Ezayi 51 - ALA KA KUMA

Ala ka kisili ye tuma bɛɛ koo ye

¹ Masaba ko: «Aw minw b'a fɛ ka kisi, aw minw be ne Masaba ɲinina, aw ka mɛnni kɛ ne fɛ. Aw bɔra fara min na, aw k'o jati. Aw bɔra yɔrɔ min na, aw k'o jati.

² Aw k'aw faa Ibrayima n'aw baa Sara filɛ. Ne ye Ibrayima wele tuma min na, deen tun t'a fɛ. Ne ye barika don a la, a ye deen caaman sɔrɔ.»

³ *Siyɔn makari ye Masaba minɛ, a tomow bɛɛ hinɛ donn'a la. A bena yɔrɔlakolon nin yɛlɛma k'a kɛ i ko Edɛn, yɔrɔɲuman. A bena yɔrɔ janin nin yɛlɛma k'a kɛ i ko ale Masaba ka yɔrɔ. Nisɔndiya bena sɔrɔ yen kosɔbɛ. Dɔnkiliw ni fɔliminanw mankan bena bɔ yen.

⁴ Masaba ko: «Ne ka jama, aw ye mɛnni kɛ ne fɛ, ne ka mɔgɔw, aw ye tulo malɔ ne fɛ. Bari, sariya be bɔ ne le fɛ. N be tilenninyako min fɔra, o bena yeelen bɔ siyaw ye.

⁵ Ne bena mɔgɔw kisi waati min na, o surunyana kosɔbɛ. Dɔɔni, n bena u kunmabɔ, n bena tilenninya kɛ siyaw cɛma. Jii cɛma dugukolo kan mɔgɔw bena u jigi la ne kan, u bena u jigi la ne ka fanga kan.

⁶ Aw k'aw kuun kɔrɔta ka filɛli kɛ sankolo la, ka tila k'aw kuun biri ka filɛli kɛ duguma. Sankolo bena tunu i ko sisi, dugukolo bena kɔrɔ i ko fani. Mɔgɔ minw b'a kan, olu bena sa i ko limɔgɔw. Nga ne ka kisili bena kɛ tuma bɛɛ koo le ye. Daan te ne ka tilenninya la.

⁷ Aw minw be tilenninya lɔn, n ka sariya be aw minw kɔnɔ, aw k'aw tulo malɔ ne fɛ. Aw kana siran adamadenw ka dɔgɔya ɲa, aw kan'a to u ka nɛnili k'aw jaa tigɛ.

⁸ Bari, bagabaga bena u dumu i ko fani, tumu bena don u la i ko sagasifani. Ne ka kisili ye tuma bɛɛ koo le ye. A bena se waati bɛɛ mɔgɔw ma.»

Masaba, wili

⁹ Wili! Masaba, wili joona! Wili k'i ka sebagaya yira. Wili i ko fɔlɔfɔlɔ, wili i ko waatijan tɛmɛnin na. Elo lo ma kɔgɔji kɔnɔ fɛnjugu tigɛtigɛ wa? Sogojugu min be kɔgɔji kɔnɔ, elo lo m'o sɔgɔ wa?

¹⁰ Elo lo ma kɔgɔji ja wa? Elo lo m'a kɛ jiba nin jara wa? I ye tɛmɛyɔrɔ kɛ a dingɛ kɔnɔ, janko mɔgɔ minw kunmabɔra, olu ka se ka tɛmɛ yen.

¹¹ Masaba ye minw kunmabɔ, olu bena kɔsegi ka na. U bena don *Siyɔn kɔnɔ ni nisɔndiyapɛrɛnkan ye, nisɔndiya banbali bena kɛ u ta ye. U bena nisɔndiya kosɔbɛ, tɔɔrɔ ni dusukasi yɔrɔ bena jaɲa u la.

Masaba ka jama man kan ka siran

¹² Masaba ko: «Ne le y'aw dusu saalobaga ye. Mun na aw be siran adamaden ɲa? Fɛɛn min bena sa. A ka koo ni biin ta bena kɛ kelen ye.

¹³ Aw ɲinɛna ne Masaba aw Danbaga kɔ cogo di? Ne min ye sankolo fɛnsɛn ka dugukolo dan. Aw be to ka yɛrɛyɛrɛ tile kuturu kɔnɔ aw tɔɔrɔbagaw ka fariya kosɔn, min labɛnnin lo cɛnni kama. Aw tɔɔrɔbagaw ka fariya be min?

¹⁴ Yanni dɔɔni, kasoden ɲanibagatɔw bena labila, u tena sa kaso la, dumuni tena dɛsɛ u la tugu.

¹⁵ Ne le ye Masaba ye, aw ka Ala. Ne le be kɔgɔji kɛ a be jikuru wili ka mankan kɛ. Ne tɔgɔ lo ko Masaba, Setigi!

¹⁶ Ne min ye sankolo fɛnsɛn ka dugukolo dan, ne y'a fɔ *Siyɔnkaw ye ko: ‹Aw ye ne ka mɔgɔw ye.› Ne be n ka kuma don aw daa la, ne be n bolo kɛ k'aw dogo.»

Zeruzalɛmu wiliko

¹⁷ Wili, Zeruzalɛmu! Wili joona ka lɔ. E min ye Masaba ka dimi filen min i ko jii, min be mɔgɔ ɲanamini. I y'a min k'a kɛ korokoro.

¹⁸ I ye deen minw bɛɛ wolo, u si ma bila i ɲa k'i bila sira. I ye deen minw lamɔ, u si ma i bolo minɛ.

¹⁹ Bɔnɛ fila sera i ma. Cɛnni ni halakili sera i ma, kɔngɔ ni kɛlɛ sera i ma. Jɔn le bena i makari filɛ? Jɔn le bena i dusu saalo?

²⁰ I deenw nagasinin be ka la dugu kɔnɔ sira faranyɔrɔw bɛɛ la. U be i ko mankalanin, jaan kɔnɔ. O be kɛra Masaba ka dimi n'a ka jalakili kosɔn.

²¹ Ayiwa, e min sigɛnnin lo, e min ɲaa be miniminina, k'a sɔrɔ duvɛn nɔɔ tɛ, i tulo malɔ nin na:

²² I Matigi, Masaba, i ka Ala n'a ka jama tangabaga ko: «Ne bena filen nin bɔsi i bolo, min be mɔgɔ ɲanamini, ne ka dimi be min kɔnɔ. I ten'a min tugu!

²³ Ne ben'a di i tɔɔrɔbagaw ma, minw tun b'a fɔ i ye ko: ‹I ka la ka biri, an bena taama i kan!› I tun y'i kɔɔ kɛ sira ye, i y'a kɛ sira ye tɛmɛbagaw fɛ.»