Ezayi 48 - ALA KA KUMA

Isirayɛlidenw jalakiko n'u kisiko

¹ «Isirayɛlidenw, aw tulo k'aw malɔ! Isirayɛli tɔgɔ lara aw minw kan, aw minw bɔra Zuda joli la, aw minw be kali ni Masaba tɔgɔ ye, aw minw be Isirayɛli ka Ala daali. Nga o te kɛ ni sɔbɛ ye, tilenniya fana t'a la.

² K'a sɔrɔ aw b'aw yɛrɛ boɲa ko aw ye dugu senuman nin deenw ye. Aw b'aw bolo la Isirayɛli ka Ala kan, ale min tɔgɔ ko Masaba, Setigi.

³ Koo minw bena kɛ, ne y'o fɔ kabini tumajan. O bɔra n daa la, ne y'o fɔ ka kɔrɔ. Ne y'o kɛ yɔrɔnin kelen, o fana ɲanabɔra.

⁴ Ne y'a lɔn ko aw tulo te mɛnni kɛ, aw tulo ka gwɛlɛ kosɔbɛ.

⁵ O la, ne y'o fɔ aw ye kabini tumajan. Yanni u ka kɛ, ne kɔnna k'u fɔ, janko aw kan'a fɔ ko aw ka joow le yo koo nunu kɛ. Ko aw ka joo lɔgɔlaman, walima nigɛlaman le yo koow latigɛ.

⁶ Ne kɔnna ka koo nata min fɔ, aw y'o mɛn. A filɛ sisan n'o be kɛra. Aw tena sɔn o ma wa? Ayiwa, ne be kokuraw fɔ aw ye sisan. Kodogoninw lo, aw te dɔ lɔn o la.

⁷ O te kokɔrɔw ye, sisan lo u bena kɛ. Fɔɔ ka na se bii ma, aw tun m'o mɛn ka ye, janko aw kan'a fɔ ko aw b'a lɔn.

⁸ Tiɲɛ na, aw m'o mɛn, aw ma dɔ lɔn o la. Kabini tumajan, aw tulo tun te mɛnni kɛ. Ne y'a lɔn ko aw ye namaramɔgɔw ye. Kabini aw wolotuma, u b'aw wele ko murutininw.

⁹ N tɔgɔ kosɔn, n te n dimi bɔ, n ka kunkɔrɔta kosɔn, n b'aw to, n tena aw halaki tugu.

¹⁰ Ayiwa, ne y'aw saniya, o ma kɛ i ko u be warigwɛ kɛ cogo min na dɛ. Ne ye gwɛlɛya kɛ k'aw kɔrɔbɔ.

¹¹ N tɔgɔ kosɔn, tiɲɛ na, n bena koo kɛ. N ben'a to n tɔgɔ be cɛn cogo di? N ka kan ni boɲa min ye, n t'o di mɔgɔ wɛrɛ ma.

¹² Isirayɛlidenw, aw ka mɛnni kɛ ne fɛ, ne ye aw minw wele. Ne le ye fɔlɔ ye, ne le ye laban ye.

¹³ Ne bolo le ye dugukolo dan, n kinibolo ye sankolo fɛnsɛn. Ni n y'u wele dɔrɔn, u bɛɛ be na.

¹⁴ Aw bɛɛ ka lajɛn ka mɛnni kɛ. Ne Masaba diyanamɔgɔ bena wili Babilɔnikaw kama ka ne sago kɛ. A ben'a ka sebagaya yira u la. Aw cɛma, jɔn y'o fɔ k'a sɔrɔ n'a ma kɛ fɔlɔ?

¹⁵ Ne lo, ne le y'o fɔ, ne le y'a wele. Ne le nana n'a ye, a ka baara do bena ɲa fana.

¹⁶ Aw ye gwɛrɛ ne la ka mɛnni kɛ. Kabini daminɛ na, ne ma deli ka kuma fɔ dogo la. Kabini koow kɛwaati la, ne be yen.» Matigi, Masaba ye ne ci sisan le, Nii be ne fɛ.

¹⁷ Masaba, aw kunmabɔbaga, Isirayɛli ka Ala ko: «Ne Masaba ye aw ka Ala ye. Ne b'aw kalan aw ka nafa kama. Ne b'aw bila sira, aw taayɔrɔw la.

¹⁸ Hun! N'aw tun ye mɛnni kɛ n ka ladiliw la, aw ka hɛrɛ tun bena kɛ i ko baji, aw ka tilenninya tun bena kɛ i ko kɔgɔji.

¹⁹ Aw kɔmɔgɔw tun bena caya i ko cɛncɛn. U tɔgɔ tun tena tunu, a tun tena nagasi ne ɲakɔrɔ.»

²⁰ Aw ye bɔ Babilɔni dugu kɔnɔ, aw ka boli ka bɔ Babilɔnikaw cɛma! Aw ye pɛrɛn nisɔndiya la k'a fɔ mɔgɔw k'a mɛn. Aw k'a wango la fɔɔ diɲɛ daan na ko: «Masaba y'a ka baarakɛlaw Isirayɛlidenw kunmabɔ.»

²¹ A tagara n'u ye kongokolon kɔnɔ yɔrɔ min na, minnɔgɔ m'u tɔɔrɔ yen. A y'a kɛ jii tora ka woyo ka bɔ fara la, a ye fara ci, jii tora ka bɔ a la.

²² «Mɔgɔjugu kɔni tena hɛrɛ sɔrɔ.» Masaba le ko ten!