Ezayi 57 - ALA KA KUMA

¹ Mɔgɔtilenninw be halaki, hali mɔgɔ si te hami u koo la. Mɔgɔɲumanw be sa, hali mɔgɔ si t'o faamu. Tiɲɛ na, mɔgɔtilennin be sa mɔgɔjuguw ka juguya le kosɔn.

² Mɔgɔ min be tilenninya kɛ, ale bena hɛrɛ sɔrɔ, a bena lafiɲɛ a layɔrɔ la.

Josɔnlaw jalakiko

³ «Aw ye gwɛrɛ, aw, subagamuso deenw, kakalamusoa deenw, ɲamɔgɔden nunu!

⁴ Aw b'aw ɲaa donna jɔn na? Aw be yɛlɛla jɔn ma ka to k'aw nɛɛn bɔ k'a don? Aw te deen murutininw ye wa? Galontigɛla deenw!

⁵ Aw be bolibolila yiribabaw kɔrɔ ni yiriw bɛɛ kɔrɔ, minw furaburu fara. Aw be joow sɔn ni denmisɛnw ye kɔdingɛw kɔnɔ, ni farawow la.

⁶ Kabakuru nugunin minw be kɔdingɛw kɔnɔ, olu le y'aw niyɔrɔ ye. Aw y'o le sɔrɔ. Aw be jii bɔn olu le kan, aw be olu le sɔn. Ne dusu be se ka suma cogo di?

⁷ Aw be taga aw ka layɔrɔ dilan fɔɔ kulujan kunna! Aw be yɛlɛ ka taga sɔnni kɛ yen le.

⁸ Aw b'aw ka joow dulon bondaw kɔfɛla la. Aw ye ne to yen k'aw yɛrɛ walaka. Aw yɛlɛla aw layɔrɔ la ka dɔ fara aw ka dilan kan. Aw be ɲamɔgɔcɛw san ka la ka nisɔndiya n'u ye! Aw be o diya bɔ!

⁹ Aw be taga ni tulu ye *Milikɔmu fɛ, aw y'aw yɛrɛ mɔ kosɔbɛ ni tulu kasadimanw ye. Aw ye cidenw ci yɔrɔjan. Aw y'a kɛ u tagara fɔɔ lahara!

¹⁰ Aw y'o sira nin bɛɛ taama ka sɛgɛn, nga aw m'a fɔ ko aw bena o koo ye k'a to yen. Aw ye barika sɔrɔ tugu, o la, aw fari ma faga.

¹¹ Jɔn le y'aw siran ten fɔɔ aw ye ne janfa? Aw te ne ka koo miiri tugu, aw te hami ne ka koo la tugu. Ne jera kabini tumajan minkɛ, o le y'a to aw te siranna ne ɲa.

¹² Ayiwa, ne bena aw ka tilenninya, n'aw ka kɛwaliw koo fɔ, nga u tena foyi ɲa aw ye.

¹³ N'aw ye daalili kɛ, aw tun ye joo minw lajɛn ɲɔgɔn kan, olu k'aw kisi. Fɔɲɔ le bena olu bɛɛ ta, dafiɲɛ fiyɛko kelen bena taga n'u ye. Nga mɔgɔ o mɔgɔ b'a yɛrɛ kalifa ne ma, o tigi bena jamana nin tigiya kɛ. Ne ka kulu senuman bena kɛ o tigi niyɔrɔ ye.»

Masaba ben'a ka jama kɛnɛya

¹⁴ Masaba ko: «Aw ka sira labɛn, aw ka sira labɛn! Aw ye seen talonfɛnw bɔ ne ka mɔgɔw ɲa.

¹⁵ Bari, min siginin be fɔɔ sanfɛ, fɛɛn bɛɛ sanfɛ, ale min be yen tuma bɛɛ, ale min tɔgɔ ko Senuman, ale lo ko: Ne sigiyɔrɔ be fɔɔ sanfɛ, yɔrɔ senuman na. O bɛɛ n'a ta, ne be ni nimisabaga ye, min majiginin be, waasa ka barika don a la k'a jaa gwɛlɛya.

¹⁶ Ne tena mɔgɔw jalaki tuma bɛɛ, ne diminin tena to waati bɛɛ. N'o tɛ, mɔgɔw tun bena sa ne ɲakɔrɔ, ne tun ye minw dan.

¹⁷ U ka wasabaliya kama lo, ne tun dimina. Ne y'u bugɔ, ka n yɛrɛ dogo u la dimi bolo. Nga, u murutinin tora k'u yɛrɛ sagolakow kɛ.

¹⁸ Ne b'u ka sira lɔn, o bɛɛ n'a ta, ne bena u kɛnɛya. Ne bena kɛ u ka ɲabila ye, ne bena olu n'u ka mɔgɔ dusukasininw dusu saalo.

¹⁹ Ne bena tanuli don u daa la ko: Hɛrɛ o hɛrɛ, o ye yɔrɔjan mɔgɔ, ani yɔrɔsurun mɔgɔ ta ye. Ne bena u kɛnɛya. Ne Masaba le ko ten.»

²⁰ Nga mɔgɔjugu kɔni, ale be i ko kɔgɔji min be wiliwilila. A te se ka lɔ yɔrɔ kelen. A jii be wili ni bɔgɔ, ani ɲamaɲama ye.

²¹ Ne ka Ala ko: «Mɔgɔjuguw tena hɛrɛ sɔrɔ abada!»