Ezayi 35 - ALA KA KUMA

Masaba ka kunmabɔninw kɔsegiko

¹ Nisɔndiya ka sɔrɔ kongokolon la ni dugukolo janin kan. Ɲanagwɛ ka kɛ dugukolo lakolon kan, feeren ka bɔ yen.

² A ka fa binfeeren na, nisɔndiyapɛrɛnkan ka bɔ yen. Bari, a ka nɔɔrɔ bena kɛ i ko Liban ta, a ka dawula bena kɛ i ko Karimɛli ni Sarɔn ta. U bena Masaba ka nɔɔrɔ ye, u bena an ka Ala ka dawula ye.

³ Aw ka barika don bolo faganinw la, minw kunbiri be yɛrɛyɛrɛla, aw ka barika don olu la.

⁴ Minw jaa tigɛnin lo, aw k'a fɔ olu ye ko: «Aw k'aw jaa gwɛlɛya, aw kana siran. Aw ka Ala filɛ nin ye. A bena na aw mɔnɛ bɔ k'aw juguw sara n'u ka kojugu ye. Ale lo be nana aw kisi.»

⁵ O tuma na, fiɲɛntɔw ɲaa bena yɛlɛ, tulogwerenw tulo bena mɛnni kɛ.

⁶ O waati la, senkelenninw bena pan i ko mankalanin. Bobow bena nisɔndiyapɛrɛnkan bɔ. Jii bena bɔ kongokolon kɔnɔ, kɔɔw bena woyo kongo janin kɔnɔ.

⁷ Dugukolo cɛncɛn gwanninman yɔrɔw bena kɛ dalanw ye, minnɔgɔ be jamana min tɔɔrɔ, jii woyoyɔrɔw bena kɛ yen. Kongowuluw tun be la yɔrɔ min na, buruku ni kɔku bena falen o yɔrɔ la.

⁸ Sira dɔ bena bɔ yen min bena wele ko Sira senuman. Mɔgɔ min saniyanin tɛ, o tigi tena se ka tɛmɛ yen bari a labilanin lo Ala ka mɔgɔw ye. Naloman tena se yen.

⁹ Jara tena kɛ yen, sogojugu si tena se yen, o tena ye yen fewu. Ala ye mɔgɔ minw kunmabɔ, olu le bena o sira nin ta.

¹⁰ Masaba ye mɔgɔ minw bɔ bolo la, olu bena kɔsegi. U bena don *Siyɔn n'u be nisɔndiyapɛrɛnkan bɔ. Daan te nisɔndiya min na, o le bena ye u ɲaa kan. Nisɔndiya ni dusudiya le b'u kɔnɔna, ɲanasisi ni kasimisɛn yɔrɔ bena jaɲa u la.