Ezayi 33 - ALA KA KUMA

Halakilikɛla halakiko

¹ Ele min b'a la ka halakili kɛ, n'i ma halaki fɔlɔ, bɔnɛ y'i ta ye! Ele min be to ka mɔgɔw janfa, ni mɔgɔ ma i janfa ka ye fɔlɔ, bɔnɛ y'i ta ye! N'i ye halakili kɛ ka ban tuma min na, e fana bena halaki. N'i ye mɔgɔw janfa ka ban tuma min na, u bena e fana janfa.

² Masaba, makari an na! Ele ye an jigi ye! Kɛ an ka fanga ye loon o loon sɔgɔma, kɛ an kisibaga ye waatigwɛlɛn na.

³ Ni saan pɛrɛnna, siyaw be boli le! N'i wilila, jamanamɔgɔw be yɛrɛkɛ le!

⁴ Fonni le be kɛra ten dɛ, i ko tɔɔn be girin foro kɔnɔ cogo min na! U be giringirinna u juguw ka minanw kan i ko tɔnwulen.

⁵ Masaba ka bon! A be fɛɛn bɛɛ ɲafɛ, a be fɔɔ sanfɛ. A bena tilenninya ni hɔrɔnya kɛ *Siyɔn yɔrɔ bɛɛ.

⁶ Aw be se ka to hɛrɛ la. Lɔnniya ni hakilitigiya ye nafolo ye min be mɔgɔ kisi. Ka siran Masaba ɲa, o le ye Siyɔnkaw ka nafolo ye.

Jamana halakiko

⁷ A filɛ, Ariyɛlikaw be kulera bɔlɔnw na. Lasigiden minw tun tagara bɛɛn ɲini, olu segitɔ be kasira kosɔbɛ.

⁸ Siraw lakolon lo, mɔgɔ te tɛmɛna siradenninw kan tugu. U ye bɛɛn nin cɛn. U banna dugu nunu la, mɔgɔ si te jati tugu.

⁹ Dusukasi be jamana kɔnɔ, a be nagasira. Liban yiriw be fɔnsɔnfɔnsɔnna. Sarɔn kɔkɛnɛ kɛra i ko kongokolon, *Basan mara ni Karimɛli kulu yiriw furaburuw burunna.

¹⁰ Masaba ko: «Sisan kɔni, n bena dɔ kɛ, sisan, n bena wili ka lɔ. Ne bena boɲa sɔrɔ!

¹¹ Aw kɔnɔnako be i ko biin, a mana bɔ kɛnɛma, a be kɛ binmurumuru ye. Aw ka ninakili be i ko tasuma, min bena aw jɛni.

¹² Siya wɛrɛw bena jɛni ka kɛ i ko bugurigwɛ, u bena kɛ i ko ŋɔni tigɛninw. Tasuma b'u ta joona.

¹³ Aw minw be fɔɔ yɔrɔjan, ne ye min kɛ, aw y'aw tulo malɔ k'o mɛn. Aw minw yɔrɔ ka surun, ne seko ye min ye, aw k'o lɔn.»

Jɔn bena kisi tasumaba ma?

¹⁴ Kojugukɛlaw kamana gwannin lo *Siyɔn, Alaɲasiranbaliw ta ye yɛrɛyɛrɛ ye. U b'a fɔra ko: «Anw cɛma, jɔn be se ka lɔ? Tasuma fariman lo! Anw cɛma, jɔn be se ka lɔ o tasumaba ɲa min te faga ka ye?»

¹⁵ Mɔgɔ min be taama tilenninya sira kan, mɔgɔ min be tiɲɛkuma fɔ, mɔgɔ min be ban tɔnɔjugu la, mɔgɔ min be ban dasanfɛn na, mɔgɔ min b'a tulo datugu janko a kana mɔgɔfagako ŋaniya mɛn, mɔgɔ min b'a ɲaa datugu janko a kana kojuguw ye,

¹⁶ o tigi le bena sigi ɲamalɔ la. A bena to boon min na, o lɔnin be fara kan. Dumuni bena to ka d'a ma, jii tena dɛsɛ a fɛ.

Zeruzalɛmu kisiko

¹⁷ I ɲaa bena la masacɛ n'a ka dawula kan, i bena jamana n'a boɲa filɛ.

¹⁸ O tuma na, i tun be siran koo minw ɲa, i hakili bena jigi o la. I ben'a fɔ ko: «Nisɔngɔ minɛbaga n'a kɔlɔsibaga be min? Yɔrɔ barikamanw kɔlɔsibaga be min?»

¹⁹ I tena siya yɛrɛboɲala nin ye tugu, siya min ka kaan te mɛn. U ka kuma duurunin lo, a te faamu.

²⁰ I ka *Siyɔn dugu filɛ! An ka ɲanagwɛw kɛyɔrɔ. I ɲaa ka la Zeruzalɛmu kan, dugu ɲamalɔnin lo, faniso lo, min tena bɔ a nɔɔ na. A tutunanw tena bɔn ka ye, a juruw tena tigɛ ka ye.

²¹ O yɔrɔ la, Masaba ben'a ka boɲa yira an na. O yɔrɔ bena kɛ jisirababaw ye, kɔbabaw bena kɛ yen. Nga kɛlɛkɛkurunw tena tɛmɛ yen, kurunbabaw fana tena tɛmɛ yen.

²² Sɔbɛ la, Masaba y'an ka kiti tigɛbaga ye, Masaba y'an ka sariya sigibaga ye. Masaba le y'an ka Masa ye, ale lo b'an kisi.

²³ Aw kɛra i ko kurun min juruw sirinin tɛ ka ɲa, u te lɔgɔjan minɛna ka ɲa tugu. Kurun fani te sera ka yɛlɛ sanfɛ tugu! O tuma na, aw bena aw juguw bololafɛn caaman tilan aw ni ɲɔgɔn cɛ. Hali senkelenninw fana bena dɔw cɛ.

²⁴ Zeruzalɛmuka si ten'a fɔ ko: «Ne man kɛnɛ.» Dugu mɔgɔw ka kojuguw bena yafa u ma.