Ezayi 26 - ALA KA KUMA

Dugu barikaman dɔnkili

¹ O loon na, u bena nin dɔnkili la Zuda mara la ko: Dugu barikaman b'an fɛ, Ala yɛrɛ le y'a kogo ye an kisili kama.

² Aw ye dugu dondaw yɛlɛ, Siyatilennin ka don, siya min be to kantigiya la.

³ Mɔgɔ min tora kantigiya la, e Masaba be hɛrɛ kɛ o ye kosɔbɛ. Bari, a jigi b'i kan.

⁴ Aw jigi ka to Masaba kan tuma bɛɛ. Bari, Masaba ye dogoyɔrɔ ye tuma bɛɛ i ko fara.

⁵ Ale lo ye kulukanmɔgɔw majigi. Dugu min tun be fɔɔ sanfɛ, a y'o ɲɔti ka jigi duguma k'a fili bɔgɔ la.

⁶ U ben'a dɔn ni seenw ye, fantanw le ben'a dɔn, dɛsɛbagatɔw ben'a dɔn.

Ala daalikan

⁷ Masaba, i be siratilennin don mɔgɔtilennin seen kɔrɔ, i ye o sira min labɛn a ye.

⁸ I ka sariya be sira min yira, k'an to o kan, an jigi b'i kan. Min ka di an ye, o ye k'i tɔgɔ boɲa.

⁹ Sufɛ, ne be miiri e koo la kosɔbɛ, ne b'i yɔrɔ ɲinina. E ye min latigɛ i ka kiti la, n'o kɛra dugukolo kan, o be kɛ sababu ye diɲɛ mɔgɔw ben'a daminɛ ka kotilennin kɛ.

¹⁰ N'u makarila mɔgɔjugu la, a te kotilennin kɛ. A be kojugu kɛ hɔrɔnw ka jamana la, a te Masaba ka boɲa koo faamu.

¹¹ Masaba, e labɛnnin be k'u ɲaa gwan, nga u t'o lɔnna. E jijanin be i ka mɔgɔw ka koo la cogo min na, u ben'o ye, maloya b'u minɛ. Tasuma min ka kan k'i juguw jɛni, o le bena u jɛni.

¹² Masaba, i be hɛrɛ kɛ anw ye, anw be koo o koo kɛ, i b'an dɛmɛ o la.

¹³ Masaba an ka Ala, kuntigi wɛrɛ minw be danna e la, olu ye kuntigiya kɛ an kunna. Nga anw be e kelenpe le boɲa.

¹⁴ Olu kɔni sara, u tena kunun tugu. Banbagatɔ nunu tena wili tugu. Bari, e y'u ɲaa gwan k'u halaki k'u ka koo bɔ mɔgɔw kuun na pewu.

¹⁵ Masaba, i ye dɔ fara an ka siya kan, i ye dɔ fara an ka siya kan. I ye boɲa la i tɔgɔ kan, i ye dɔ fara an ka jamana daan kan faan bɛɛ la.

¹⁶ Masaba, tɔɔrɔ tuma na, an y'i yɔrɔ ɲini. I y'an ɲaa gwan, an kulera i nɔɔ fɛ.

¹⁷ Muso kɔnɔman be tɔɔrɔ a ka tiin bolo cogo min na, anw tun b'o cogo kelen na e Masaba ɲakɔrɔ.

¹⁸ Anw ye kɔnɔ ta, ka denwolo sɛgɛn lɔn. Nga an jigira deen min na, o kɛra fɔɲɔ ye. An ma kɛ diɲɛ kisi sababu ye, an ma foyi fara dugukolo mɔgɔw kan.

¹⁹ Ne ka jama, aw ka mɔgɔ saninw bena kunun, u suuw bena kunun. Aw minw be kaburu la, aw ye kunun ka nisɔndiyapɛrɛnkan bɔ! Bari, ne bena dugukolo fa komiji la, dugukolo be suuw to u be kunu.

Kojugu sara

²⁰ Ne ka jama, aw ka don aw ka soow kɔnɔ, ka daaw tugu. Aw ka dogo waati kunkurunnin kɔnɔ, fɔɔ Masaba ka dimi waati ka tɛmɛ.

²¹ Bari Masaba bɔtɔ filɛ nin ye a ka soo waasa ka na dugukolo kan mɔgɔw ka kojuguw sara. Dugukolo bena joli bɔnninw yira. Mɔgɔ minw fagara, a tena olu suuw dogo tugu.