Ezayi 64 - ALA KA KUMA

¹ I tun bena kɛ i ko tasuma be kalamisɛn jɛnina, i ko a be jii wiliwili cogo min na. I tun bena i yɛrɛ yira i juguw la ten, u k'i lɔn, siyaw tun bena yɛrɛyɛrɛ i ɲa!

² I ye kabako dɔw kɛ tuma min na, an tun te miiri minw na, i jigira, kuluw yɛrɛyɛrɛla i ɲa.

³ Mɔgɔ si ma deli k'a mɛn, mɔgɔ si ma deli k'a fɔ, mɔgɔ si ɲaa ma deli k'a ye ko batofɛn wɛrɛ be yen, ka ele niin bɔ a la, min b'o ɲɔgɔn kɛ mɔgɔ ye min jigi b'i kan.

⁴ Mɔgɔ minw be tilenninyako kɛ ni nisɔndiya ye, minw b'i ka sira taama, ka miiri i la, i be olu kunbɛn. A ye! I dimina, bari anw y'a sira i ka bila. N'an y'o fɔlɔfɔlɔsira nunu ta, an bena kisi.

⁵ Anw bɛɛ nɔgɔnin lo. An ka kɛwaliɲumanw bɛɛ be i ko fani nɔgɔnin. Anw fasara, an ka hakɛw b'an ta ka taga i ko fɔɲɔ.

⁶ Mɔgɔ si t'i daali tugu, mɔgɔ si te jijara ka nɔrɔ i la yɛrɛ. Bari, e y'i yɛrɛ dogo an na, i y'an to an be halakira an ka kojuguw kosɔn.

⁷ O n'a ta bɛɛ, ele Masaba le ye an Faa ye. Anw ye bɔgɔmana ye, ele ye dagadilanbaga ye. Anw bɛɛ ye ele bulonɔ ye.

⁸ Masaba, kana dimi k'a dama tɛmɛ sa! Kana an ka kojuguw to i kɔnɔ tuma bɛɛ. An filɛ sa! An bɛɛ le y'i ka jama ye.

⁹ I ka dugu senumanw kɛra yɔrɔlakolon ye. *Siyɔn kɛra yɔrɔlakolon ye, Zeruzalɛmu kɛra dusukasiyɔrɔ ye!

¹⁰ I batosoɲuman senuman kɛra tasuma ta ye, an faaw tun b'i tanu soo min kɔnɔ. Yɔrɔ minw bɛɛ koo tun ka gwɛlɛ an ma, o bɛɛ halakira.

¹¹ Masaba, i bena nin bɛɛ ye k'a to wa? I bena je k'an maloya ka dama tɛmɛ wa?