Ezayi 61 - ALA KA KUMA

Masaba ka mɔgɔwolomanin ka koo

¹ Matigi, Masaba ka Nii be ne fɛ. Bari, a ye ne woloma ka n ci ka kibaru diman fɔ fantanw ye, ka mɔgɔ dusukasininw dusu saalo, ka hɔrɔnya wango la mɔgɔw ye minw minɛna ka taga, ka kasodenw bilako wango la.

² A ye ne ci ka Masaba ka ɲumanya saan koo fɔ, k'an ka Ala ka mɔnɛ bɔlon koo wango la. A ye ne ci ka dusukasibagaw bɛɛ dusu saalo.

³ A ye ne ci ka *Siyɔnka dusukasininw ka dusukasi ban k'u nisɔndiya kosɔbɛ, ka tanuli don u dusu la ɲanasisi nɔɔ na. U bena kɛ i ko yiri minw be Masaba ka boɲa yira, i ko nankɔ min b'a ka nɔɔrɔ yira.

⁴ Yɔrɔ minw cira kabini fɔlɔfɔlɔ la, boon minw kɛra tomo ye kabini tumajan, u bena olu lɔ. Dugu minw cɛnna, u bena olu lalaga. Minw halakira kabini waatijan.

⁵ Jamana wɛrɛ mɔgɔw bena kɛ aw ka begɛnw dɛndɛbagaw ye. Yɔrɔ wɛrɛ mɔgɔw le bena kɛ aw ka sɛnɛkɛlaw ye. U bena aw ka *ɛrɛzɛnforow lalaga.

⁶ Aw kɔni, u bena aw wele ko Masaba ka sarakalasebagaw, u bena aw wele ko an ka Ala ka baarakɛlaw. Aw bena siya wɛrɛw ka nafolo dumu, aw bena u ka kunkɔrɔtafɛnw kɛ aw ka masirifɛnw ye.

⁷ Masaba ko: «Aw tun ye maloya sɔrɔ kosɔbɛ. Aw tun ye dɔgɔya sɔrɔ kosɔbɛ. Aw bena dugu caaman sɔrɔ ka nisɔndiya tuma bɛɛ.

⁸ Bari, tilenninya le ka di ne Masaba ye, benkanni, ani namara ka go n ye. Ne bena aw ka sara di aw ma a ɲaa ma, ne bena bɛn n'aw ye tuma bɛɛ.»

⁹ Aw deenw bena lɔn jamana wɛrɛw kɔnɔ, aw kɔmɔgɔw bena lɔn siya wɛrɛw cɛma. Mɔgɔ o mɔgɔ mana u ye, o ben'a lɔn ko Masaba ye barika don u la.

Zeruzalɛmu ka nisɔndiya

¹⁰ Ne Zeruzalɛmu nisɔn ka di kosɔbɛ Masaba barika la. Ne dusu ka di ne ka Ala sababu la. Bari, a ye kisili fani don ne kaan na, a ye tilenninya deleke don ne kaan na, i ko kɔɲɔcɛ min masirinin be ni sarakalasebaga ka kunmelekefani ɲɔgɔn ye, i ko kɔɲɔmuso min y'a yɛrɛ masiri.

¹¹ Biin be bɔ dugukolo la cogo min na, nanfɛnw be bɔ nankɔ la cogo min na, o cogo kelen la Matigi, Masaba ben'a ka tilenninya ni tanuli bɔ siyaw bɛɛ ɲana.