Ezayi 25 - ALA KA KUMA

Masaba tanuli

¹ Masaba, i ye ne ka Ala ye. Ne bena i tɔgɔ boɲa, k'i tɔgɔ wango la. Bari, i ye kobabaw kɛ kantigiya la, i tun ye minw labɛn kabini tumajan.

² I ye dugu kɛ kabakuruton ye, i ye dugu barikaman kɛ tomo ye. I y'a kɛ lonanw ka dugu barikaman tununa ka bɔ yen, a do tena sigi kura ye abada!

³ O kama, siya barikaman bena boɲa la i kan. Jamana min mɔgɔw ka fari, o jamana mɔgɔw bena siran e ɲa.

⁴ Bari, i kɛra dɛsɛbagatɔ dogoyɔrɔ ye, i kɛra fantan dogoyɔrɔ ye tɔɔrɔtuma na. I kɛra dɛnyɔrɔ ye sanjiba natuma na, I kɛra suma ye funteni tuma na. Bari, mɔgɔ farimanw dusu be i ko sanjiba min be ben kogo kan,

⁵ i ko tile, yɔrɔ janin na. I be lonanw ka mankan daa faga i ko sankaba be tile ka fariya faga cogo min na. I be mɔgɔ fariman ka sesɔrɔ dɔnkili tunu.

Siyaw bɛɛ ka dumuniba

⁶ Masaba, Setigi bena dumuniba labɛn siyaw bɛɛ ye kulu nin kan, sogo tulumanw ni duvɛn dimanw bena sɔrɔ a la, sogo tuluman tobikoɲuman, ni duvɛn diman labɛnkoɲuman bena sɔrɔ a la.

⁷ Dusukasiko min tun sera siyaw bɛɛ ma, ɲanasisiko min tun ye siyaw bɛɛ sɔrɔ, a ben'a kɛ o be ban kulu nin kan.

⁸ A bena saya fanga ban pewu! Matigi, Masaba bena bɛɛ ɲaji cɛ. Maloya min tun b'a ka mɔgɔw kan jamana yɔrɔ bɛɛ la, a bena o ta ka bɔ yen. Masaba le y'a fɔ.

⁹ O loon na, u ben'a fɔ ko: «Ale lo y'an ka Ala ye, an y'an jigi l'a kan, a y'an bɔsi. Masaba lo, an y'an jigi la ale kan. An ka nisɔndiya kosɔbɛ, bari a y'an kisi.»

Mowabu halakiko

¹⁰ Masaba bena kulu nin tanga, nga Mowabu jamana bena nɔɔni yɔrɔnin kelen i ko u be biin kɛ cogo min na ɲamaɲamabɔndingɛ kɔnɔ.

¹¹ O yɔrɔ la, a kɔnɔ mɔgɔw bena u bolow sama i ko mɔgɔ min be nɔɔnina jii kɔnɔ. Nga, u ka yɛrɛboɲa bena kɛ dɔgɔya ye, u tena se ka foyi kɛ tugu.

¹² Masaba bena aw ka duguw laminikogo barikaman jamanjanw ci, k'u dakɛɲɛ fɔɔ ka jigi duguma.