Ezayi 4 - ALA KA KUMA

¹ O loon na, muso wolonwula bena dulon cɛɛ kelen kaan na ka to k'a fɔ ko: «An bena lɔ n'an yɛrɛ ka dumuniko ye, an bena lɔ n'an yɛrɛ ka fɛɛrɛbɔko ye. A daan ye i k'a fɔ ko an y'i musow ye. Maloya bɔ an kunna!»

Masaba bena Zeruzalɛmukaw tɔɔ kisi

² Loon dɔ, Masaba bena fɛɛn dɔ lawili, o bena kɛ kunkɔrɔta ni nɔɔrɔfɛn ye. Tɔnɔ min bena sɔrɔ jamana kɔnɔ, o bena kɛ Isirayɛliden tɔ nunu ka boɲa n'u ka kunnawolonfɛn ye.

³ O tuma na, *Siyɔn dugu tɔɔ, Zeruzalɛmuka minw tora nii la, olu bena wele ko mɔgɔ saniyaninw, olu minw bɛɛ tɔgɔ sɛbɛnna waasa ka to Zeruzalɛmu.

⁴ Ni Matigi ye Siyɔn musow ko ka bɔ u ka nɔgɔ la tuma min na, ka joli bɔnnin ko k'a fiyɛ ka bɔ Zeruzalɛmu kɔnɔ kiti ni tasuma barika la,

⁵ o waati la, minw be lajɛn Siyɔn kulu kan, Masaba bena sankaba to u kunna kulu faan bɛɛ, la tilefɛ. Sufɛ ta be kɛ sisi ye min be yeelen bɔ i ko tasuma. Matigi ka nɔɔrɔ bena kɛ o bɛɛ sanfɛ k'u tanga.

⁶ A bena kɛ bugu ye u kunna min be suma kɛ tilefɛ funteni tuma na, ka kɛ boon ye, k'u sutura fɔɲɔ ni sanji tuma na.