Ezayi 37 - ALA KA KUMA

Masacɛ Ezekiyasi be kuma kira Ezayi fɛ

¹ Masacɛ Ezekiyasi y'o mɛn tuma min na, a y'a ka faniw faran ka dusukasifani don a kaan na, ka taga don Masaba ka soo kɔnɔ.

² A ye masaso kuntigi Eliyakimu, ni sɛbɛnnikɛla Sɛbuna, ani sarakalasebaga minw kɔrɔla kosɔbɛ ci ka taga Amɔsi dencɛ kira Ezayi fɛ. Dusukasifani tun b'u bɛɛ kaan na.

³ A k'u k'a fɔ a ye ko ale Ezekiyasi ko: «Bii ye dusukasi ni ɲagwan, ani maloya loon ye. A be i n'a fɔ deen sera wolo ma, nga fanga te yen ka bɔ.

⁴ Asiri masacɛ y'a ka kɛlɛmasa ci ka na Ala nɛni. N'a sɔrɔ Masaba i ka Ala bena o kuma nunu bɛɛ mɛn k'a ɲaa gwan o kosɔn. O la, Ala daali an ka siya tɔɔ ye.»

⁵ Masacɛ Ezekiyasi ka cidenw tagara Ezayi fɛ.

⁶ Ezayi y'a fɔ u ye ko: «Aw ye taga fɔ aw kuntigi ye ko Masaba ko a ye kuma min mɛn, a kan'a jaa tigɛ o kosɔn. Asiri masacɛ ka kɛlɛɲamɔgɔw ye min fɔ k'ale Masaba dɔgɔya.

⁷ Ko ale bena miiriya dɔ don a kɔnɔ, n'a ye kibaruya dɔ mɛn, a bena kɔsegi a yɛrɛ ka jamana na. Ko ale ben'a to u b'a faga yen ni murujan ye.»

Asiri masacɛ be Ezekiyasi bagabaga tugu

⁸ Kɛlɛmasa y'a mɛn ko Asiri masacɛ bɔra Lakisi ka taga Libina kɛlɛyɔrɔ. O la, a tagar'a sɔrɔ o yɔrɔ la.

⁹ U nan'a fɔ Asiri masacɛ ye ko Ezipiti masacɛ Tiraka ka bɔ Etiyopi be nan'a kɛlɛyɔrɔ. Asiri masacɛ y'o mɛn dɔrɔn, a ye mɔgɔw bila ka taga Ezekiyasi fɛ ko:

¹⁰ «Aw k'a fɔ Zuda mara masacɛ Ezekiyasi ye ko a jigi b'a ka Ala min kan, a kana sɔn ale k'a nigɛ ko Zeruzalɛmu tena don ne Asiri masacɛ bolo dɛ!

¹¹ Asiri masacɛw ye min kɛ jamanaw bɛɛ la, i yɛrɛ y'o mɛn. U y'u halaki pewu. Ele be miiri ko i bena kisi wa?

¹² Ne faaw ye siyaw minw halaki, olu ka batofɛnw sera k'u kisi wa? Gozankaw, ni Arankaw, ni Ɛrɛsɛfukaw, ani edɛni minw tun be Telasari.

¹³ Amati masacɛ, ni Aripadi ni Sefariwayimu ni Ena ani Iwa masacɛw be min?»

Ezekiyasi be Masaba daali

¹⁴ Ezekiyasi ye bataki nin minɛ cidenw bolo k'a kalan. O kɔ, a tagara don Masaba ka soo kɔnɔ ka bataki nin la Masaba ɲakɔrɔ.

¹⁵ A ye Masaba daali ko:

¹⁶ «Masaba, Setigi, Isirayɛli ka Ala, e min siginin be *serubɛnw sanfɛ, ele kelenpe le ye Ala ye jamanaw bɛɛ kunna. Ele lo ye sankolo ni dugukolo dan.

¹⁷ Masaba, i tulo malɔ ka mɛnni kɛ. I ɲaa yɛlɛ ka filɛli kɛ. Senakeribu ye mɔgɔ ci ka na e Ala nɛni. I k'o bɛɛ mɛn.

¹⁸ Tiɲɛ lo Masaba, Asiri masacɛw ye siya nunu bɛɛ n'u ka jamanaw halaki.

¹⁹ U y'u ka batofɛnw fili tasuma kɔnɔ k'u jɛni. Olu kɔni tun te batofɛnsɔbɛw ye, fɔɔ adamaden ka fɛɛn dilannin dama. U dɔw tun ye yiri ye, dɔw kabakuruw.

²⁰ Sisan Masaba an ka Ala, an kisi Senakeribu ma, janko dugukolo kan siyaw bɛɛ k'a lɔn ko ele Masaba kelenpe ye Ala ye.»

Ezayi ka kirayakuma

²¹ O kɔ, Amɔsi dencɛ Ezayi ye cii bila ka ta'a fɔ Ezekiyasi ye ko: «I ye Masaba, Isirayɛli ka Ala min daali Asiri masacɛ Senakeribu kosɔn, ale ko:

²² Ale Masaba ye min fɔ a kama, o filɛ nin ye: ‹I koo ka go *Siyɔn dugu ye. A b'a ɲaa don i la, Senakeribu. Zeruzalɛmu b'a kuun kɔmikɔmina i kɔɔ kan.

²³ I ye jɔn le nɛni k'a tɔgɔ cɛn? I y'i kaan kɔrɔta jɔn kama? I y'i ɲaa don jɔn la yɛrɛboɲa fɛ? I y'o kɛ ne le la, Isirayɛli ka Ala.

²⁴ I ye mɔgɔw ci ka na ne Matigi nɛni. I ko i yɛlɛla Liban kulujanjanw kan n'i ka kɛlɛkɛwotoro caaman ye. Ko i y'a ka sɛdiriyiribabaw jamanjanw, n'a ka sipɛrɛyiri ɲumanw tigɛ. Ko i sera kulu jamanjanyɔrɔ kunna, fɔɔ ka taga se a ka tufin ma.

²⁵ Ko i ye kɔlɔnw sogi jamana wɛrɛw la k'o jii min. Ko i y'i sennɔ kɛ ka Ezipiti kɔɔw bɛɛ datugu, u jara.

²⁶ I m'a lɔn ko ne y'o latigɛ kabini tumajan wa? Kabini fɔlɔfɔlɔ, ne y'o labɛn! Sisan ne y'a to o koow be kɛra. Ka dugu barikamanw cɛn k'u kɛ kabakuru tonyɔrɔw ye, o ye i niyɔrɔ ye.

²⁷ U kɔnɔ mɔgɔw barika banna, u hakili ɲagamina, u maloyara. U be i ko biin, kongo kɔnɔ, walima furaburukɛnɛ. U be i ko biin min be falen soo kunna, walima kongo kɔnɔ, min jara n'a ma sɔrɔ ka kisɛ don.

²⁸ I be sigi tuma min na, ne b'o lɔn, ne b'i bɔtuma n'i dontuma lɔn. I be dimi ne kɔrɔ tuma min na, ne b'o lɔn.

²⁹ I dimina ne kɔrɔ minkɛ, i ka yɛrɛboɲakuma fana sera ne tulo la minkɛ, ne bena i nuun sɔgɔ ka nigɛ don a la ka karafe don i daa la. I nana ni sira min ye, ne ben'a kɛ i be kɔsegi n'o ye.›

³⁰ «Nin le na kɛ o taamasiɲɛ ye i fɛ, Ezekiyasi: Aw bena sumanmanaw le dumu ɲinan. A saan filanan fana bena kɛ ten. Nga a saan sabanan na, aw ka danni kɛ ka suman tigɛ, ka *ɛrɛzɛnsunw tutu k'u deenw dumu.

³¹ Zuda mara mɔgɔ tɔɔ minw tora, olu bena u yɛrɛ sɔrɔ tugu i ko yiri min lili donna ka ɲa, ka deen kɛ.

³² Ɔnhɔn, Zeruzalɛmukaw tɔɔ bena to, Siyɔn kulu kan mɔgɔw dɔw bena kisi.» Ne Ezayi b'a fɔ k'o bena kɛ Setigi, Masaba ka jijali barika la.

³³ «Masaba be min fɔ Asiri masacɛ kosɔn, o filɛ nin ye: ‹A tena don dugu nin kɔnɔ, a tena biɲɛ bon yan. A tena na yan kama ni nigɛkunbɛnnan ye, a tena na yɔrɔ lɔ k'a wili dugu laminikogo kɔfɛ.

³⁴ A nana ni sira min ye, a bena kɔsegi n'o ye. A tena don dugu nin kɔnɔ. Ne Masaba le ko ten.

³⁵ Ne bena dugu nin tanga k'a kisi ne yɛrɛ, ni n ka baarakɛla Dawuda kosɔn.› »

Senakeribu ka sayako

³⁶ O kɔ, Masaba ka mɛlɛkɛ tagara mɔgɔ waa kɛmɛ ni waa bi seegi ni duuru (185 000) faga Asiri kɛlɛdenw ka sigiyɔrɔ la. O dugusagwɛ sɔgɔmadafɛ, mɔgɔw wilila tuma min na, u ma foyi ye suuw kɔ.

³⁷ O la, Asiri masacɛ Senakeribu wilila ka bɔ yen ka kɔsegi ka taga to Ninivu.

³⁸ Loon dɔ, k'a to a ka joo Nisirɔki sɔnni na joso kɔnɔ, a dencɛ Adaramelɛki ni Sarɛsɛri y'a faga ni murujan ye, ka sɔrɔ ka boli ka taga Arara jamana la. A dencɛ Azaradɔn sigir'a nɔɔ na masaya la.