Ezayi 24 - ALA KA KUMA

Dugukolo halakiko

¹ A filɛ! Masaba bena dugukolo halaki k'a lakolon to. A bena diɲɛ ɲagami ka mɔgɔw jɛnsɛn.

² Bɛɛ ta bena kɛ kelen ye: sarakalasebagaw ni jama, kuntigi n'a ka jɔncɛ, kuntigimuso n'a ka jɔnmuso, feerekɛla ni sannikɛla, jurudonbaga ni jurutabaga, jurukannila ni jurumantigi.

³ Dugukolo bena halaki pepewu! A bena cɛn bugubugu! Masaba le ko ten.

⁴ Dusukasi be dugukolo kan, a halakitɔ lo. Diɲɛ mumɛ bɛɛ barika banna, a be halakira. Sankolo be cɛnna ka fara dugukolo kan.

⁵ Diɲɛ mɔgɔw ye dugukolo nɔgɔ, bari u ye Masaba ka sariyaw cɛn. U y'a ka fɔtaw kɔrɔ yɛlɛma k'a ka bɛɛn cɛnbali cɛn.

⁶ O kama, danga b'a la ka dugukolo halaki! Jalakili tɔɔrɔ ye a kan sigibagaw ta ye. O la, u be banna fɔɔ u tɔɔ bɛrɛ ma to.

⁷ Duvɛnkɛnɛ koo kɛra dusukasiko ye, *ɛrɛzɛnsunw be fɔnsɔnfɔnsɔnna. Minw tun be nisɔndiya la, olu bɛɛ be ŋunanna.

⁸ Dundun kaan dimanw daa fagara, ɲanagwɛkɛlaw ka mankanw jera, gɔni kaan dimanw daa fagara.

⁹ Mɔgɔ te duvɛn min n'a be dɔnkili lara tugu, dɔrɔ farimanw ka kunan u minbagaw daa la.

¹⁰ Dugu lakolon cira! Bondaw bɛɛ tugura!

¹¹ Mɔgɔw be kasira bɔlɔnw kɔnɔ duvɛnko kama. Nisɔndiya te yen tugu, ɲanagwɛko bɛɛ dabilara jamana kɔnɔ.

¹² Dugu kɛra tomo ye, a donda karila, a cɛnna.

¹³ Fɛɛn bɛrɛ ma to dugukolo kan, siyaw cɛma. U tɔɔ sɔrɔko kɛra i ko olivu, fɛfɛtuma, i ko ɛrɛzɛn, fɛfɛtuma.

Diɲɛ bɛɛ be Ala tanu

¹⁴ Mɔgɔ minw tɔɔ tora, olu pɛrɛnkan be bɔra nisɔndiya fɛ. U setɔ ka bɔ tileben fɛ, u b'a la ka Masaba tanu!

¹⁵ U be Masaba tanura kɔrɔn fɛ. U be Masaba, Isirayɛli ka Ala tɔgɔ tanura kɔgɔji cɛma dugukolow kan!

¹⁶ An be dɔnkili lakan mɛnna ka bɔ fɔɔ diɲɛ daan na ko: «Ala tilennin be, boɲa ka l'a kan!» Nga, ne ko: «Ne ta cɛnna, ne ta cɛnna! Bɔnɛ ye ne ta ye! Janfaciw ye janfa kɛ. Janfa o janfa, u b'a la!»

Diɲɛ bɛɛ ɲagamiko

¹⁷ Aw minw be dugukolo kan, siranyaba ni dingɛ ani jɔɔ le b'aw kɔnɔna.

¹⁸ Mɔgɔ min mana boli siranyaba mankan ɲa, ale be taga ben dingɛ kɔnɔ. Mɔgɔ min mana bɔ dingɛ kɔnɔ, jɔɔ b'o tigi minɛ. Sankolo daa yɛlɛla, dugukolo be yɛrɛyɛrɛla.

¹⁹ Dugukolo cicira, a pɛrɛnpɛrɛnna, a be yuguyugura kosɔbɛ.

²⁰ Dugukolo be kɛra i ko dɔrɔtɔ taamacogo, a be fifafifara faan bɛɛ. A ka kojuguw gwiliyar'a kunna, a bena ben, a tena se ka wili fewu.

²¹ O loon na, Masaba bena wili sankolo kɛlɛbolo kama, ani dugukolo kan masaw kama.

²² Ala bena u lajɛn ɲɔgɔn kan i ko kasodenw. U bena datugu kasobon kɔnɔ. Waatijan tɛmɛnin kɔ, a bena u ɲaa gwan.

²³ Kalo yeelen bena dɛsɛ! Tile barika bena dɔgɔya. Masaba, Setigi bena sigi masaya la *Siyɔn kulu kan Zeruzalɛmu kɔnɔ. A ka nɔɔrɔ bena manamana cɛkɔrɔbaw ɲakɔrɔ.