Ezayi 2 - ALA KA KUMA

¹ Amɔsi dencɛ Ezayi ye yelifɛn minw ye Zuda mara ni Zeruzalɛmu koo la, o filɛ.

Siyaw bɛɛ taako Zeruzalɛmu

² Loon dɔ bena se, Masaba ka soo be kulu min kan, o bena jaɲa ni kulu tɔw ye, a bena tɛmɛ kulu tɔw kan. Siyaw bɛɛ bena girin ka taga yen.

³ Siya caaman bena wili ka taga, u bena fɔ ko: «An ka taga, yɛlɛ Masaba ka kulu kan. An ka taga Yakuba ka Ala ka soo. A ben'a ka sira yira an na. An ben'a ka sira taama.» Bari, sariya be bɔ *Siyɔn, Masaba ka kuma be bɔ Zeruzalɛmu.

⁴ A bena kɛ kititigɛla ye siyaw ni ɲɔgɔn cɛ, a bena kɛ siya caaman ka konyanabɔbaga ye. U bena u ka murujanjanw yɛlɛma k'u kɛ dabaw ye, u bena u ka tamanw kɛ wɔrɔsɔw ye. Siyaw tena murujan ta ɲɔgɔn kama tugu, mɔgɔw tena kɛlɛkɛcogo dege tugu.

⁵ Yakuba ka soo, an ka taga, an ka taama Masaba ka yeelen na.

Masaba ka loon ye kitilon ye

⁶ Tiɲɛ na, e y'i ka jama Yakuba kɔmɔgɔw fili, Masaba. Bari, kɔrɔn fɛ lagwɛlikɛlaw fanin b'u cɛma. U ka kirisi fɔko cayara i ko filisiw. Olu ni siya wɛrɛw be bɛn.

⁷ Jamana fanin be warigwɛ ni sanu la, daan t'a kɔnɔ nafolo la. Jamana fanin be soow la, daan t'a ka kɛlɛkɛwotorow la.

⁸ Jamana fanin be joow la, mɔgɔw b'u yɛrɛ ka baara nɔɔ bato. Olu yɛrɛ bolo ye fɛɛn min dilan.

⁹ Mɔgɔ majigira, adamaden maloyara. Kana yafa u ma.

¹⁰ Aw ye taga don farawow kɔnɔ. Aw ye dogo dingɛw kɔnɔ Masaba ɲasiran kosɔn, Masaba ka nɔɔrɔ kosɔn.

¹¹ Yɛrɛboɲalaw bena majigi, mɔgɔ minw b'u yɛrɛ fisaya ni tɔw ye, olu kuun bena surun. O loon na, Masaba kelenpe le bena boɲa sɔrɔ.

¹² Tiɲɛ na, Masaba, Setigi ye loon dɔ sigi, o loon na, a bena wili yɛrɛboɲalaw ni yɛrɛfunubagaw bɛɛ kama. Mɔgɔ o mɔgɔ b'a yɛrɛ boɲa, o bena maloya.

¹³ Liban yiribaba jamanjanw, a bena wili olu bɛɛ kama. A bena wili *Basan joyiriw bɛɛ kama.

¹⁴ A bena wili kulujanjanw ni tintinbabaw bɛɛ kama.

¹⁵ A bena wili sangasojanjanw ni dugu laminikogo barikamanw bɛɛ kama.

¹⁶ A bena wili kurunbabaw ni dakamanakurunw bɛɛ kama.

¹⁷ Mɔgɔ minw b'u yɛrɛ boɲa, olu bena majigi. Minw b'u yɛrɛ fisaya ni tɔw ye, olu bena maloya. O bena kɛ Masaba kelenpe boɲalon ye.

¹⁸ Joow kɔni, olu bɛɛ bena tunu.

¹⁹ Aw ye dogo farawow kɔnɔ, aw ye don dingɛw kɔnɔ Masaba ɲasiran kosɔn, Masaba ka nɔɔrɔ kosɔn. A bena wili tuma min na ka siranya bila diɲɛ mɔgɔw la.

²⁰ O loon na, adamadenw bena u ka joow fili yɔrɔjan. U ye minw dilan ni warigwɛ ni sanu ye ka to k'u bato.

²¹ Masaba ka nɔɔrɔ kosɔn, a bena wili tuma min na ka siranya bila diɲɛ mɔgɔw la, u bena boli ka dogo farawow, ni fara cininw kɔnɔ Masaba ɲasiran kosɔn.

²² Kana adamaden kɛ i jigi ye tugu dɛ! Ninakili dama lo. A be se ka mun ɲa?