Ezayi 59 - ALA KA KUMA

Kira be jama jalaki

¹ A ma kɛ ko Masaba te se k'aw kisi dɛ! A tulo fana ma gweren k'a fɔ ko a t'aw kaan mɛnna.

² Nga aw ka kojuguw le ye furancɛba don aw n'aw ka Ala cɛ. Aw ka kojuguw le y'a to a y'a yɛrɛ dogo aw la. O la, a te mɛnni kɛ aw fɛ.

³ Aw ye mɔgɔfagalaw ye, aw bolo fanin be joli la. Aw daa be galon le fɔ, aw nɛɛn be kumajugu le fɔ.

⁴ Aw te ɲɔgɔn kiti ka kɛɲɛ ni tiɲɛ ye, aw t'aw ka koo fɔ ni kɔnɔgwɛ ye. Aw b'aw jigi la fuu kan, ka galon tigɛ. Aw be kojugu miiri aw kɔnɔ. O laban be na ni bɔnɛ ye.

^5-6 Aw ka latigɛtaw be i ko saa faan. Ni mɔgɔ min magara a la, o tigi be sa. Ni faan nunu dɔ tɔtɔra, saa le be bɔ a kɔnɔ. Aw be fani minw dan, o be i ko taalen ta. U te se ka mɔgɔ sutara, mɔgɔ te se k'a yɛrɛ biri n'a ye. Nga u be bɔnɛ le lase. Aw b'a la ka fariyakow dama le dabɔ.

⁷ Aw be boliboli waasa ka kojugu kɛ, aw ka teli ka mɔgɔ jalakibali faga. Aw ka miiriya ma ɲi. Aw be tɛmɛ yɔrɔ o yɔrɔ, aw be halakili ni cɛnni le to yen.

⁸ Aw te hɛrɛ sira lɔn. Aw ka tɛmɛsiraw kan, aw te kotilennin kɛ. Aw be taama tilenbaliya la. Ni mɔgɔ o mɔgɔ y'a ta, o tigi ni hɛrɛ faranna.

Jama be sɔn jalaki ma

⁹ O le y'a to tilenninya yɔrɔ ka jan an na, kisili te se an ma. An mako be yeelen na, nga dibi lo be yɔrɔ bɛɛ. An be kɛnɛ fɛ, nga an be taamana dibi la.

¹⁰ An be mɔmɔni kɛra i ko fiɲɛntɔ, kogo gɛrɛfɛ. An be mɔmɔni na i ko ɲaa te mɔgɔ minw fɛ. An be talon tilegwan fɛ i ko sufɛ lo. K'an to kɛnɛya la, an be i ko suuw.

¹¹ An bɛɛ be sɔngɔ i ko wara, an be kasi i ko tuganin ŋunuŋunukan. An be tilenninya kɔnɔna, nga foyi te sɔrɔla. An be kisili kɔnɔna, nga a yɔrɔ ka jan an na.

¹² An ka kojuguw cayara i ɲakɔrɔ, an jalakira an ka hakɛw kama. Tiɲɛ na, an ka kojuguw nɔɔ b'an kan, an sɔnna u ma.

¹³ Min ye an ka murutiko ye e Masaba ma, ani ka ban i la, ka ban ka tugu e, an ka Ala kɔ, ka to mɔgɔtɔɔrɔkuma ni murutili ta la. An kɔnɔnakow n'an ka miiriyaw ye galon ye.

¹⁴ O le y'a to tilenninya yɔrɔ jaɲana an na, kisili yɔrɔ ka jan an na. Tiɲɛ te lɔyɔrɔ sɔrɔ forobayɔrɔ la, hɔrɔnya te tɛmɛyɔrɔ sɔrɔ yen.

¹⁵ Tiɲɛ tununa. Mɔgɔ minw te sɔn ka kojugu kɛ, u be ben olu kan. Tilenninya tun te kɛra. Masaba y'o ye, o tun man d'a ye.

Masaba ben'a ka jama kisi

¹⁶ A y'a ye ko mɔgɔ si te dɔ kɛra. Mɔgɔ si tun te magamaga, o y'a kabakoya. O la, a yɛrɛ le ye dɛmɛ kɛ a ka tilenninya sababu la.

¹⁷ A ye tilenninya kɛ a ka nigɛkunbɛnnan ye, a ye kisili nigɛfugulan biri a kuun na. A ye mɔnɛ bɔko kɛ a kannafani ye, a ye jijali kɛ a ka birifani ye.

¹⁸ A be mɔgɔw sara ka kɛɲɛ n'u ka kɛwaliw ye. A ben'a juguw bɛɛ ɲaa gwan kosɔbɛ. Mɔgɔ minw be jii cɛma dugukolow kan, a bena olu ɲaa gwan.

¹⁹ O la, k'a ta kɔrɔn fɛ fɔɔ tileben fɛ, mɔgɔw bena siran Nɔɔrɔtigi Masaba ɲa. Bari, a bena na i ko fɔɲɔ ye jiba min ta.

²⁰ Kunmabɔbaga bena na *Siyɔn kosɔn. Yakuba kɔmɔgɔ minw y'u ka hakɛw dabila, a bena na olu kunmabɔ. Masaba le ko ten.

²¹ Masaba ko: «Ne be layidu min ta aw ye, o filɛ: Ne ye n Nii min d'aw ma, ne ye n ka kuma min don aw daa la, aw tena o fɔ dabila fewu, aw deenw tena o fɔ dabila, aw deenw ka deenw tena o fɔ dabila fana, kabini sisan fɔɔ tuma bɛɛ.» Masaba le ko ten.