Ezayi 54 - ALA KA KUMA

Ala ma Zeruzalɛmu bila

¹ «Nisɔndiyapɛrɛnkan bɔ, Zeruzalɛmu, e muso wolobali! Ele min tun te deen sɔrɔla tugu. Pɛrɛn! Nisɔndiyamankan ci, ele min tun te deen wolola tugu, bari gwalemuso deenw cayara ni baaramuso taw ye.» Masaba ko ten.

² Dɔ fara i ka soo boɲa kan. A lɔ k'a waga, kan'a sɔngɔ filɛ. A lɔgɔw jaɲa. Tutunanw tutu ka ɲa!

³ Bari i ka yɔrɔ bena boɲa kinibolo ni numanbolo fɛ. I deenw bena siya wɛrɛw ka yɔrɔw bɔsi. Dugu minw lakolon tora, mɔgɔw bena kɔsegi ka sigi olu kɔnɔ tugu.

⁴ Kana siran, i tena maloya. Kan'i hakili ɲagami, i kuun tena surun. Maloya min y'i sɔrɔ i ka sunguruya waati la, i bena ɲinɛ o kɔ. I ye dɔgɔya min sɔrɔ i ka firaya waati la, i hakili tena to o la.

⁵ Bari i Danbaga ye i ka cɛɛ le ye. Masaba, Setigi, o le y'a tɔgɔ ye. Isirayɛli ka Ala le ye i kunmabɔbaga ye. U b'a wele ko dugukolo bɛɛ tigi Ala.

⁶ I kɛra i ko muso, min cɛɛ mako t'a la, i dusukasinin lo. Masaba y'i wele ko i ka kɔsegi. I ka Ala ko: «Mɔgɔ be se k'a ka kanbelenya waati muso ka furu cɛn wa?

⁷ I koo tun goyara ne ye waati dɔɔni kɔnɔ dɔrɔn. Nga, i hinɛ bena don n na kosɔbɛ, ne bena sɔn i ma tugu.

⁸ Dimikojugu fɛ, ne tun ye waati dɔɔni kɛ ni n be n yɛrɛ dogo i la. Nga i koo diyara ne ye, daan te o kanuya la, o la, ne bena makari i la.» Masaba, i kunmabɔbaga le ko ten.

⁹ Ne ben'a kɛ bii i ko Nuhun tile ta. Ne tun y'a fɔ ka gwɛlɛya k'o waati jiba ɲɔgɔn tena dugukolo kunun tugu. O cogo kelen na, ne b'a fɔ ka gwɛlɛya ko n tena dimi i kɔrɔ tugu, ne tena i bagabaga tugu.

¹⁰ Hali ni kuluw yɛrɛkɛra, hali ni tintinw yɛrɛyɛrɛla, foyi tena bɔ ne ka kanuya la i faan fɛ. Ne ye n ka hɛrɛ bɛɛn min kɛ, o tena cɛn abada!» Masaba le ko ten, ale min be makari i la.

¹¹ Zeruzalɛmu, bɔnɛ tun y'i sɔrɔ, balawu y'i tɔɔrɔ, dususaalobaga tun t'i la. Masaba ko: «Ne bena e lɔ ni soo masiri kabakuru ye. Ne bena i juu sigi kabakuru bulaman kan.

¹² N bena i kogo sanfɛla kɛ ni kabakuruwulenw ye, k'i dondalakonw kɛ ni kabakuru bulalamanw ye, k'i laminikogo bɛɛ lɔ ni kabakuru sɔngɔgwɛlɛnw ye.

¹³ I deenw bɛɛ bena kɛ Masaba ka kalandenw ye, i deenw ka hɛrɛ bena boɲa.

¹⁴ I sigicogo bena ɲa. Benkanni yɔrɔ bena jaɲa i la, i tena siran tugu. Jatigɛko yɔrɔ bena jaɲa i la, o tena se i ma tugu.

¹⁵ Ni dɔw b'i kɛlɛ, o tena kɛ ne nɔɔ ye. I kɛlɛbagaw bena ben i ɲafɛ.

¹⁶ Ayiwa, ne le ye numu dan, min be takami fiyɛ ka maramafɛnw dilan. Ne ye cɛnnikɛla fana dan cɛnni kama.

¹⁷ Kɛlɛkɛminan fɛɛn o fɛɛn dilanna i kama, o si tena foyi ɲa. Daa o daa man'a fɔ ko a b'i jalaki kititigɛyɔrɔ la, i ben'a ka kuma kɔɔ kari. O le bena kɛ ne Masaba ka baarakɛlaw niyɔrɔ ye. Ne bena u kɛ sesɔrɔbagaw ye.» Masaba le ko ten!