Ezayi 40 - ALA KA KUMA

YƆRƆ FILANAN ( 40—55 ) Ala ka jama dususaaloko

¹ «Aw ka ne ka jama dusu saalo, k'u dusu saalo.» Aw ka Ala le ko ten.

² «Aw ye kuma Zeruzalɛmu fɛ, aw ye wango la k'a fɔ ko: ‹Aw ka fangabaara banna, aw ka kojuguw juru sarala ka ban. Masaba y'aw ka kojuguw bɛɛ juru sara fɔɔ siɲɛ fila.› »

³ Pɛrɛnkan dɔ be bɔra ko: «Aw ka sira dilan Masaba ye kongokolon kɔnɔ, aw ka tɛmɛyɔrɔ labɛn anw ka Ala ye kongo janin kɔnɔ.

⁴ Dingɛw bɛɛ ka datugu, kuluw ni tintinw bɛɛ ka ci ka jigi. Yɔrɔ minw wilinin bɛ sanfɛ, olu ka dakɛɲɛ, jigijigijuguw ka dakɛɲɛ.

⁵ O tuma na, Masaba ka nɔɔrɔ bena yira kɛnɛ kan, mɔgɔ bɛɛ ben'a ye. Bari, Masaba le kumana.»

⁶ Kumakan dɔ ko: «Wango la!» Ne y'a jaabi ko: «Ne ka mun wango la?» A ko: «Adamaden bɛɛ be i ko biin, u ka dawula bɛɛ be i ko binfeeren.

⁷ Masaba man'a dafɔɲɔ kɛ k'u fiyɛ tuma min na, biin be ja, feerenw be fɔnsɔnfɔnsɔn. Tiɲɛ na, adamadenw be i ko biin.

⁸ Biin be ja, feerenw be fɔnsɔnfɔnsɔn, nga an ka Ala ka kuma bena to seen kan kudayi.»

⁹ Ele kɔni, yɛlɛ kulujan kan, *Siyɔn dugu, ele min cira ka hɛrɛko fɔ. E k'i kaan bɔ ni fanga ye, Zeruzalɛmu, ele min cira ka hɛrɛko fɔ, i kaan kɔrɔta. Kana siran. A fɔ Zuda mara dugu tɔw ye ko: «Aw ka Ala filɛ nin ye!

¹⁰ Matigi, Masaba filɛ nin ye. A be nana ni barika ye. Kuntigiya b'a bolo. A be nana n'a ka sara ye, a ka baara tɔnɔ fana b'a ɲa.

¹¹ A b'a ka mɔgɔw kɔlɔsi i ko begɛndɛndɛbaga. A be sagadenw minɛ k'u ta a disi la, ka tugu u bamusow kɔ dɔɔni dɔɔni.»

Ala b'a ka jama hakili sigi

¹² Jɔn ye kɔgɔji suma a tigɛ la? Jɔn ye sankolo suma n'a bolo ye? Jɔn ye dugukolo buguri bɛɛ don sumanikɛminan kɔnɔ? Jɔn ye kuluw ni tintinw gwiliya suma?

¹³ Masaba ka kan ka min kɛ, jɔn y'o ɲaa yira a la? Walima jɔn ye ladili d'a ma?

¹⁴ A ye ladili ɲini jɔn fɛ ka hakili sɔrɔ? Jɔn ye tilenninya sira yir'a la? Jɔn y'a kalan ka lɔnniya d'a ma, ani k'a kɛ hakilitigi ye?

¹⁵ A filɛ, siyaw te foyi ye, u be i ko jii tɔniko kelen. U gwiliya be i ko gwangwan ta, sumanikɛlan kan. Dugukolo minw be jii cɛma, olu ka fiɲɛ i ko gwangwan.

¹⁶ Liban lɔgɔ tena labɔli kɛ saraka tasuma koo la, a kɔnɔ begɛnw tena labɔli kɛ saraka jɛnita koo la.

¹⁷ Siyaw bɛɛ b'a ɲakɔrɔ i ko fuu. A b'u jati fɛɛn gwansanw ye, fɛɛn nafatanw.

¹⁸ Aw b'a fɛ ka Ala suma ni mun le ye? Aw bena jaa jumɛn le dilan k'a cogo yira?

¹⁹ Baarakɛla bolo le ye joo dilan do! Sanu baarabaga le ye sanu ani warigwɛ yelen k'o kɛ a la, ka jɔrɔkɔ warigwɛlamanw dilan a ye.

²⁰ Ni see te mɔgɔ min ye k'o ɲɔgɔn kɛ, ale bena lɔgɔ ɲanaman le ɲini min ma sɔgɔsɔgɔ, ka lɛsɛnikɛla ɲanaman ɲini, a be joo dilan min be lɔ ka ɲa.

²¹ Aw m'a lɔn wa? Aw m'a mɛn wa? A tun ma fɔ aw ye kabini koow daminɛ la wa? Aw ma diɲɛ dancogo faamu wa?

²² A siginin be masaya la dugukolo sanfɛ, adamadenw be i ko tɔɔnw a kɔrɔ. A ye sankolo fɛnsɛn i ko u be fani melekenin foni cogo min na. A y'a labɛn i ko faniso, k'a kɛ a sigiyɔrɔ ye.

²³ A be jamana ɲamɔgɔw dɔgɔya fɔɔ k'u kɛ fɛɛn gwansanw ye. A be diɲɛ kuntigiw majigi k'u kɛ mɔgɔ gwansanw ye.

²⁴ N'u tutura dɔrɔn, n'u liliw donna dugukolo la ka ɲa dɔrɔn, ni Masaba dafɔɲɔ sera u ma, u be ja, fununfunun b'u ta ka bɔ yen i ko kala.

²⁵ Ala senuman ko: «Aw b'a fɛ ka ne suma ni jɔn le ye? Ne ni jɔn le ka kan?»

²⁶ Aw k'aw ɲaa kɔrɔta sanfɛ ka filɛli kɛ. Jɔn le ye lolo nunu bɛɛ dan? O tigi lo b'a kɛ u bɛɛ be bɔ. See b'a ye kosɔbɛ, a fanga ka bon. N'a y'u wele u tɔgɔ la, u bɛɛ be na.

²⁷ Isirayɛlidenw, mun na aw y'a fɔ ko: «Masaba te an ka koow kala ma, an ka kan ni min ye, an ka Ala t'o lɔn»?

²⁸ Aw m'a lɔn wa? Aw m'a mɛn wa? Ko Masaba ye waati bɛɛ Ala ye, diɲɛ mumɛ Danbaga lo. A te dɛsɛ, a te sɛgɛn, Mɔgɔ te se k'a hakili sɛgɛsɛgɛ.

²⁹ A be fanga di sigɛnbagatɔ ma, a be barika don barikatan la.

³⁰ Kanbelenw fanga be ban, hali minw kɔgɔnin lo, olu be talon.

³¹ Nga, minw jigi be Masaba kan, olu be fangakura sɔrɔ. U be van i ko sɛgɛn, u be boli, u te sigɛn. U be taama, u fanga te ban.