Ezayi 34 - ALA KA KUMA

Masaba bena siya bɛɛ ɲaa gwan

¹ Siyaw, aw ye gwɛrɛ ka mɛnni kɛ, aw k'aw tulo malɔ. Dugukolo ka mɛnni kɛ, ani fɛɛn o fɛɛn min b'a kan. Diɲɛ n'a kɔnɔfɛnw bɛɛ ka mɛnni kɛ.

² Masaba dimina siyaw bɛɛ kɔrɔ, a dusu gwanna u ka kɛlɛbolow bɛɛ kɔrɔ. A y'a latigɛ ko u bɛɛ bena halaki, a ben'a to u b'u faga.

³ U ka mɔgɔ minw fagara, olu bena fili duguma. U suuw kasa bena yɔrɔ minɛ, u joliw bena woyo kuluw kan.

⁴ Sankolo kɔnɔnafɛnw bɛɛ bena ɲagami, sankolo bena meleke i ko dɛbɛ. Sankolofɛnw bɛɛ bena ben i ko yiri furaburu janinw.

Edɔmuw halakiko

⁵ Masaba ko: «Ne ka murujan be yɛlɛmayɛlɛmana sankolo la, a be jigira edɔmuw kama, ne y'a latigɛ ka siya min halaki.»

⁶ Masaba ka murujan yɔrɔ bɛɛ kɛra joli ni sogo tulu ye: sagaden ni bakɔrɔnin joli, ni sagajigi kɔkili tulu. Bari, saraka bɔta be Masaba fɛ Bɔsira, mɔgɔ caaman bena faga edɔmuw ka mara la dɛ!

⁷ Olu ni kongomisiw bena ben ɲɔgɔn fɛ, misiw ni tura kɔgɔninw bena ben ɲɔgɔn fɛ. U ka dugukolo bena fa joli la, u ka buguri bɛɛ bena kɛ sogotulu ye.

⁸ O loon bena kɛ Masaba mɔnɛ bɔlon ye. O bena kɛ ɲagwan saan ye janko a ka *Siyɔn dɛmɛ.

⁹ Edɔmuw ka mara kɔɔw bena kɛ tulunɔgɔ ye, buguri bena kɛ kiribi ye. Jamana bena kɛ tulunɔgɔ ye min be jɛnina.

¹⁰ Suu fara tile kan, a tena faga, a sisi bena to ka yɛlɛ tuma bɛɛ. A bena kɛ kongokolon ye waati bɛɛ, hali mɔgɔ si tena tɛmɛ yen tugu!

¹¹ A bena kɛ ginginw ni juguninw ani kaankaanw layɔrɔ ye. Masaba bena o yɔrɔ lakolonya k'a kɛ tɔmɔ ye.

¹² Mɔgɔbaw tena sɔrɔ yen tugu ka masacɛ sigi, ɲamɔgɔw bɛɛ bena tunu.

¹³ Ŋɔnitu le bena fa u ka masaluw kɔnɔ, u ka yɔrɔbarikamanw bena fa ŋɔni na. U ka yɔrɔ bena kɛ kongowuluw layɔrɔ ye, a bena kɛ kɔnɔsogolonw ka yɔrɔ ye.

¹⁴ Waraw ni surukuw bena ɲɔgɔn kunbɛn yen, bakɔrɔninw bena to ka ɲɔgɔn wele yen. A bena kɛ jinamuso fariman Liliti toyɔrɔ ye, a bena to ka lafiɲɛ yen.

¹⁵ Saa ben'a layɔrɔ lalaga yen, a ben'a faan la, a ben'u kɔlɔsi, u bena tɔtɔ. O yɔrɔ la yen fana, dugaw bena lajɛn, u kelen kelen bɛɛ n'u taamaɲɔgɔn.

¹⁶ Aw ka Masaba ka sɛbɛ ta k'a kalan. A sɛbɛnna ko: «Hali u kelen tena to kɔ. U kelen kelen bɛɛ bena kɛ n'u taamaɲɔgɔn ye. Bari, Masaba yɛrɛ le y'o fɔ, a ka Nii le bena u lajɛn.

¹⁷ A ye kala la ka bɛɛ niyɔrɔ d'a ma. A ye juru ta ka jamana tilan k'a d'u ma. A bena kɛ u ta ye tuma bɛɛ, u bena to yen kudayi.»