Ezayi 32 - ALA KA KUMA

Masacɛɲuman ka koo

¹ Masa bena kɛ hɔrɔn ye a ka baara la, kuntigiw bena kuntigiya kɛ ni tilenninya ye.

² U kelen kelen bɛɛ bena kɛ i ko dogoyɔrɔ, min be mɔgɔ tanga fɔɲɔ ma. Bɛɛ bena kɛ i ko boon, sanji natuma na. Bɛɛ bena kɛ i ko jisira, min be woyora yɔrɔ janin la. U bena kɛ i ko kabakuruba dɔ suma, jamana janin la.

³ Minw be yeli kɛ, olu bena yeli kɛ ka ɲa. Minw be mɛnni kɛ, olu bena u tulo malɔ.

⁴ Mɔgɔ minw te miiri ka sɔrɔ ka koo kɛ, olu bena miiri ka faamuli kɛ. Dagwaraw bena kuma ka ɲa. U bena kuma gwɛnin fɔ.

⁵ A tena fɔ naloman ma tugu ko mɔgɔɲuman, a tena fɔ mɔgɔkolon ma tugu ko mɔgɔsɔbɛ.

⁶ Bari, naloman be kuma kuntan le fɔ, a be kojugu le miiri. A be koo kɛ i ko Alaɲasiranbaliw, a be kumakolon fɔ Masaba ye. A be kɔngɔtɔ to kɔnɔbara lakolon, a be minnɔgɔtɔ to minnɔgɔ la.

⁷ Mɔgɔkolon ka kɛwaliw ma ɲi. A be kojugu latigɛ janko ka fantanw mako sa galon seen fɛ, hali k'a sɔrɔ tiɲɛ b'o tigiw fɛ.

⁸ Mɔgɔɲuman be koɲuman le latigɛ, a be kɛwaliɲumanw dama le kɛ.

Muso miiribaliw lasɔmiko

⁹ Muso miiribaliw, aw ye wili ka mɛnni kɛ ne fɛ. Sunguru kojatibali nunu, aw y'aw tulo malɔ n ka fɔta la.

¹⁰ Yanni saan kelen ni dɔɔni, aw minw te koo jati, aw bena yɛrɛyɛrɛ. Bari, *ɛrɛzɛn mɔnin baara bena ban, suman tigɛta tena sɔrɔ tugu.

¹¹ Aw muso miiribaliw ka yɛrɛyɛrɛ, kojatibaliw ka yɛrɛyɛrɛ kosɔbɛ! Aw ka fani bɔ aw yɛrɛ la ka dusukasifani siri aw cɛ la.

¹² Aw ka to ka kasi k'aw kuun minɛ foro kɔnɔ fɛnɲumanw, ni ɛrɛzɛnsunɲumanw koo la,

¹³ ka kasi n ka mɔgɔw ka yɔrɔ koo la, min fara ŋɔni la. Aw ka kasi boonw bɛɛ koo la, nisɔndiya tun be minw kɔnɔ, dugu diman nin na.

¹⁴ Masaso tora lakolon, dugu mankan caaman lakolon tora. Ofɛli tintin ani kɔlɔsilikɛlaw ka sangaso lakolon bena to tuma bɛɛ. A bena kɛ kongofaliw ni begɛnw ka dagamuyɔrɔ ye.

Tilenninya sara ye hɛrɛ ye

¹⁵ Fɔɔ Ala Nii ka di aw ma ka bɔ sankolo la. O tuma na, kongokolon bena kɛ yiriforo ye, yiriforo bena kɛ tuu ye.

¹⁶ Tilenninya ni hɔrɔnya bena kɛ o yɔrɔ la.

¹⁷ Tilenninya nafa bena kɛ hɛrɛ ye, tilenniya bena na ni ɲasuma, ni hakilisigi ye tuma bɛɛ.

¹⁸ Ne ka mɔgɔw bena sigi hɛrɛyɔrɔ la, yɔrɔ sutaranin la, lafiɲɛyɔrɔ, yɔrɔ malanin la.

¹⁹ Sanbɛrɛ bena tuu nin cɛn, dugu bena halaki.

²⁰ Nga aw kɔni bena dagamu. Aw bena to ka danni kɛ kɔdaw la yɔrɔ bɛɛ, aw bena aw ka misiw ni faliw to u kunfɛ yɔrɔ bɛɛ.