Masaba k'a ka setigiya yira, o la, an bena aw nisɔndiyatɔ ye.» Ayiwa, olu le bena maloya.

⁶ Kumakanba dɔ be bɔra dugu kɔnɔ, kumakan dɔ be bɔra Alabatoso kɔnɔ. Masaba kaan lo. A b'a la k'a juguw sara u ka kɛwaliw la.

⁷ Sanni a ka tiin ka daminɛ, o y'a sɔrɔ a jigira. Sanni a ka kɔnɔdimi ka daminɛ, o y'a sɔrɔ a ye dencɛ wolo.

⁸ Jɔn ye nin mɛn ka ye? Jɔn delila ka nin ɲɔgɔn ye? Jamana be sigi loon kelen wa? Jamanadenw be wolo loon kelen wa? O bɛɛ n'a ta, *Siyɔn kɔnɔ dimitɔ, a y'a deenw wolo.

⁹ «Ne be se k'a to musokɔnɔman b'a ka kalo dafa ka tila k'a bali jigi ma wa? Ne Masaba le ko ten. Ne min b'a to kɔnɔ be sɔrɔ, ne ben'a woloko bali wa?» I ka Ala ko ten.

¹⁰ Zeruzalɛmu koo ka di aw minw bɛɛ ye, aw ka nisɔndiya n'a ye, aw k'a kɛ aw ka nisɔndiya sababu ye. Aw minw bɛɛ dusu kasinin tun lo a kosɔn, aw ye nisɔndiya n'a ye kosɔbɛ.

¹¹ O la, aw ben'a siin min fɔɔ ka fa, siin min be mɔgɔ dusu saalo. Aw ben'a sinɲuman diya lɔn kosɔbɛ.

¹² Bari, Masaba ko: «N bena na ni hɛrɛ ye Zeruzalɛmu kɔnɔ i ko baji woyotɔ, ka na ni siya wɛrɛw ka nafolow ye i ko baa min fara fɔɔ ka yɛrɛkɛ. Aw bena siin min, u bena aw ta u gɛrɛn na, k'aw nigɛnigɛ u kunbiri kan.

¹³ Bamuso b'a deen dusu saalo cogo min na, ne bena aw dusu saalo ten. Zeruzalɛmukaw dusu bena saalo.

¹⁴ Aw ben'a ye, o bena aw dusu diya. Aw fari bena nugu i ko biin.» Masaba ben'a ka baarakɛlaw dɛmɛ k'a dimi bɔ a juguw la.

¹⁵ Jaati! Masaba filɛ nin ye. A be nana tasuma kɔnɔ, a ka kɛlɛkɛwotorow ka teli i ko funufunu. A ben'a dimi bɔ ni fariya ye, a ben'a ɲaa gwan ni tasuma ye.

¹⁶ Masaba bena mɔgɔw kiti ni tasuma le ye, a bena murujan le kɛ ka bɛɛ kiti. A bena mɔgɔ caaman faga.

¹⁷ Masaba ko: «Minw b'u yɛrɛ saniya ka sɔrɔ ka tugu ɲɔgɔn kɔ ka don tuuw kɔnɔ ka sɔnni kɛ, n'u be to ka lɛsogo ni ɲinansogo ɲimi, ani tanafɛn wɛrɛw, o mɔgɔ nunu bɛɛ bena halaki.

¹⁸ Ne b'u ka kɛwaliw n'u ka miiriyaw lɔn. Ne be nana siyaw ni jamanaw bɛɛ lajɛn waasa u ka ne ka nɔɔrɔ ye.

¹⁹ «Ne bena taamasiɲɛ bila u cɛma. Minw bena kisi n ka kiti kɔfɛ, n bena olu ci Tarisisi jamana la, ni Puti, ani Ludi, minw be se kalabon na, ni Tubali, ni Yaban ani jii cɛma dugukolo minw be yɔrɔjan, minw ma deli ka ne koo mɛn, u ma deli ka n ka sebagaya ye. U bena n ka sebagaya koo fɔ siya wɛrɛw ye.

²⁰ U bena na n'aw balimaw bɛɛ ye ka bɔ n'u ye siyaw bɛɛ cɛma soow kan, wotorow kɔnɔ, ni sofaliw ni ɲɔgɔmɛw kan, fɔɔ ne ka kulu senuman kan Zeruzalɛmu, k'o kɛ ne boɲafɛn ye. Ne Masaba le ko ten. U bena na n'u ye i n'a fɔ Isirayɛlidenw be na n'u ka boɲafɛnw ye cogo min na minan saniyaninw kɔnɔ ne Masaba ka soo.

²¹ Ne bena sarakalasebagaw, ni Levi kɔmɔgɔw woloma u cɛma. Ne Masaba le ko ten.

²² «Ne bena sankolokura ni dugukolokura minw dan, olu bena to yen ne ɲakɔrɔ. Aw tɔgɔ n'aw kɔmɔgɔw bena to ne ɲakɔrɔ ten. Ne Masaba le ko ten.

²³ Kalokura o kalokura, lafiɲɛlon o lafiɲɛlon, mɔgɔ bɛɛ bena na biri ne ɲafɛ ka ne bato. Ne Masaba le ko ten.

²⁴ Ni mɔgɔw bɔra, minw tun murutira ne ma, u bena olu suuw lalanin ye. Tumu minw bena don u la, olu tena sa. Tasuma min bena u jɛni, o tena faga. U bena kɛ fɛnjugu ye mɔgɔ bɛɛ fɛ.»